Agbenɔnɔ le Ŋukeklẽ ƒe Xexeme

“ALEKE mawɔ atsi agbe?” Biabia mae tu James Scott esi wòbu ɖe Himalaya Towo dzi eye mɔkpɔkpɔ bu ɖee keŋ. Eɖo afɔku ŋutɔŋutɔ me si nye be fafa nalée alo dɔ nawui wòaku. Eɖo ŋku alesi wòkpɔ amewo wonɔ ho ʋlim le karatdada me dzi eye wògblɔ be “wonɔ gbɔdzɔgbɔdzɔm vivivi, eye kɔ ɖesiaɖe si wotu wo gbã lãme na wo vaseɖe . . . esime wɔna vɔ le wo ŋu kura. Egblɔ be: “Nenemae mese le ɖokuinye me esi meʋu akplo si wote ŋu mlona mlɔa edzi eye mewɔ ɖɔɖɔɖɔ ka sno aɖe ɖu. Wɔna vɔ le ŋunye eye agbenɔnɔ tim kura. Nu meglom nenema kpɔ o.”—Lost in the Himalayas.

Le go aɖe me la, ame geɖe ƒe nɔnɔme sɔ kple etɔ egbea—woxaxa wo ɖo le xexe si me ŋukeklẽ bɔ ɖo me. Ðewohĩ àse le ɖokuiwò me be ŋusẽ le vɔvɔm le ye ŋu vivivi eye nu le ye glom. Ame ʋee aɖewo koe ate ŋu asi le nusi gblẽm ŋukeklẽ le fifia nu. Xexeame ƒe akpa si nèle awɔe be kuxi siwo ava dziwò ato vovo kura—ŋukeklẽ wɔa fu dukɔ madeŋgɔwo me tɔwo wòtoa vovo na dukɔ kpɔhowo tɔ. Gake aleke nuwo ɖasesẽe o, ɖewohĩ àte ŋu asrɔ̃ alesi nàwɔ anɔ te eye ŋusẽ nanɔ ŋuwò le ŋutilã, seselelãme, kple gbɔgbɔ me va ɖo afi aɖe vaseɖe esime ɖeɖe nava. Le mɔ ka nu? To wɔwɔ ɖe aɖaŋuɖoɖo vevi siwo amesiwo nya alesi woanɔ te ɖe enu ɖo dzi.

Nya vevi eve ɖe dzesi le aɖaŋu si woɖo me. Gbãtɔe nye be mègana nɔnɔme si sesẽ xoxo la nagagblẽ ɖe edzi o. The Urban Survival Handbook gblɔ be: “Afɔ nyui si nàɖe enye be nàƒo asa na afɔku siwo mehiã o . . . eye nàɖe esiwo màte ŋu aƒo asa na o ƒe nugbegblẽ dzi akpɔtɔ.” Evelia—si ɖewohĩ enye vevietɔ wu la—ku ɖe ame ƒe nɔnɔme ŋu. The SAS Survival Handbook gblɔ be: “Tamesusu gbɔe agbetsitsi tsona abe alesi dzidodo le ŋutilã me kple sidzedze hã tsoa egbɔe ene.”

Wɔ Nusi Nàte Ŋui le Nɔnɔmeawo Me

Staying Alive—Your Crime Prevention Guide ka nya ta be: “Wowua ame aɖe le United States aɖabaƒoƒo 22 ɖesiaɖe, wodaa adzo ame aɖe sɛkɛnd 47 ɖesiaɖe eye wodzea ame aɖe dzi vevie sɛkɛnd 28 ɖesiaɖe.” Nukae nàte ŋu awɔ le nɔnɔme mawo tɔgbe me? Ne mede ɖeke o la, àte ŋu adze agbagba be woagatɔ ŋku wò alo adze dziwò bɔbɔe o. Nɔ ŋudzɔ eye nàdze aɖaŋu. Wɔ nusianu si nàte ŋui be nàɖe afɔkua dzi akpɔtɔ.a

Le kpɔɖeŋu me, mègana woanɔ wò tafam bɔbɔe be nɔnɔmea nasẽ ɖe edzi o. The New York Times gblɔ be Amerikatɔ 18 le alafa me gblɔ be woflu yewo kpɔ—nufitifitiwɔla siwo dia amesiwo woate ŋu aba bɔbɔe la ble wo xɔ dɔlar akpe geɖe le wo si. Zi geɖe la, ame tsitsiwoe woda adzoe abe ahosi aɖe si xɔ ƒe 68 ene, amesi woda adzoe dɔlar 40,000. Nusi dzɔ ɖe edzi na woŋlɔ nyati sia ɖe nyadzɔdzɔgbalẽ me be: “Ne Ða Ƒo Wɔ la, Ameflula Gãwo ƒe Alɔme Nyona [efia ga alo dɔlar].”

