Wota agbalẽ gbadza si nye Srɔ̃ Nuxexlẽ Kple Nuŋɔŋlɔ miliɔn geɖe ɖe gbegbɔgblɔ siwo wu 100 me

Biblia Fiafiadɔ Le Kpekpem Ðe Amewo Ŋu Be Woasrɔ̃ Nuxexlẽ

“Nuxexlẽ kple nuŋɔŋlɔ nye amegbetɔ ƒe gomenɔamesi, enye dɔwɔnu si aɖe vi na ame ahakpe ɖe eŋu be wòakpɔ dzidzedze le hadomegbenɔnɔ me.”—UNESCO.a

NYATAKAKAWO ɖee fia be le xexea me godoo la, ame siwo wu miliɔn 700 siwo xɔ tso ƒe 15 heyi la, mate ŋu axlẽ nu alo aŋlɔ nu o. Esia wɔe be wometea ŋu xlẽa nyati gbogbo siwo le xexea me, kple esiwo ku ɖe agbe nyui nɔnɔ kpakple Mawu ŋuti sidzedze siwo woŋlɔ ɖe Biblia me be “woatsɔ afia nu mí” la ƒe ɖeke o. (Romatɔwo 15:4) Eya ta le dukɔ geɖewo me la, Yehowa Ðasefowo fiaa nuxexlẽ kple nuŋɔŋlɔ amewo tsɔ kpena ɖe Biblia fiafiadɔ si wɔm wole la ŋu, eye womexɔa ga ɖe esia ta o. Ðe esia le dzidzedze kpɔma?

Bu dɔ siwo wɔm Yehowa Ðasefowo le le Mexico, dukɔ si me wodoa Spaingbe le koŋ la ŋu kpɔ. Tso ƒe 1946 me la, Ðasefowo kpe ɖe ame siwo wu 152, 000 ŋu wosrɔ̃ nuxexlẽ kple nuŋɔŋlɔ, eye ame siawo dometɔ geɖe hã va zu nufialawo. Dziɖuɖua ŋlɔ lɛta geɖe na Ðasefoawo tsɔ ɖe ŋudzedzekpɔkpɔ fia ɖe dɔ nyui siwo wɔm wole la ŋu. Wogblɔ le lɛtaawo dometɔ ɖeka me be: “Dɔwɔƒe si kpɔa sukudenyawo dzi kpɔ ŋudzedze ɖe ale si miele kpekpem ɖe ame tsitsiwo ŋu be woasrɔ̃ nuxexlẽ la ŋu ŋutɔ, eye míele mia kafum ɖe esia ta.”

Ðoɖo sia ɖe vi na ɖeviwo kple tsitsiawo siaa. Le kpɔɖeŋu me, Josefina xɔ ƒe 101 hafi dze sukua dede gɔme, esrɔ̃ nuxexlẽ kple nuŋɔŋlɔ, eye wòwu sukua nu le ƒe eve megbe!

Togbɔ be Spaingbe koŋue wodona le Mexico hã la, menye gbe ma xexlẽ kple eŋɔŋlɔ ko fiam wole amewo o. Le ƒe 2013 me la, woto ɖoɖo sia ke dzi fia nuxexlẽ kple nuŋɔŋlɔ amewo le gbegbɔgblɔ enyi bubu siwo wodona le dukɔa me la me.

Nyateƒee, nuxexlẽ kple nuŋɔŋlɔ nye nu xɔasi aɖe si ʋua mɔnukpɔkpɔ na ame be wòasrɔ̃ nu geɖe. Ƒo wo katã ta la, nuxexlẽ kpena ɖe ame ƒomeviwo katã ŋu be woaxlẽ Biblia—agbalẽ si tso Mawu ƒe gbɔgbɔ me, si kpena ɖe amewo ŋu wovona tsoa aʋatsodzixɔsewo, subɔsubɔhawo ƒe alakpanufiafiawo kple nuwɔna siwo gblẽa ame ƒe agbe dome la si me.—Yohanes 8:32.

a Enye Dukɔ Ƒoƒuawo ƒe dɔwɔƒe si kpɔa agbalẽsɔsrɔ̃, dzɔdzɔmeŋutinunya, kple dekɔnunyawo gbɔ.

Eƒe Ƒomea Ƒe Nu Ku

Daniel tsɔ DVD srɔ̃ Mexicotɔwo ƒe tokunɔgbe

Daniel nye tokunɔ si metea ŋu ƒoa nu nyuie o. Le esia ta ne dzi kui ɣeaɖewoɣi la, ebluna ɖe ƒomea me tɔwo ta. Esi Daniel xɔ ƒe 23 la, Ðasefo tokunɔ aɖe si ŋkɔe nye Josué dze Biblia sɔsrɔ̃ gɔme kplii, gbã la, wotsɔ asi wɔa dzesiwo, eye wozãa nutatawo hã. Emegbe Daniel zã DVD-wo tsɔ srɔ̃ Mexicotɔwo ƒe tokunɔgbe.b

Esi Biblia ƒe nufiafiawo va nɔ dɔ wɔm ɖe Daniel ƒe dzi dzi la, eva tu nɔnɔme aɖewo siwo Biblia yɔ be “amenyenye yeye” la ɖo. Nɔnɔme siawo dometɔ aɖewoe nye “dɔmetɔtrɔ, dɔmenyonyo, ɖokuibɔbɔ, tufafa kple dzigbɔgbɔ blewu.” (Kolosetɔwo 3:10, 12) Daniel va te wɔwɔ ɖe Biblia ƒe mɔfiame si gblɔ be woaɖo to ame dzilawo ahade bubu wo ŋu la dzi. (Efesotɔwo 6:1, 2) Tɔtrɔ siwo wòwɔ la na be eƒe ƒomea ƒe nu ku! Aɖatsi lólo ɖe Daniel dada ƒe ŋku dzi wògblɔ na Josué be: “Akpe na wò be nèkpe ɖe vinyea ŋu wòva dze si Mawu.” Le ƒe 2007 me la, wonyrɔ Daniel wòzu Yehowa Ðasefo.

b Le Mexico la, Yehowa Ðasefowo ƒe agbalẽ 46 le DVD dzi le Mexicotɔwo ƒe tokunɔgbe me. Tokunɔgbe 80 sɔŋue le míaƒe nyatakakadzraɖoƒe si nye jw.org. Ŋkunɔwo ƒe agbalẽwo hã li si aɖe vi na ŋkunɔwo.