Tso Míaƒe Nuxlẽlawo Gbɔ
Afrika-fefenuwo Aleke gbegbe nyati si nye “Afrika-Fefenu Siwo Ta Womexea Fe Ðo O” do dzidzɔ na amee nye si! (March 22, 1993 ƒe Awake!) Esi menye aɖaŋudɔfiala ta la, menya alesi wòhiã vevie be woado aɖaŋudɔwɔwɔ ɖe ŋgɔ le ɖeviwo dome le television kple kɔmpiuta dzi fefewo ƒe ɣeyiɣi sia me. Ne dzilawo zãa ɣeyiɣi tsɔ wɔa nuwo kple wo viwo la, nusiwo wofia wo la léna ɖe woƒe susu me hã ɣeyiɣi didi.
D. B., Germania
Mexɔ ƒe adre. Nyatia do dzidzɔ nam, eye mebui be enye nu ɖedzesi be [ɖevi Afrikatɔwo] te ŋu wɔa woa ŋutɔwo ƒe fefenuwo! Ele abe modzakaɖeɖe ene, eye mawɔe akpɔ. M. S., United States
M. S., United States
Nyɔnuwo Gbɔ Dɔdɔ Sesẽe Nyati vovovo siwo mieta le “Nyɔnu Gbɔ Dɔdɔ Sesẽe—Ŋɔdzie Wònye na Nyɔnuwo” ŋu do dzidzɔ nam ŋutɔ. (May 8, 1993 ƒe Nyɔ!) Ƒe 14 vi ye menye eye mese nu tso ɖevi siwo metsi wui siwo gbɔ wodɔ sesẽ ŋuti. Gake nyemexɔ edzi se o vaseɖe esime mexlẽ miaƒe nyatia esi na aɖatsi lólo ɖe ŋku dzi nam, eye mekpɔe dze sii be esia nye afɔku gã aɖe wu alesi mesusui. Akpe geɖe na mi.
S. B., United States
Le nye suku kɔkɔ dede ƒe ƒe gbãtɔ me la, ame aɖe si nye “míaƒe ƒomea xɔlɔ̃” la dɔ gbɔnye sesẽe. Le ƒe ʋee siwo va yi me la, mebui be mewɔ matre. Gake fifia mese egɔme be Yehowa nya be menye nye vodadae o! Ðeko wòvem be nyemexɔ kpekpeɖeŋu kaba do ŋgɔ o.
A. S., United States
Gbedada ŋuti aɖaŋuɖoƒe geɖewo ɖoa aɖaŋu tso alesi woahaya ne wodɔ ame gbɔ sesẽe me, gake womegblɔa alesi woawɔ aƒo asa nɛ la o. Le nyateƒe me la, ele vevie be woaxe mɔ ɖe nu nu tsɔ wu be nu nawɔ ame hafi woanɔ asi trɔm le eŋu! Nyati la kpe ɖe ŋunye ŋutɔ le go sia me, eye akpe ɖe nyɔnu siwo le afisiafi siwo gbɔ woate ŋu adɔ sesẽ la ŋu godoo.
J. A. M., Brazil
Ame aɖe si di be yeadɔ gbɔnye sesẽe la dze dzinye le gbɔme. Mewɔ avu si nyemewɔ nenema kpɔ o la kplii eye medo ɣli yɔ Yehowa ƒe ŋkɔ sesĩe zi geɖe ale gbegbe be ɖeko avũwo va nɔ wówom. Nye ɣlidodoa va ti kɔ na amesi dze dzinye la mlɔeba eye wòsi dzo. Mele edom ɖe amesiame gbɔ be woawɔ ɖe miaƒe aɖaŋuɖoɖoawo dzi. Le nɔnɔme siwo míado goe nu la, alesi míawɔ nui afia ne woadɔ mía gbɔ sesẽe alo womadɔ mía gbɔ o.
S. P., United States
Ƒe 20 kloe nye sia la, nye ame nyanyɛ aɖe dɔ gbɔnye sesẽe. Nyemegblɔe na ame aɖeke o le esi ŋu nɔ kpeyem ta. Nyemeƒo nu tso eŋu kpɔ o vaseɖe nye susudɔdaɣi le ƒe etɔ̃ siwo va yi me. Ɣemaɣi hafi megblɔe na srɔ̃nye. Fifia ese nusitae gbɔdɔdɔ medoa dzidzɔ nam o la gɔme. Esi mewu miaƒe nyatiawo xexlẽ nu la, mefa dzidzɔvi—menye vevesesevi o—zi gbãtɔ le ƒe 20 siwo va yi me, eye meda akpe na Yehowa.
T. P., United States
Nusɔsrɔ̃ le Yamenutome Ŋu Mewu nyati nyui siwo mieŋlɔ le nusɔsrɔ̃ le yamenutome ŋu le September 8, 1992 ƒe Awake! me xexlẽ nu. Togbɔ be nu vi aɖe koe menya le nyati sia ŋu hã la, numeɖeɖe si me kɔ si mieŋlɔ la wɔ dɔ ɖe dzinye. Mexɔe se be nyati siawo akpe ɖe mía ŋu be míakpɔ ŋudzedze ɖe tame si Yehowa ɖo ɖe amegbetɔƒomea me tɔ toɖolawo ŋu la ŋuti geɖe wu.
W. D. F., Costa Rica
Míele agbalẽ ŋlɔm tsɔ le akpe dam na mi le agbagba si miedze le nusɔsrɔ̃ le yamenutome ŋu ŋuti nyatiwo ŋɔŋlɔ me ta. Esi míexlẽ nyati mamletɔ la, míetsɔ dzidzɔ da akpe na Yehowa, Mawu nusianunyala, amesi wɔ xexeame le mɔ wɔnuku ma gbegbe nu. Míele mɔ kpɔm na eƒe nuɖoanyi yeyea vevie, esime wòana mɔnukpɔkpɔ amegbetɔ toɖola siwo si susu deblibo le be woase alesi xexeame le gɔme nyuie wu.
I. N. O. kple J. N. O., Nigeria