Gake mele be nànye wɔnamanɔŋutɔ bubu si menya be ɖe wogbɔna ye fi ge o. Staying Alive xlɔ̃ nu mí be: “Kpɔ nyuie le amesiwo koa nu evɔ woƒe dɔme le vo la ŋu.” Mama aɖe si xɔ ƒe 70 wɔ ɖe aɖaŋuɖoɖo sia dzi. Wobe wòanɔ dɔlar 10 pɛ ko xem ɣleti sia ɣleti le nugblẽfexeɖoɖo aɖe me ne woaxe eƒe kɔdzifewo katã. Nyatakaka la gblɔ be: “Nusi Mama sia nawɔ koe nye be wòaxe dɔlar 2,500 na adzɔdzrala sia do ŋgɔ. Egbe mexee o. Esi wòƒo ka na nugblẽfexehaa la, ekpɔe be adzodalae ŋutsua nye. Kaka wòawɔ ti kplu evelia na adzɔdzrala la, kpovitɔwo va do eye wolée.”

Nusi nàwɔ akpɔ ɖokuiwò ta dze le aɖaŋu si woɖo ɖe Biblia me. “Amebebewu xɔa nya sia nya dzi sena; ke nunyala léa ŋku ɖe eƒe afɔɖeɖe ŋu.” (Lododowo 14:15; 27:12) Ame geɖe gblɔna be Biblia nye tsigãdzinu alo mewɔa dɔ o. Gake aɖaŋu nyui siwo wòɖo ate ŋu akpe ɖe ŋuwò nàtsi agbe. Nunyala Fia Salomo ŋlɔ be: “Nunya [abe esi le Biblia me ene] doa vɔvɔli, eye ga hã doa vɔvɔli; eye sidzedze ƒe viɖe enye: Nunya léa amesi si wòle la ƒe agbe ɖe te.”—Nyagblɔla 7:12.

Nyɔ! xlẽla geɖe kpɔe be nya sia le eteƒe. Le kpɔɖeŋu me, esi wodi be woadɔ ame aɖewo gbɔ sesẽe alo woawɔ ŋutasẽnu bubu ɖe wo ŋu eye wodo ɣli sesĩe la, ekpɔ wo ta wòsɔ kple nya si wogblɔ ɖe Mose V, 22:23, 24. Ame bubuwo wɔ ɖe aɖaŋu si Biblia ɖo be míatsri nusianu ‘si ƒoa ɖi ŋutilã kple gbɔgbɔ’ la dzi. (Korintotɔwo II, 7:1) Esia na wokpɔ wo ɖokui ta tso atama kple atike vɔ̃ɖi dzrala siwo gblẽa nu le amewo ƒe lãmesẽ ŋu tsɔ wɔa gae la si me. Exlẽla geɖewo hã ƒo asa na TV dzi mawunyagblɔla gadila vivivowo kple dunyahela ɖoƒegãdila vɔ̃ɖiwo. (Kpɔ aɖaka si le axa 7.) Xlẽ Biblia la. Kpekpeɖeŋu nyui gbogbo siwo wòna la awɔ nuku na wò.

Wò Ŋutɔ Mègazu Ŋuklẽla O

Le nyateƒe me la, ŋukeklẽ ƒe afɔku bubu li—wò ŋutɔ hã àte ŋu azu ŋuklẽla. Esia ana nɔnɔme vavã siwo na nèto vovo tso lãwo gbɔ la nabu. Esi wonɔ nu ƒom tso asitsatsa to mɔ sia mɔ nu, si me asitsalawo le viɖe dim le mɔnukpɔkpɔ ɖesiaɖe me ŋu la, wobe eteƒekpɔla aɖe gblɔ be: “Ðokuitɔdilawo le nu lɔm de ko me nyateƒe. Ðeko ŋukeklẽa nu va sẽ . . . wògbɔ eme.” Dzu sia neɖi hawo ŋu wu asitsala ŋuklẽlawo! Edze ƒã be wogbe Yesu Kristo ƒe aɖaŋuɖoɖo nyui sia be: ‘Mikpɔ nyuie, eye minɔ ŋudzɔ ɖe ŋukeklẽ ƒomevi ɖesiaɖe ŋu.’—Luka 12:15.

