Biblia Ƒe Nukpɔsusu

Ðe Kristotɔwo ƒe Ðekawɔwɔ Ðe Mɔ ɖe Vovototo ƒe Anyinɔnɔ Ŋua?

ÐEKAWƆWƆ nye nu vevi aɖe le Kristo-hamea me. Ðekamawɔmawɔ le nufiafiawo dzixɔxɔse me ahe nyaʋiʋli sesẽwo, masɔmasɔ, kple keléle gɔ̃ hã vɛ. (Dɔwɔwɔwo 23:6-10) Biblia gblɔ be “Mawu menye nyamanyamawɔwɔ ƒe Mawu o, ke ŋutifafa ƒe Mawu boŋ.” (Korintotɔwo I, 14:33) Eyata woxlɔ̃ nu Kristotɔwo be woagblɔ nya ɖeka eye woawɔ ɖeka le susu kple tamesusu ɖeka ma ke me.—Korintotɔwo I, 1:10.

Ðe nya siawo kple etɔgbe siwo le Biblia me fia be Kristotɔwo ƒe nuwɔna asɔ pɛpɛpɛ kple wo nɔewo tɔ le go sia go mea? (Yohanes 17:20-23; Galatiatɔwo 3:28) Ðe Kristotɔnyenye si ŋu woƒo nu tsoe le Biblia me meɖe mɔ ɖe vovototo ŋu le amenyenye gome oa? Ðe wokpɔ mɔ be Kristotɔwo katã nawɔ nu ɖe ɖoɖo kpaɖii ɖeka aɖe nua?

Mawu ƒe Nu Dzroa Mía Dometɔ Ðesiaɖe

Ame aɖewo xɔe se vevie be nu bubu si dzi wotona kpɔa ŋusẽ ɖe ame gbogbowo dzi koe Biblia nye. Enye nyateƒe be zi geɖe la, kɔmamã aɖewo wɔa eŋudɔ le mɔ gbegblẽ nu nenema ya. Gake nukpɔsusu si to vovo kura ye nɔ Yesu si ɖe Ŋɔŋlɔawo kple Mawu si nye Eŋlɔla la ŋu. Egblɔ le Mawu ŋu be enye amesi tsɔ ɖe le eme na eƒe nuwɔwɔ ɖesiaɖe vevie.

Yesu ɖe eme le Yohanes 6:44 be: “Ame aɖeke mate ŋu ava gbɔnye o, ne menye Fofo, si dɔm ɖa lae hee vɛ o.” Dɔwɔnya si wozã le afisia la mefia be Mawu hea amewo akpasesẽtɔe o. Ke boŋ Mawu naa eƒe nu nyoa amewo ŋu dɔmenyotɔe, wòʋãa woƒe dzi. Biblia ŋuti nunyala aɖe gblɔe be, ‘Mawu ƒe nɔnɔme kpɔa ŋusẽ ɖe amewo ƒe susu dzi woxɔa edzi sena.’ Wɔla la mebunɛ be ame gbogbo siwo si nɔnɔme ɖeka le ye amegbetɔƒomea me tɔwo katã nye o. Edzroa amewo me kpɔna ɖekaɖeka eye wòhea amesiwo si dzi nyui le ɖe eɖokui ŋu dɔmenyotɔe.—Psalmo 11:5; Lododowo 21:2; Dɔwɔwɔwo 13:48.

De dzesi alesi apostolo Paulo te ŋu trɔ ɖe nɔnɔmewo ŋui. Ekpɔ amewo ƒe hiahiã tɔxɛwo dze sii eye wòlɔ̃ ɖe edzi be nukpɔsusu aɖewo bɔ ɖe dukɔ alo nuto aɖewo me tɔwo me. Azɔ etrɔ eƒe nɔnɔme ɖe wo tɔa nu. Eŋlɔ bena: “Mezu abe Yudatɔ ene hena Yudatɔwo, bena asinye nasu Yudatɔwo dzi; . . . Mezu gbɔdzɔgbɔdzɔtɔ na gbɔdzɔgbɔdzɔtɔwo, bene asinye nasu gbɔdzɔgbɔdzɔtɔwo dzi; amewo katã mezu nusianu na, bene maɖe wo dome ame aɖewo kokoko.”—Korintotɔwo I, 9:20-22.

