Ŋukeklẽ—Aleke Wòle Fu Wɔm Míi?

ŊUKEKLẼ le ame miliɔn geɖe ƒe agbe dome gblẽm. Ena ŋuklẽlawo ƒe nuwɔna megadzea amegbetɔ tɔ dzi o eye wòkplɔ vevesese kple nuxaxa ƒu wosimetsilawo. Anɔ eme be ŋukeklẽ le fu wɔm wò hã le agbe me. Nuwo fifi le fiase me gɔ̃ hã na nusiwo nèƒlena xɔa asi. Ne wò fetu mede naneke o eye mète ŋu ƒlea gbesiagbenuhiahiãwo o la, ke anye ame aɖe ƒe ŋukeklẽ enye ma le fu wɔm wò.

Dɔwuitɔwo Kple Kukulawo

Dukɔmeviwo ƒe ɖokuitɔdidi na agbagba siwo dziɖuɖua dzena be yeakpe ɖe ame dahewo ŋu nyuie la metsɔa afɔ o. Aƒetɔ John Boyd Orr si nye dzɔdzɔmeŋutinunyala kple nuɖuɖuŋutinunyala gblɔ le keke ƒe 1952 me be: “Dziɖuɖuwo le klalo be yewoaƒo amewo kple aʋawɔnuwo nu ƒu ɖe xexemeʋa wɔwɔ ŋu, gake Ŋusẽtɔ Gãwo mele klalo be yewoawɔ ɖeka aɖe dɔwuame kple ahedada ɖa le xexeame o.”—Food Poverty & Power, si Anne Buchanan ta.

Ele eme be wodoa alɔ amewo vie ya. Gake aleke tututu agbea le na ame dahe siwo sɔ gbɔ wu le xexeame, amesiwo wogblẽ ɖi la? Akɔnta si wobu nyitsɔ laa gblɔ be togbɔ be wodzi nuɖuɖugbledede ɖe edzi le teƒe aɖewo hã la, “dɔwuame kple nunyuimakpɔɖu le fu wɔm ame dahe siwo le xexeame ƒe akpa gãtɔ kokoko . . . Amesiwo le xexeame mamã ɖe akpa atɔ̃ me ƒe ɖeka [si wu biliɔn ɖeka] tsia dɔ gbesiagbe.” Akɔntabubua yi edzi be: “Hekpe ɖe eŋu la, ‘nuɖuɖu nyui ƒe dɔ’ le ame biliɔn 2 wum le esi . . . nunyiame mele woƒe [nuɖuɖu] me o ta, si ate ŋu ahe dɔléle sesẽwo vɛ.”—Developed to Death—Rethinking Third World Development.

Amesiwo Wowɔ Kluviwoe

Hlɔ̃dola gãwo to wosimetsilawo kple amewo katã dzi zu kesinɔtɔwo. Atike vɔ̃ɖiwo, ŋutasesẽ, gbolowɔwɔ, kple ametafatafa le ganyawo me wɔ ame miliɔn geɖe kluviwoe. Azɔ hã Gordon Thomas gblɔ le eƒe agbalẽ si nye Enslaved me be: “Kluvisitsatsa ƒe Tsitretsiɖeŋuha gblɔ be wobu akɔnta be kluvi miliɔn 200 ye le xexeame. Wo dometɔ miliɔn 100 nye ɖeviwo.” Nuka tututu gbɔe wòtso? Akɔntabubua ɖe eme be: “Didi be woawɔ ame kluvii kpɔtɔ nye amegbetɔ ƒe nɔnɔme si menyo kura o . . . Nudzodzro, ŋukeklẽ, kple didi vevie be woakpɔ ŋusẽ ye na wowɔa amewo [kluviwoe].”

Ŋusẽtɔwo daa adzo ŋusẽmanɔsitɔwo kple wɔnamaŋutɔwo eye wowua wo dometɔ geɖe. “Le Indiatɔ miliɔn eve siwo nɔ Brazil hafi yevuwo va zi gbãtɔ dome la, ɖewohĩ wo dometɔ akpe alafa eve koe susɔ fifia.” (The Naked Savage) Nukatae? Ŋukeklẽ koe.

Vovototo Gã si le Dzidzim Ðe Edzi le Hotsuitɔwo Kple Ame Dahewo Dome

The New York Times ka nya ta be James Gustave Speth si nye Dukɔ Ƒoƒuawo ƒe Ŋgɔyidɔwo Dzikpɔha ƒe dɔdzikpɔla la gblɔ be “ame ŋkuta siwo le xexeame . . . le kɔ lim kesinɔnuwo gleglegle hele ŋusẽ kpɔm evɔ ameƒomea ƒe afã kple edzivɔ da ahe kolikoli.” Nya siwo wògblɔ gaɖe vovototo gã vɔ̃ɖi sia si le hotsuitɔwo kple ame dahewo dome fia nyuie wu, ebe: “Amesiwo sɔgbɔ wu anyigbadzinɔlawo ƒe afã kpɔtɔ li siwo ƒe fetu mede dɔlar 2 gbeɖeka o—wonye ame biliɔn 3 kple edzivɔ.” Egagblɔ be: “Nɔnɔme sia zu mɔkpɔkpɔbuɖeame, dɔmedzoedodo, kple dziɖeleameƒo na ame dahewo le hatsotso eve sia me.”

Nusi na mɔkpɔkpɔ gabuna ɖe wo kura enye be ewɔ abe nɔnɔme si me ame daheawo kple dɔwuitɔawo le metena ɖe hotsuitɔawo dometɔ geɖe dzi alo wɔa nublanui na wo o ene.

Amesiwo ŋukeklẽ le fu wɔm la le afisiafi. Le kpɔɖeŋu me, kpɔ alesi sitsoƒedila siwo ŋusẽ ʋiʋli xaxa ɖe Bosnia, Rwanda, kple Liberia tɔtɔe ɖa. Kpɔ alesi amesiwo dɔ le wuwum vevie le xexe sia si me nuwo do agbogbo ɖo tsi asii ɖa. Nuka gbɔe nusiawo katã tso? Ŋukeklẽ—ƒomevi aɖe gbɔe wòtso!

Aleke nàwɔ atsi agbe le adzodala ŋuklẽla siawo dome le nɔnɔme vɔ̃ɖi sia me? Nyati eve siwo kplɔe ɖo aɖo biabia sia ŋu.