Yesu Kristo ɖo aɖaŋu ma elabena enya nusi nàte ŋu agblẽ le ɖokuiwò ŋu ne ŋukeklẽ ɖu dziwò. Ŋutilãmenuwo didi—azɔ le nyateƒe me ŋusẽ alo gbɔdɔdɔ ƒe nudzodzro—ate ŋu azu dzodzro sesẽ le wò agbe me, eye wòaxɔ ɣeyiɣi alo didi ɖesiaɖe si wòle be nàzã ɖe amewo alo gbɔgbɔmenuwo ŋu la le asiwò. Anthony Sampson gblɔ le eƒe agbalẽ si nye The Midas Touch me be: “Mawusubɔsubɔ ƒe nuwɔna geɖe va le ga ŋu. Le mɔ ka nu? Ga va zu mawu. Ŋukeklẽ kple viɖekpɔkpɔ ƒe vɔsamlekpui dzie wotsɔa nu bubu ɖesiaɖe saa vɔe ɖo. Nusi dim wole enye viɖe. Ne viɖea kpe la, eyae nye nyuitɔ. Gake le nyateƒe me la, aleke nèɖatsɔ ŋukeklẽ di ŋutilãmenuwoe o, maɖi ƒo na wò gbeɖe o. Nyagblɔla 5:9 gblɔ be: “Amesi lɔ̃a ga la, ga maɖi ƒo nɛ o, eye amesi lɔ̃a kesinɔnu la, viɖe aɖeke matso eme nɛ o.” Nenema ke “amesi lɔ̃a” ŋusẽ, kesinɔnuwo, alo gbɔdɔdɔ la, aleke ke wòɖakpɔ woe o, maɖi ƒo nɛ akpɔ o.

Xɔname ƒe Mɔkpɔkpɔ Megabu Ðe Wò Gbeɖe O

Nu vevi aɖe si alé wò ɖe te enye be mɔkpɔkpɔ kple kakaɖedzi nanɔ asiwò. Ɣeaɖewoɣi la, nu boo aɖeke meli nàwɔ asi le nusi ŋuklẽlawo ƒe nuwɔna agblẽ nu o. Le kpɔɖeŋu me zi geɖe la, wɔna boo aɖeke menɔa dɔwuitɔwo ŋu be woado le nɔnɔme si me wole me o. Gake dzi megaɖe le ƒowò o; mègana ta o. The SAS Survival Handbook gblɔ be: “Ele bɔbɔe be nàna ta, agbɔdzɔ ahalé blanui” ne ège ɖe nɔnɔme sesẽ alo afɔku aɖe me. Mègana tamesusu alo seselelãme manyomanyowo naɖu dziwò o. Ðewohĩ awɔ nuku na wò be àte ŋu ado dzi geɖe. Agbalẽ ma ke gblɔ be: “Ŋutsuwo kple nyɔnuwo ɖee fia be yewoate ŋu anɔ te le nɔnɔme sesẽtɔ kekeake hã me.” Aleke wowɔe? Egblɔ be: “Esi woɖoe kplikpaa be yewoawɔe” tae wonɔ te ɖo. Ðoe kplikpaa be ŋukeklẽ ƒe xexeme sia nagaɖu dziwò o.

Woxɔ na James Scott si míeyɔ do ŋgɔ la mlɔeba tso nusi anye eƒe yɔdo le Himalaya la me. Egblɔ be alesi yeʋli be yeatsi agbe na yesrɔ̃ nu vevi ɖeka ya teti. Nukae? Ebe: “Kuxi aɖeke mele agbe me si sesẽ akpa be womate ŋu akpe akɔ kplii o.” Tim Macartney-Snape si bi ɖe tolialia me, amesi wòwɔ nuku na be James Scott te ŋu nɔ agbe ɣeyiɣi didi vaseɖe esime woɖee la hã srɔ̃ nane. Egblɔ be: “Zi alesi mɔkpɔkpɔ aɖe li ko la, mele be nàna ta gbeɖe o.” Eyata aleke nuwo ɖaɖi vɔvɔ̃e o, ne èbu mɔkpɔkpɔ la, ɖeko nàgagblẽ nya la ɖe edzi. Mègana xɔname ƒe mɔkpɔkpɔ nabu ɖe wò gbeɖe o.