Edze ƒã be Paulo mezi amewo dzi be woawɔ nu ɖe mɔ ɖeka aɖe nu alo wɔ nu ɖe wo katã ŋu sɔsɔe o. Ede dzi ƒo na wo ale: “Mina amenuveve kple dze nanɔ miaƒe nya me ɖaasi, bena mianya alesi wòdze be, miaɖo nya ŋuti na amesiame.” (Kolosetɔwo 4:6) Ẽ, ele be Paulo kple Kristotɔ bubuwo nade dzesi ame ɖesiaɖe ƒe nɔnɔme tɔxɛwo ale be woate ŋu akpe ɖe wo ŋu.

Alesi Mawu Ðo Nuwoe le Gɔmedzedzea Me

Le ame ƒe Kristo-hamea me tɔ zuzu vɔ megbe la, woyia edzi wɔa nu ɖe eŋu ɖe eƒe nɔnɔmewo nu. Mawu ƒe amewo meɖea asi le woƒe amenyenye ɖesiaɖe ŋu va wɔa nu ɖe mɔ tɔxɛ aɖe nu hekuna ɖe ŋgɔnɔlawo ƒe didiwo ŋu goŋgoŋ o. Ke boŋ amenyenye vovovowo le wo si eye ame ɖesiaɖe kple eƒe ŋutetewo, nɔnɔme, kple nukpɔsusuwo. Womebua amewo ƒe nɔnɔme vovovoawo be eɖea fu na yewo alo ɖiaa yewo nu o. Nenemae Mawu ɖo nuwoe le gɔmedzedzea me.

Eyata le xexeme yeye si ŋugbe wodo le Biblia me na ame dzɔdzɔewo me la, nɔnɔme vovovowo anɔ amegbetɔ siwo de blibo la si. (Petro II, 3:13) Wogblɔ nya siwo gbɔna wòsɔ nyuie le tanya si nye “Blibodede” te le Biblia ƒe numekugbalẽ si nye Insight on the Scripturesa me be: “Gake blibodede mefia be vovototo maganɔ nuwo dome, abe alesi ame aɖewo susunɛ zi geɖe ene o. Vovototo geɖe le amegbetɔwo kple lãwo, siwo nye Yehowa ƒe ‘nuwɔwɔ deblibo’ (Mose I, 1:20-24; Mose V, 32:4), la dome.”

Insight gblɔ kpe ɖe eŋu be: “Anyigba la ƒe blibodede hã mefia be nuwo ƒe vovototo, tɔtrɔ, alo nuwo ƒe masɔmasɔ kple wo nɔewo manɔ edzi o; nusiwo anɔ edzi la ƒe ɖewo gɔme anya se bɔbɔe eye ɖewo gɔmesese asesẽ, ɖewo anɔ kplalaa ko eye ɖewo anye atsyã, nu veve kple nu viviwo, nu klitsaklitsawo kple nu zɔzrɔ̃ewo, gbegbewo kple avewo, towo kple baliwo anɔ anyi. Numiemiewo ade ama le adame ƒe gɔmedzedze, dzoxɔxɔ anɔ dzomeŋɔli si me yame ƒe amadede nyea blɔtɔ si me kɔ la me, amadede dzeani siwo dona le kele me anɔ anyi, eye sno si dza yeyee ƒe anidzedze ŋutɔŋutɔ adze. (Mose 8:22) Eyata amegbetɔ deblibowo mawɔ nu ɖe mɔ ɖeka aɖe koŋ nu eye woƒe amenyenye, aɖaŋu, ŋutetewo manye ɖeka o.”

