Ŋkuléle Ðe Xexeame ŋu
Kɔmpuita dzi Fefe Gbegblẽwo
Reuters ka nya ta be Brazil ƒe Sedzikpɔkpɔ Dɔwɔƒe “xe mɔ ɖe kɔmpiuta dzi fefe madzegadzi si me wodoa fefelawo ɖe ŋgɔ ne wofi ʋu eye wowu kpovitɔwo la dzadzra nu.” Wobu fefea be “afɔku le eme elabena enaa adzodada kple amewuwu dzena nu tsɛe eye ate ŋu ana ɖevi siwo kpɔa gome le fefea me nazu ŋutasẽlawo.” Le ƒe 1997 me la dɔwɔƒea xe mɔ ɖe kɔmpiuta dzi fefe si me “wonaa teƒeɖoɖo ame ne wowu afɔzɔlawo, siwo me nyɔnu tsitsiwo kple funɔwo le la” nu. Procon si nye adzɔnuzãlawo ƒe gomenɔamesi habɔbɔ ƒe nyanuɖela gblɔ be: “Afɔku le fefe siawo ƒomevi me eye wogblẽa nu elabena wohea ŋutasẽnuwɔnawo vɛ. Ðeviwo megabua nuwɔna sia ƒomevi nugbegblẽe o.”
Atsiaƒu Ƒoɖiwo
Nyadzɔdzɔgbalẽ si nye Nassauische Neue Presse ka nya ta be: “Lãɖeɖe yakayaka, aɖitikewo, kple aɖiɖuɖɔ siwo wokɔ ɖe atsiaƒuwo me la agblẽ nu le nusiwo dzi agbe nɔ te ɖo le anyigba bliboa dzi la ŋu.” Nyadzɔdzɔgbalẽ si nye Kieler Nachrichten gblɔ be Black Sea koŋ ŋue wogblẽ nu le wu. Wobu be eyae nye nugbagbenɔƒe siwo ŋu wogblẽ nu le le xexeame katã la dometɔ ɖeka, elabena nuwo ku le eƒe memamã 90 le alafa me la me. Tsi gbegblẽ siwo gena ɖe ƒutsia me wɔe be tsi si tsana vaa Ukraine-ƒuta ƒe amadede zu gbemu kple gbeƒuƒu tɔ ƒomevi aɖe, eye kwasiɖa ɖeka koe woɖe mɔ amewo yi ƒuta le Odessa nutome le dzomeŋɔli si va yi me. Romaniatɔwo ƒe dukplɔla Emil Constantinescu gblɔ be: “Wogblẽ nu le Black Sea la ŋu gbidii. Ne míeɖe asi le eŋu wòku la, ke nusiwo wòagblẽ le mía ŋu la alolo wu alesi míesusui.” Dukɔ Ƒoƒuawo ɖe gbeƒã ƒe 1998 be enye “Atsiaƒu ƒe Ƒe na Dukɔwo.”
Atike Manyomanyowo
Le Figaro Magazine gblɔ be: “Atike siwo dzram wole le xexeame la ƒe alafa memamã si ade 8 menyo o.” Xexeame ƒe Lãmesẽhabɔbɔ gblɔ be wobu akɔnta be atike manyomanyo siwo wodzrana le Brazil ade alafa memamã 30, eye xexlẽme wɔmoyaa si wobu be wodzrana le Nigeria nye alafa memamã 60. Woka nya ta be wokpɔa dɔlar biliɔn 300 le atike manyomanyo sitsatsa me, eye hamenuvlowɔlawoe xɔ ŋgɔ le eme. Togbɔ be atikewɔhawo le agbagba dzem be yewoatsi asi sia tsatsa nu hã la, kpovitɔwo kple dukɔwo dome habɔbɔwo menya kuxia gbɔkpɔnu o. Dɔ nyui si ko atike manyomanyo ate ŋu awɔe nye be wòana woaɖe dzi ɖi asusu be wono atike aɖe; eye nu vloetɔe nye be wòawu ame. Le Figaro Magazine gblɔ be: “Atike manyomanyowo wua dɔnɔawo.”
Amewo Lɔ̃ Tu Tsɔtsɔ le United States
Agbalẽ si nye The Economist gblɔ be: “Vovototo gã aɖe le United States dukɔ kple dukɔ bubuwo dome. Le ƒe 1996 me la, wotsɔ tu wu ame eve le New Zealand, wowu ame 15 le Japan, ame 30 le Britain, 106 le Canada, 211 le Germany, eye wowu ame 9,390 le United States.” Wozãa tu le hlɔ̃ siwo wodona le United States ƒe sia ƒe si ade miliɔn afã la me, eye wotsɔe wu ame 35,000 siwo dome ameɖokuiwuwuwo kple nuɖiɖeamewo le. Magazinea gblɔ be ke hã la, amesiwo si tu le le United States “di be tuawo nanɔ yewo si, ne amewo gale kukum gɔ̃ hã. Le esi teƒe be woadi mɔ si dzi woato axe mɔ ɖe enu kura abe alesi dukɔ bubu geɖe wɔe ene la, azɔ boŋue wotsɔ dzo ɖe tu ƒeƒle ŋui.” Fifia nuto 31 na mɔɖegbalẽ amewo be woatsɔ tu si woate ŋu aɣla ɖe ŋui.
