Ale Si Ame Tsitsiwo Ƒe Mɔfiame Le Vevie

NU KAE AME TSITSIWO ƑE MƆFIAME BIA?

Ðeviwo hiã na mɔfiame kple aɖaŋuɖoɖo tso ame tsitsiwo gbɔ. Esi nènye dzila ta la, wòe wòle be nàwɔ dɔ ma; le nyateƒe me la, wò agbae. Ke hã ame tsitsi bubuwo hã ate ŋu afia nu viwòwo.

NU KA TAE AME TSITSIWO ƑE MƆFIAME HIÃ?

Le dukɔ geɖe me la, ɖeviwo metea ŋu dea ha kple ame tsitsiwo o. Bu nya siawo ŋu kpɔ:

• Ðeviwo zãa ŋkekea ƒe akpa gãtɔ le suku, afi si sukuviwo sɔ gbɔ wu nufialawo kple ame tsitsi bubuwo le.

• Ne wokpa tso suku va aƒe me la, aƒea me tsia ƒuƒlu elabe wo dzilawo yi dɔ me.

• Numekuku aɖe si wowɔ le Amerika ɖee fia be ɖevi siwo xɔ tso ƒe 8 va se ɖe 12 zãa gaƒoƒo ade le mama dedie nu ɖe television, haƒoƒo kple video dzi fefewo ŋu gbe sia gbe.a

Agbalẽ aɖe (Hold On to Your Kids) gblɔ be: “Egbea ɖevi geɖe le tɔtrɔm ɖe wo hatiwo ŋu hena mɔfiame, wole wo hatiwo srɔ̃m eye woxɔa aɖaŋuɖoɖo le wo gbɔ tsɔ wu be woatrɔ ɖe dada, papa, nufialawo kple ame tsitsi bubuwo ŋu.”

ALE SI NÀFIA MƆ VIWÒ

Kpɔ vovo ɖe viwòwo ŋu.

BIBLIA ƑE MƆFIAME: “Mla ɖevi ɖe mɔ si wòato la ŋu; ne eva tsi hã mate ɖa le edzi o.”—Lododowo 22:6.

Le dzɔdzɔme nu la, ɖeviwo kpɔa mɔ be yewo dzilawo nafia mɔ yewo. Le nyateƒe me la, numekulawo gblɔ be ne ɖeviwo le sɔhɛme ɖom gɔ̃ hã, wodea asixɔxɔ wo dzilawo ƒe aɖaŋuɖoɖowo ŋu wu wo hatiwo tɔ. Agbalẽnyalagã Laurence Steinberg gblɔ le agbalẽ si nye You and Your Adolescent me be: “Dzilawo ƒe nya gakpɔa ŋusẽ ɖe wo viwo ƒe nɔnɔme kple nuwɔnawo dzi ne wole sɔhɛ me ɖom.” Egblɔ kpee be: “Sɔhɛwo dina be yewoanya nu si susum yewo dzilawo le, eye woɖoa to nya siwo wogblɔna nenye be womelɔ̃na ɖe wo katã dzi ɣesiaɣi o hã.”

Esi wònye be didi sia le wo me ta la, wɔ mɔnukpɔkpɔ ma ŋu dɔ. Kpɔ vovo ɖe viwòwo ŋu eye nàgblɔ wò susuwo, nu siwo ŋu nèdea asixɔxɔe kple wò nuteƒekpɔkpɔwo na wo.

Di ame tsitsi aɖe si viwòa ate ŋu asrɔ̃.

BIBLIA ƑE MƆFIAME: “Ame si zɔna kple nunyalawo la, adze nunya.”—Lododowo 13:20.

Ðe nènya ame tsitsi aɖe si ɖoa kpɔɖeŋu nyui si viwòa ate ŋu asrɔ̃a? Ne nenemae la, nu ka tae màwɔ ɖoɖo be viwòa nanɔ ha dem kplii o? Ke hã mègaɖe ta le agba si le dziwò abe dzila ene la te o. Gake dzideƒonamenya siwo ame tsitsi si dzi nèka ɖo, si nènya be magblẽ nu le ye via ŋu o, agblɔ na viwòa la, ate ŋu awɔ akpa vevi aɖe le hehe si nam nèlee me. Le Biblia me la, esi Timoteo tsi gɔ̃ hã la, ha si wòde kple apostolo Paulo ɖe vi nɛ ŋutɔ eye wòɖe vi na Paulo hã.—Filipitɔwo 2:20, 22.

Egbea megabɔ be ƒomewo nanɔ teƒe ɖeka kple wo tɔgbuiwo, mamawo, nyruiwo, tɔgãwo, tasiwo, nɔɖiwo kple ƒometɔ bubuwo o. Ne nenemae wòle le gowòme la, dze agbagba be nàna mɔnukpɔkpɔ viwò be wòade ha kple ame tsitsi siwo si nɔnɔme nyui siwo nàdi be woasu ye via si la le.