Ðe Tsɔtsɔ Le Ame Bubuwo Me

Gake Kristotɔnyenye vavãtɔ medea ɖokuiŋudzedze ƒe ɖekematsɔleme na ame bubuwo ƒe dzi ƒo o. Apostolo Paulo lé ŋku ɖe eƒe agbenɔnɔ kple nuwɔna ƒe akpa sia akpa ŋu nyuie ale be wòaganye nukikli na ame bubuwo o. Egblɔ le lɛta si wòŋlɔ na Korinto-hamea me be: “Míena nuɖiaɖia aɖeke le naneke me o, bene womagaka mo na míaƒe subɔsubɔ la o.” (Korintotɔwo II, 6:3) Ɣeaɖewoɣi la, ele be míaɖu mía ŋutɔwo míaƒe dzodzrowo dzi eye míatsɔ ame bubuwo ƒe nuhiahiãwo aɖo ŋgɔgbe na mía ŋutɔwo mía tɔ. Le kpɔɖeŋu me, Paulo ŋlɔ na Kristotɔ siwo nɔ Roma be: “Enyo bena, màɖu lã o, eye màno aha hã o, alo màwɔ nane, si nɔviwò klina alo wòɖia enu alo wògbɔdzɔna le eŋuti la o.”—Romatɔwo 14:21.

Nenema ke egbea ame aɖe atiae be yemano aha muame le amesi ŋu ahanono ƒe kuxi le gbɔ o. (Korintotɔwo I, 10:23, 24) Menye ɖe wozi edzi be wòawɔe nenema wòasɔ ɖe amea ƒe didiwo nu o, ke dɔmenyonyo kple lɔlɔ̃ ɖedzesi wònye wòɖe fia. “Kristo [gɔ̃] hã medze eɖokui ŋu o.” Yesu nye ame nɔ eɖokui si, gake mezi eƒe didiwo ɖe ame bubuwo dzi tsɔ gblẽ nu le woƒe seselelãme ŋu o.—Romatɔwo 15:3.

Kristotɔnyenye vavãtɔ ƒe akpa tuameɖo bubue nye bubudede amewo ƒe ablɔɖe kple woƒe didiwo ŋu le afisi Biblia ƒe mɔfiamewo ɖe mɔ se ɖo nu. Efia nu be Mawu wɔ amesiame etɔxɛe be wòato vovo. Míexlẽ le Korintotɔwo I, 2:11 be: “Amewo dometɔ kae nya nusi le ame me, ne menye ame ƒe gbɔgbɔ, si le eme la koe oa?” Míedzea agbagba be míase nu gɔme na ame bubuwo alesi míate ŋui. Gake mawunyakpukpui sia fia be nɔnɔme tɔxɛwo le mía dometɔ ɖesiaɖe si si gɔme mía ŋutɔwo kple mía Wɔla la koe te ŋu sena. “Dzime ƒe ame ɣaɣla” le mía si si míeɖena fiana le mɔ si míetia nu.—Petro I, 3:4.

Ðekawɔwɔ Kple Vovototo—Wohiã Dadasɔ Ŋuɖɔɖotɔe

Apostolo Paulo ɖo Kristotɔwo ƒe dadasɔ ƒe kpɔɖeŋu nyui aɖe ɖi. Togbɔ be enye Kristo ƒe apostolo si si ŋusẽ nɔ hã la, eɖɔ ŋu ɖo be yemazi yeƒe susu ɖe ame bubuwo dzi o.

Le kpɔɖeŋu me, kakaɖedzi sẽŋu nɔ Paulo si ɖe trenɔnɔ le xexe madeblibo sia me ƒe viɖenunyenye ŋu. Eya ŋutɔ nye tre esime wòŋlɔ nya sia bena: “[Amesiwo ɖe srɔ̃] akpɔ xaxa le ŋutilã me,” eye “nenye be, [ahosi nɔ] anyi nenema srɔ̃maɖemaɖee la, woayrae awu le nye tamesusu nu.” Nyateƒe si wònye be eƒe nyawo va zu Mawu ƒe Nya si tso gbɔgbɔ me ƒe akpa aɖe fia be naneke megblẽ le eƒe nukpɔsusua ŋu o. Ke hã egaɖe eme be: “Ne èɖe srɔ̃ hã la, mèwɔ nuvɔ̃ o.”—Korintotɔwo I, 7:28, 40.