Tɔdzisasrã si Woti ɖe Yame Si Didi Wu le Xexeame
Esi woʋu Akashi Kaikyo Tɔdzisasrã si le Japan si tsiã Awaji Ƒukpo kple Kobe-dugã ɖe nu le April me la, enumake wodee nu ɖedzesiwo ƒe agbalẽ me be eyae nye tɔdzisasrã siwo woti ɖe yame si didi wu le xexeame. Time magazine gblɔ be: “Le ƒe ewo dɔ sia si xɔ dɔlar biliɔn 7.7 wɔwɔ me la, eƒe domedome—si nye dometsotso si le sɔti eve siwo le titina dome la—didi afɔ 6,532 (meta 1,991). Sɔtiawo dometɔ ɖesiaɖe kɔkɔ wu dziƒoxɔ dzisasrã 90, eye wode mɔ̃ 20 wo ŋu, siwo alé wo ɖe te ne nane dzɔ be woaʋã; ne ya sesẽwo ƒo eye tɔdzisasrãa le nyenyẽm la, mɔ̃awo nahe sɔtiawo aɖo wo nɔƒe.” Wotrɔ asi le tɔdzisasrãa ŋu ale be wòate ŋu anɔ te ɖe anyigbaʋuʋu si nu asẽ ade 8.0 le Richter ƒe nudzidzenu nu. Ne wotu waya siwo wotsɔ blae la, woadidi ate ŋu aƒo xlã anyigba la zi gbɔ zi adre.
Numiemie Siwo Ðo Afɔku Me
Esi numiemieŋutinunyalawo kple nutakpɔla siwo le xexeame katã tsɔ ƒe 20 wɔ dɔ vɔ megbe la, woƒo nya ta be numiemiemie hamehame 270,000 siwo wonya le xexeame la dometɔ 12.5 le alafa me—1 le 8 ɖesiaɖe me—ate ŋu atsrɔ̃ keŋkeŋ. The New York Times gblɔ be: “Dukɔ ɖeka ko mee woakpɔ numiemie siwo wode dzesii la dometɔ asieke le 10 ɖesiaɖe me le, esi wɔe be nu ate ŋu agblẽ le wo ŋu le dukɔa alo afima ƒe gadimɔnuwo kple hadomenyawo ta.” Dzɔdzɔmeŋutinunyalawo gblɔ susu eve siwo koŋ ta numiemiewo ɖoa afɔku me ɖo: (1) anyigbaa ƒe teƒe gãwo ŋɔŋlɔ hena du kekeɖenu, atitsotso, agbledede, kple (2) alesi numiemie siwo mele afima xoxo o va xɔa teƒea eye woxɔa nɔƒe le esiwo li xoxo si kura. Nyatia gblɔ be numiemiewo “nana dzɔdzɔmenuwo wɔna nyuie wu” lãwo kple xewo. Eyi edzi gblɔ le numiemiewo ŋu be: “Wokpena ɖe nugbagbe bubu akpa gãtɔ siwo dome amegbetɔwo hã le ŋu to alesi wozãa ɣe ƒe keklẽ tsɔ wɔa nuɖuɖui me. Wokpɔa atikewɔnuwo tsoa wo me eye woawo mee numiemiewo gakpɔa ŋusẽ le miena. Eye woawoe afia alesi anyigba la ƒe nɔnɔme anɔ, woawoe alé nu bubu ɖesiaɖe si adzɔ la ɖe te.”
Dɔxɔxɔ le Kɔdzi
Francetɔwo ƒe nyadzɔdzɔgbalẽ si nye Le Figaro gblɔ be: “Dɔléle si woxɔna toa atikewɔwɔ alo amekoko me le kɔdzi la nye kuxi ŋutɔŋutɔ le nu gblẽm le amewo ŋu.” Le France ɖeɖe dzaa la, ame 800,000 ye xɔa dɔ ƒe sia ƒe, eye wobu akɔnta be amesiwo kuna la ade ame 10,000. Woate ŋu awɔ nu geɖe si aɖe dɔxɔxɔa dzi akpɔtɔ: dɔlékuiwutikewo wuwu ɖe xɔwo me hafi dɔnɔ yeye ɖesiaɖe nava, egbɔ kpɔkpɔ be woɖa dɔwɔnu siwo wozã la nyuie, kple be woaklɔ asi nyuie hafi akpɔ dɔnɔ aɖe gbɔ. Edze ƒã be womeléa fɔ ɖe nuwɔna siawo dometɔ geɖe ŋu o. Numekuku aɖe si wowɔ le kɔ aɖe dzi le Paris ɖee fia be kɔdzidɔwɔla kpekpeɖeŋunala 72 le alafa me koe gblɔ be yewoklɔa asi ɣesiaɣi si yewokpɔ dɔnɔ gbɔ vɔ. Amesiawo dometɔ 60 le alafa me klɔa asi gake womeklɔnɛ nyuie o. Nyadzɔdzɔgbalẽa ƒo nya ta be alesi akɔntabubu siawo dziŋɔe ta la, “edze abe dɔ geɖe gakpɔtɔ li woawɔ ene.”
