Ne Ewɔa Dɔ la, Ke Zãe!
1 Míaƒe Fiaɖuƒe Subɔsubɔdɔ ɖoa dzeɖonya vovovo siwo míazã le gbeadzi ƒe aɖaŋu na mí ɣesiaɣi. Efiaa nya yeye siwo míagblɔ amewo natsɔ ɖe le Fiaɖuƒe gbedasia me la mí. Ðewohĩ èdzea agbagba ɣleti sia ɣleti be yeasrɔ̃ egbɔgblɔmɔnu siawo dometɔ ɖeka alo esi wu nenema. Gake gbeƒãɖela aɖewo akpɔe be kaka ne yewoazã wo dometɔ ʋee aɖewo sẽ ko la, Míaƒe Fiaɖuƒe Subɔsubɔdɔ bubu gafia egbɔgblɔmɔnu yeyewo. Eme kɔ ƒã be menye amesiamee ate ŋu asrɔ̃ egbɔgblɔmɔnu yeye esime xoxoa memãe haɖe o.
2 Gake mɔɖela kple gbeƒãɖela akpe geɖe bubuwo nɔa gbeadzi ɣeyiɣi gbogbo aɖe. Tsɔ kpe ɖe eŋu la, hame geɖe kpea woƒe anyigbamamã bliboa ɖo le kwasiɖa ʋee aɖewo me ɣesiaɣi. Edzɔa dzi na gbeƒãɖela siwo le nɔnɔme siawo me be woafia nya la gbɔgblɔmɔnu yeyewo yewo tsɔ kpe ɖe nya yeye siwo yewoagblɔ ŋu. Esia kpena ɖe wo ŋu wotrɔa asi le woƒe ŋutetewo ŋu wònyona wu. Enaa woƒe subɔsubɔdɔa vivina heɖea kpe wu eye wòkpena ɖe wo ŋu wonyaa alesi woakpɔ kuxi siwo wodoa goe gbɔ.
3 Eɖanye nɔnɔmea ka mee nèle o, ne èdzra egbɔgblɔmɔnu aɖe ɖo si te ŋu naa amewo tsɔa ɖe le nyaa me la, ke yi ezazã dzi! Mehiã be nàɖe asi le nyagbɔgblɔmɔnu si tsea ku ŋu o. Ðeko nàtrɔ asi le eŋu wòasɔ ɖe ɣletia me ƒe agbalẽnunana nu. Ne èle aɖaŋu siwo woɖo ɖe Míaƒe Fiaɖuƒe Subɔsubɔdɔ me tom la, di nya vivi siwo nàdi be nàde wò nyagbɔgblɔwo me kpee.
4 Eyata ne èxɔ Míaƒe Fiaɖuƒe Subɔsubɔdɔ yeye la, ɖo ŋku edzi be aɖaŋu koe nyagbɔgblɔmɔnu siwo le eme nye woɖo. Enyo ne àte ŋu azã wo. Gake ne èkpɔ be nya la gbɔgblɔmɔnu aɖe tsea ku le wò anyigbamamã me xoxo la, ke zãe! Nu vevitɔe nye be ‘nàwɔ wò subɔsubɔdɔa bliboe’ le mɔ nyuitɔ nu, eye nàdi amesiwo dze, akpe ɖe wo ŋu woava zu nusrɔ̃lawo.—Tim. II, 4:5.