Kpekpe Ðe Sɔhɛwo Ŋu be Woasi le “Amewuwu ƒe Numamezuzu” Nu

Nuka gbɔe wòtso be sɔhɛ siwo li egbea va le vivi dom ɖe ku ŋu? Henry Hyde, si nye nuto si nye Illinois, U.S.A., teƒenɔla gblɔ be: “Nane bu ɖe sɔhɛ siawo le gbɔgbɔ me gome eye wotsɔ ku kple ŋutasesẽ ɖoa eteƒe.”

TIME xlẽla aɖe ŋlɔ be: “Dzila kuviatɔwo, modzakaɖeɖe si me ŋutasẽnuwɔnawo le, kple agbenyuinɔnɔ kple gbɔgbɔ me nufiame si kpɔm amewo mele o ye wɔe be amewuwu va zu numame na míaƒe sɔhɛwo egbea.”

Akogotsitsi hã nye nu vevi siwo le fu ɖem na ɖeviwo dometɔ ɖeka. Ðevi aɖewo le aƒe siwo me dzila evea siaa wɔa dɔ eye womenɔa aƒeme le ŋkekea ƒe akpa gãtɔ o me; dzila ɖeka koe le bubuwo ya si. Numekuku aɖe ɖee fia be le United States la, ƒewuivi aɖewo ɖeɖe nɔa anyi gaƒoƒo 3.5 gbesiagbe eye ɣeyiɣi si wo dzilawo nɔa wo gbɔ kwasiɖa ɖesiaɖe la ɖiɖi gaƒoƒo 11 wu ɖevi siwo nɔ anyi le ƒe 1960-awo me la tɔ. Le nyateƒe me la, ɖevi aɖewo mekpɔa hadede, alo seselelãme ŋusẽdoame aɖeke tso wo dzilawo gbɔ o.

Nusi Dzilawo Ate ŋu Awɔ

Le ‘gbɔgbɔmenu si bu’ ɖe sɔhɛ geɖe wole didim ta la, aleke gbegbee dzilawo ƒe wɔƒe le vevie? Dzila nyanuwo nya be le go aɖe me la, wo viwo hiã na modzakaɖeɖe ɖɔʋu, eye le go bubu me la, ehiã be woakpe ɖe wo dometɔ ɖesiaɖe ŋu edziedzi. Ne dzilawo tsɔ ɖe le eme na wo lɔlɔ̃tɔe la, woate ŋu aƒo nu kpli wo le ha, television dzi wɔna, video, agbalẽ, video dzi fefe, kple sinima siwo ƒomevi dzea wo ŋu la ŋuti. Togbɔ be ɖeviwo maɖee agblɔ o hã la, edzroa wo dometɔ geɖe vevie be yewo dzilawo nalɔ̃ yewo ahana mɔfiame yewo lɔlɔ̃tɔe. Wohiã na ŋuɖoɖo siwo le tẽ, elabena wole xexe si me nuwo metoa mɔ ɖeka le o me. Ele be ame tsitsiwo nase egɔme be nuwo trɔ le xexe si me ɖeviwo le egbea kura wu esi me woawo wonɔ le woƒe ɖevime.

Dzila siwo di be yewoakpɔ yewo viwo ta aɖo dze kpli wo edziedzi, aɖo to wo ŋutɔŋutɔ, eye woaxlɔ̃ nu wo le afɔku siwo le nusiwo va zu numamewo egbea ŋu. Ne dzilawo ɖo seɖoƒe kaŋ eye woƒe nuwɔnawo toa mɔ ɖeka, wowɔa nu le nunya me helɔ̃a wo viwo la, zi geɖe la, nu nyuiwo ado tso eme.—Mateo 5:37.

Dzila siwo nye Yehowa Ðasefowo dzea agbagba be yewoaɖo dze kple yewo viwo edziedzi, eye wozãa Biblia kple Biblia srɔ̃gbalẽwo kple videowo le ema wɔwɔ me.a Womezãa ɣeyiɣi mawo tsɔ kaa ŋkume na wo viwo o, ke boŋ be woatsɔ adzro nyati siwo tua ame ɖo le gbɔgbɔ me la me. Le ƒome ƒuƒoƒo siawo me la, woɖoa to sea kuxi alo gbetɔame siwo wo viawo dometɔ ɖesiaɖe doa goe ale be mɔnukpɔkpɔ sua ɖeviawo dometɔ ɖesiaɖe si be wòaxɔ kpekpeɖeŋu.