Zikpuimekawo Xɔa Ame Ðe Agbe le Yame.
Yamemɔzɔla kpɔnuteƒe ɖesiaɖe nyae be yameʋuwo ate ŋu ado go yame ƒe nɔnɔme sesẽ si womele mɔ kpɔm na o la kpata si ate ŋu awɔ nu vevi alo awu mɔzɔlaawo. Eŋutinunyalawo gblɔ be mɔ nyuitɔ kekeake si dzi nàte ŋu akpɔ ɖokuiwò ta le koe nye be nàbla zikpuimekawo ɣesiaɣi si nènɔ anyi le yameʋua me. U.S.News & World Report gblɔ be: “Esesẽ ne yame kɔ be woanya ne afɔku adzɔ, woakpɔe adze sii kaba, ahaƒo asa nɛ.” Esi dzɔdzɔmeŋutinunyalawo le agbagba dzem be yewoawɔ mɔ̃ siwo ana woakpɔ afɔku mawo adze sii la, yameʋu akpa gãtɔwo zɔna fifia ɖe nyatakaka siwo woxɔ tso yameʋu siwo do ŋgɔ na wo le mɔ ma ke dzi la dzi. Amesiwo katã kloe xɔ abi ne afɔkuwo dzɔ la nye amesiwo mebla zikpuimekawo o. Nyatia gblɔ be: “Gake yameʋumedɔwɔlawo menya alesi woawɔ azii ɖe mɔzɔlawo dzi be woabla zikpuimekaawo o.”
Zã Elektrikŋusẽ Nyuie
Nyadzɔdzɔgbalẽ si nye Apotheken Umschau ka nya ta be: “Mɔ̃ siwo le sisi ɖi gake womele wo zãm haɖe o ye zãa elektrikŋusẽ si wozãna le Germanytɔwo ƒe aƒewo kple dɔwɔƒewo ƒe alafa memamã 11.” Wobu akɔnta le Germany ŋu be televisionwo, radiowo, kɔmpiutawo, kple elektrikmɔ̃ bubu siwo wosina ɖi la zãa elektrikŋusẽ si ade kilowat biliɔn 20.5 ƒe sia ƒe. Esia sɔ gbɔ wu elektrikŋusẽ si wozãna le Berlin, si nye dukɔa ƒe du gãtɔ kekeake, ƒe sia ƒe. Àte ŋu akpɔ elektrikŋusẽ ta agaɖe ga si nègblẽna dzi akpɔtɔ ne ètsi mɔ̃ aɖewo keŋkeŋ tsɔ wu be nàgblẽ wo ɖi matsimatsii.
Ƒu Kukua le Miemiem
Ƒu Kukua, si nye anyigba la ƒe teƒe si le anyime wu eye dze le wu la ƒe tsiwo le miemiem kabakaba ale gbegbe. Le ƒe 1965 me la, Ƒu Kukua ƒe ɖɔɖɔme yi to meta 395 wu atsiaƒu. Fifia eɖiɖi ɖo meta 413 wu atsiaƒu, eye anyigba ƒuƒui sue aɖe le dzedzem si mã eme ɖe eve. Amedzrodzeƒe siwo wotu ɖe tsia nu megate ɖe tsia ŋu fifia kura o. Nyadzɔdzɔgbalẽ si nye The Dallas Morning News gblɔ be: “Wode dzesii be tsi si le eme la miena afɔ 2.5 ƒe sia ƒe, eye tsi aɖeke megatsoa afi aɖeke yina eme o le amewo ƒe nuwɔna kple dunyahehe ta. Alesi wòle dzedzemee be Ƒu Kukua amie keŋkeŋ la fia alesi gbegbe tsi le vevem vevie le nutoa mee, eye alesi womete ŋu le kuxia gbɔ kpɔm o fia be tsi kple ŋutifafa do ƒome le Titina Ɣedzeƒe si ƒu kplakplakpla la. . . . Egbea esusɔ vie . . . Israel, Syria kple Jordan natrɔ mɔ na Yordan Tɔsisia si nye afisi koŋ tsi tsona yia Ƒu Kukua me keŋkeŋ.” Nyatia gblɔ le Ƒu Kukua ƒe ŋutinya ŋu be: “Ŋutinya si wɔ dɔ ɖe ame dzi wu ɖesiaɖee nye Biblia ƒe nuŋlɔɖi si gblɔ alesi Du siwo le Gbegbe nɔ anyigba wɔnuwo dzi, vaseɖe esime woƒe agbe vlowo nɔnɔ wɔe be Mawu ‘na dzo kple dzokpe dza ɖe Sodom kple Gomora dzi’ eye wòtrɔ zu gbegbee.”