Edze ƒã be ŋutsu srɔ̃tɔwoe apostoloawo ƒe akpa gãtɔ nye, abe alesi wòdze le Paulo ƒe nya siawo me ene be: “Alo ɖe míekpɔ ŋusẽ bena, míakplɔ nɔvinyɔnu, si anye mía srɔ̃ la, anɔ nugbe yim abe alesi apostolo bubuawo kple Aƒetɔ la nɔviwo kpakple Kefa hã wɔna ene oa?” (Korintotɔwo I, 9:5) Kristotɔwo nya be le nya sia gome la, yewoate ŋu awɔ tiatia siwo to vovo na Paulo tɔ gake akpɔtɔ ade bubu yewo ŋu.

Woɖea mɔ na Mawu subɔlawo ɣesiaɣi woɖea woƒe xɔse fiana ɖe amenyenye tɔxɛ si le wo si nu. Le nyateƒe me la, Mawu ɖe mɔ gɔ̃ hã Biblia-ŋlɔlawo zã woa ŋutɔwo ƒe atsyã tsɔ ŋlɔe. Le kpɔɖeŋu me, togbɔ be Nexemya ɖe ɖokuibɔbɔ fia hã, eŋlɔ eƒe nuŋlɔɖia wòdze ƒã be eya ŋutɔe le nyaa gblɔm. (Nexemya 5:6, 19) Gake apostolo Yohanes ɖɔ ŋu ɖo eye mezã eƒe ŋkɔ zi ɖeka pɛ gɔ̃ hã le Nyanyuigbalẽ si wòŋlɔ me o eye ƒã hafi wòahe susu ayi eɖokui dzi. Mawu da asi ɖe atsyã eveawo katã dzi eye wòna wokpɔ wo ta wole Biblia me.

Dadasɔ kple nugɔmesese ƒe kpɔɖeŋu siawo tɔgbe dze le Ŋɔŋlɔawo katã me. Edze ƒã be Kristotɔwo ƒe ɖekawɔwɔ ɖea mɔ ɖe nuwo ƒe vovototo ŋu. Le nyateƒe me la, afisi wonɔ kple nukpɔsusuwo ƒe vovototo ate ŋu ahe ɖekamawɔmawɔ vɛ ne wometu gbɔgbɔmenɔnɔmewo ɖo o. (Romatɔwo 16:17, 18) Gake ne ‘míedo lɔlɔ̃, si nye blibonyenye la ƒe nublanu’ la, míekpɔa ame bubuwo ƒe amenyenye tɔxɛwo dzea sii eye míesea vivi le wo dome.—Kolosetɔwo 3:14.

Biblia gblɔ be: “Eyaŋuti mixɔ mia nɔewo, abe alesi Kristo hã xɔ mi ene hena Mawu ƒe kafukafu.” (Romatɔwo 15:7) To Mawu ƒe gbɔgbɔ ƒe kpekpeɖeŋu me la, Kristotɔwo ate ŋu atsɔ ŋuɖɔɖo ada asɔ le ɖekawɔwɔ me léle ɖe asi me agase vivi le amenyenye tɔxɛ vovovo si le amewo si le hamea me la me.

[Etenuŋɔŋlɔ]

[Nya si ɖe dzesi si le axa 14]

Wɔla la mebunɛ be ame gbogbo siwo si nɔnɔme ɖeka le ye amegbetɔƒomea me tɔwo katã nye o

[Nya si ɖe dzesi si le axa 15]

Nɔnɔme tɔxɛwo le mía dometɔ ɖesiaɖe si si gɔme mía ŋutɔwo kple mía Wɔla la koe te ŋu sena