Gake ɖe “mɔkpɔkpɔ aɖe” lia, mɔkpɔkpɔ si ŋu kakaɖedzi le be woaxɔ na mí le xexe sia si me ŋukeklẽ bɔ ɖo mea? Ðe woava ɖe ŋuklẽla siwo le anyigba sia tsrɔ̃m eye wole ame biliɔn geɖe ƒe agbe dome gblẽm ɖa gbaɖegbea? Le nyateƒe me la, mɔkpɔkpɔ aɖe li si ŋu kakaɖedzi le be woava xɔ na mí. Xlẽ Biblia ƒe ŋuɖoɖo le nyati si kplɔe ɖo me.

[Etenuŋɔŋlɔ]

[Aɖaka si le axa 7]

Biblia ƒe Nuxlɔ̃ame Siwo Sɔ Ðe Ɣeyiɣi Dzi

Lododowo 20:23 “Nudakpe eve ƒomevi enye ŋunyɔ na Yehowa; nudanu amebatɔ menyo o.”

Yeremya 5:26, 28 “Ame vɔ̃ɖiwo le nye dukɔ la dome, wode xa ɖi, eye wodo dɔgɔ̃e abe xevimɔ̃trela ene; wotre mɔ̃ heɖe amegbetɔwo! Woda ami lalala, eye vɔ̃ɖiwɔwɔ yɔ wo gbagba; womedrɔ̃a nya o, womedrɔ̃a tsyɔ̃eviwo ƒe nya, be wòadze edzi na wo o, eye womedrɔ̃a nya na ame dahewo o.”

Efesotɔwo 4:17-19 “Azɔ la mele esia gblɔm, eye mele ɖase ɖim le Aƒetɔ la me bena, azɔ la miagazɔ abe alesi trɔ̃subɔlawo hã zɔna le woƒe tamesusu ƒe yakanyenye me la ene o, amesiwo ƒe nyasã do viviti, eye wonye amedzrowo le Mawu ƒe agbe la gome le numanyamanya, si le wo me la ŋuti, le woƒe dzimesesẽ la ŋuti, amesiwo, esi woƒe dzitsinya ku atri la, wotsɔ wo ɖokui na hadzedze, bene woanɔ makɔmakɔnyenye katã dzi le ŋukeklẽ me.”

Kolosetɔwo 3:5 “Eyata miwu mia ŋutinu, siwo le anyigba dzi; ahasiwɔwɔ, makɔmakɔnyenye, fiẽŋufiẽŋui, nudzodzro vɔ̃ kple ŋukeklẽ, si nye trɔ̃subɔsubɔ.”

Timoteo II, 3:1-5 “Nya esia bena, le ŋkeke mamleawo me la ɣeyiɣi vɔ̃wo lava. Elabena ameawo lanye ɖokuilɔ̃lawo, galɔ̃lawo, adegbe ƒuƒlu ƒolawo, dadalawo, busunyagblɔlawo, ame maɖoto dzilawo, ame madakpewo kple ame makɔmakɔwo; amesiwo melɔ̃a ame ƒe nya o, amesiwo gbea avuléle, ameŋuzɔlawo, amesiwo mete ŋu ɖua wo ɖokui dzi o, ame wɔadãwo, amesiwo melɔ̃a nu nyui o, yomemɔfialawo, ame mabunuwo, amesiwo doa wo ɖokui ɖe dzi glodzo, amesiwo lɔ̃a hadzedze wu esi woalɔ̃ Mawu, amesiwo si mawusosroɖa ƒe nɔnɔme le, gake wogbe eƒe ŋusẽ la. Te ɖokuiwò ɖa tso amesiawo gbɔ!”

Petro II, 2:3 “Le ŋukeklẽ me woatsɔ nyakpakpawo adi viɖe le mia ŋu, amesiwo ƒe fɔbubu mehe ɖe megbe tso blema ke o, eye woƒe gbegblẽ medɔa akɔlɔ̃e o.”