Sɔhɛ siwo mexɔa gbɔgbɔmemɔfiame aɖeke tso wo dzilawo gbɔ o ate ŋu akpɔ ŋusẽdoame tso Psalmo 27:10 me nyawo me, si gblɔ be: “Fofonye kple danye wogblẽm ɖi, ke Yehowa xɔm.” Aleke Yehowa si nye nublanuikpɔkpɔ Fofo la kpena ɖe ɖeviwo ŋui? Yehowa Ðasefowo ƒe hamewo nye sitsoƒe si ame geɖe va kpɔe le be ame bubuwo lɔ̃ yewo ale be kakaɖedzi va su wo si. Josías, si nye ɖekakpuivi si kpɔ nya ma ƒe nyateƒenyenye gblɔ be: “Yehowa ƒe habɔbɔa wɔa akpa vevi aɖe. Mesena le ɖokuinye me tsã be viɖe mele agbe ŋu o. Tameɖoɖo kple mɔkpɔkpɔ aɖeke menɔ nye agbe ŋu o. Nyanya be nyemetsi akogo o na nuwo trɔ le nye agbe me kura. Nɔvi siwo le hamea me va zu nye ƒome si mebu la. Hamemegãwo kple ƒome siwo le hamea me le abe seke ene le seselelãme gome.”

Le nyateƒe me la, sɔhɛ kple ame tsitsi geɖe va na woƒe susu me kple gbɔgbɔ me lãmesẽ nyo ɖe edzi to Yehowa Ðasefowo ƒe hamea ƒe kpekpewo dede edziedzi me. Amegbetɔŋutinunyala Patricia Fortuny, ƒo nu tso ŋusẽ nyui sia ŋu le eƒe nuŋɔŋlɔ si nye Los Testigos de Jehová: una alternativa religiosa para enfrentar el fin del milenio (Yehowa Ðasefowo: Subɔsubɔha si Naa Mɔfiame be Woatsɔ Akpe Akɔ Kple Ƒe Akpea ƒe Nuwuwui) me be: “Yehowa Ðasefowo fiaa ɖoɖo nyui si me kɔ si nu woanɔ agbe ɖo le gbesiagbegbenɔnɔ me, eye wonye gɔmeɖose siwo tututu fiaa mɔ ame le tamebubu kple nuwɔwɔ me.” Biblia dzie wotu “ɖoɖo nyui” kple “gɔmeɖose” siwo woyɔ le afisia la ɖo. Eyata togbɔ be Yehowa Ðasefowo doa go kuxi kple nuteɖeamedzi siwo ke woƒe nutoa me tɔwo doa goe hã la, nunya tɔxɛ si le blema gbalẽ ma me doa ŋusẽ wo. Ẽ, Biblia me nufiame kple gɔmeɖose siwo me kɔ la nyea sitsoƒe na Yehowa Ðasefowo.

Esime “Ku Maganɔ Anyi O”

Nufiame siwo wonana le Yehowa Ðasefowo ƒe Fiaɖuƒe Akpatawo me tea gbe ɖe xexeme yeye si ŋugbe Mawu do si ava kpuie la dzi zi geɖe, afisi “dzɔdzɔenyenye anɔ,” eye ‘ame aɖeke mado vɔvɔ̃ na wo o.’ (Petro II, 3:13; Mixa 4:4) Gawu la, nyagblɔɖila Yesaya ŋlɔe ɖi be Mawu “ami ku saɖagatsi tegbee, eye Aƒetɔ Yehowa atutu aɖatsi ɖa le ŋkuwo katã me.” Amegbetɔ gbãtɔ Adam ƒe nuvɔ̃e he ku va ƒu amegbetɔƒomea, gake Mawu do ŋugbe be madidi o “ku maganɔ anyi akpɔ o.”—Yesaya 25:8; Nyaɖeɖefia 21:3, 4; Romatɔwo 5:12.

Ne ènye sɔhɛ eye nèle kpekpeɖeŋu dim la, ke míele kpewòm be nàdzro Biblia me akpɔ mɔkpɔkpɔ kple tameɖoɖo siwo ŋu woanɔ agbe ɖo. To Yehowa Ðasefowo ƒe kpekpeɖeŋu dzi la, mɔkpɔkpɔ ate ŋu asu asiwò be ɣeyiɣi siwo anye nyuitɔwo kekeake kpɔtɔ le ŋgɔ na mí, le xexe yeye si ŋugbe Mawu do me.

[Etenuŋɔŋlɔ]

[Nɔnɔmetata si le axa 9]

Ele be dzilawo nadi ɣeyiɣi aɖo to wo viwo ahase woƒe kuxiwo gɔme

[Nɔnɔmetata siwo le axa 10]

“Yehowa Ðasefowo fiaa ɖoɖo nyui si me kɔ si nu woanɔ agbe ɖo le gbesiagbegbenɔnɔ me”