Wobe Modzakaɖeɖee
DZIDZƆ kple hoowɔwɔ xɔ fefewɔƒea kɔtɔɔ. Ame akpe geɖe kpe ta hena blema Roma ƒe wɔna siwo doa dzidzɔ na ame wu la dometɔ ɖeka kpɔkpɔ. Wotsɔ aflagawo, seƒoƒowo, kple avɔ siwo me wolɔ̃ nutatawo ɖo le amadede vovovo me ɖo atsyɔ̃ na fefewɔƒea wònya kpɔ. Wowɔ tsidzidzi siwo me wode ami ʋeʋẽe, siwo ƒe ʋeʋẽ lililĩ xɔ yame katã. Kesinɔtɔwo do woƒe atsyɔ̃wu siwo xɔ asi wu ɖesiaɖe. Amehawo ƒe nuƒoƒo kple nukoko xɔ teƒea, gake ameha siawo ƒe nukoko to vovo tso nu dziŋɔ si gbɔna dzɔdzɔ ge gbɔ.
Eteƒe medidi hafi woku tuba si nye aʋakpẽ tsɔ mia asi yivuwɔla eve be woadze avuwɔwɔ gɔme o. Amehawo kpɔ dzidzɔ esi avuwɔlawo te wo nɔewo dzadza ŋutasesẽtɔe. Esesẽ be woase woƒe yiawo ƒe ɖiɖi le nukpɔlaawo ƒe aƒadodo sesĩe ta. Zi ɖeka kasia, avuwɔla ɖeka wɔ kaba ƒu eƒe futɔa anyi. Fifia amesi woƒu anyi ƒe agbe le nukpɔlawo si me. Ne woʋuʋu woƒe takuviwo la, womawui o. Ame aɖewo gblɔ be esi ameha la—siwo me nyɔnuwo kple nyɔnuviwo le—nya wɔ dzesi aɖe kple woƒe degblefetsu ko la, wona gbe be woawu amea. Mexɔ ɣeyiɣi aɖeke hafi wote ame kukua tso avuwɔƒea o, wotsɔ sofi xe ke ɖe ʋua dzi, galɔ ke bubu kaka ɖe teƒea, eye amehawo gadzra ɖo hena ʋukɔkɔɖivu mamlɛawo kpɔkpɔ.
Blema Romatɔ geɖe bu nusia be enye modzakaɖeɖe. Agbalẽ si nye Rome: The First Thousand Years gblɔ be: “Agbenyuinɔnɔ ŋuti nufiala siwo ƒe nya dzi sẽ ŋutɔ gɔ̃ hã metsi tre ɖe dzidzɔkpɔkpɔ ɖe ʋukɔkɔɖi sia ŋuti o.” Eye modzakaɖeɖe dzeakaɖa siwo nɔ Roma la dometɔ ɖeka koe yivuwɔwɔa nye. Wowɔ aʋa ŋutɔŋutɔ hã le ƒu dzi be nukpɔla siwo nu ʋukɔkɔɖi vivina na la nakpɔ. Wowua amewo le gaglãgbe gɔ̃ hã, eye woblaa vɔ̃wɔla si wotso kufia na ɖe ati ŋu lã wɔadã dɔwuiwo vuvuna.
Wogawɔa fefe vovovowo hã le Roma na amesiwo nu ʋukɔɖivuwɔwɔ mevivina o. Ludwig Friedländer ŋlɔ ɖe Roman Life and Manners Under the Early Empire me be “ahasiwɔwɔ kple gbɔdɔnyawo nye nya veviwo”—le fefewɔƒeawo—le gbesiagbegbenɔnɔ ŋuti fefe kpuiwo me. Nya madzetowo sɔŋ yɔ woƒe nuƒoƒo me, hekpe ɖe hatsɛkanya gbegblẽwo, momakɔɖeameŋu, asidadaɖenyadzi manyomanyo geɖe ŋu, eye gawu la, woɖua ɣe gbegblẽwo ɖe kpẽ si wokuna dzi.” The New Encyclopædia Britannica gblɔ be “ɖaseɖiɖi li be wonɔa agbe gbegblẽ ŋutɔŋutɔ le fefeawo me le Roma Fiaɖuƒea ƒe anyinɔɣi. Esɔ be Friedländer yɔ fefeawo be “wonye agbegbegblẽnɔnɔ kple yakanyagbɔgblɔ ƒe fefe siwo gbɔ eme akpa, siwo woɖena fiana gaglã wu ɖesiaɖe,” eye egagblɔ be: “Agbegbegblẽnɔnɔ nyɔŋutɔ kekeake ƒe nukpɔkpɔwo tae woƒoa asikpe ɖo wu.”a
Ke egbea hã ɖe? Ðe modzakaɖeɖe si ƒomevi dzɔa dzi na amegbetɔ trɔa? De ŋugble le kpeɖodzi si ŋu míeƒo nu tsoe le nyati si kplɔe ɖo me la ŋuti.
[Etenuŋɔŋlɔ]
a Ɣeaɖewoɣi la, wowua ame le fefewɔwɔa me be fefea nadze nu ŋutɔŋutɔe. Agbalẽ si nye The Civilization of Rome gblɔ be: “Enye nusi bɔ be woana vɔ̃wɔla si wotso kufia na la nawɔ fefewɔla ƒe ɖoƒe le ewuɣi.”
[Nɔnɔmetata Tsoƒe si le axa 11]
The Complete Encyclopedia of Illustration/J. G. Heck