Di Nyateƒea

Kuxia

Zi geɖe la, alakpanya siwo amewo se ye nana wobua nazã. Bu alakpanya siawo dometɔ aɖewo ŋu kpɔ:

Dɔtɔ aɖewo xɔe se vodadatɔe be nyɔnuwo mate ŋu awɔ dɔ siwo bia ŋusẽ kple aɖaŋu geɖe o.
Le Europa, tso ƒe 500 va ɖo ƒe 1500-awo dome la, wotso Yudatɔwo nu alakpatɔe be wokɔ aɖi ɖe vudowo me eye wokaka dɔlékuiwo. Le Nazitɔwo ƒe dziɖuɣi la, wogatso Yudatɔwo nu alakpatɔe ake be woawoe na ganyawo sẽ le Germany. Nutsotso siawo wɔe be amewo va nɔ nazã bum ɖe Yudatɔwo ŋu ale gbegbe, eye ame aɖewo gabua nazã ɖe wo ŋu va se ɖe egbe.
Ame geɖe ƒoa nya ta vodadatɔe be ame sia ame si nye nuwɔametɔ la léa blanui alo doa dziku kabakaba.

Ame siwo xɔ alakpanya siawo dzi se la tea ŋu zãa kpɔɖeŋu aɖewo tsɔ ɖoa kpe woƒe nazãbubua dzi. Eye wosusuna be ame sia ame si melɔ̃ ɖe yewoƒe nyaa dzi o la mele ɖeke me sem o.

Nya Si Biblia Gblