Ne Nya Vɔ̃ Aɖe Dzɔ

NYA vɔ̃ aɖe kokoko tua mía dometɔ ɖe sia ɖe kloe le agbe me. Etea ŋu dzɔna ɖe ame siwo dze kesinɔtɔwo gɔ̃ hã dzi.

BIBLIA GBLƆ BE:

“Duƒuƒu mele afɔ ɖablae me o, aʋawɔwɔ mele kalẽ me o, nuɖuɖukpɔkpɔ mele nunya me o, kesinɔnu mele ayedzedze me o, eye ŋudzedzekpɔkpɔ mele nugɔmesese me o, ke boŋ azãgbe kple nuɖiɖeame li na wo katã.”—Nyagblɔla 9:11.

Esi wònye be nya vɔ̃ aɖe kokoko tua mía dometɔ ɖe sia ɖe kloe ta la, nya si wòle be nàbiae nye be, ne edzɔ la aleke mawɔ anɔ te ɖe enu? Le kpɔɖeŋu me:

• Nu kae nàwɔ ne dzɔdzɔmefɔku aɖe dzɔ eye wò nunɔamesiwo katã dome gblẽ?

• Nu kae nàwɔ ne wokpɔ dɔléle vɔ̃ɖi aɖe le ŋuwò?

• Nu kae nàwɔ ne wò ame vevi aɖe ku?

Yehowa Ðasefowo, ame siwo nye magazine sia talawo, xɔe se be Biblia ate ŋu akpe ɖe ŋuwò nàdo dzi ne nya vɔ̃ dzɔ ɖe dziwò eye wòana hã be mɔkpɔkpɔ sẽŋu nanɔ asiwò. (Romatɔwo 15:4) Xlẽ nuteƒekpɔkpɔ etɔ̃ siwo gbɔna be nàkpɔ ale si esia anya wɔe la ɖa.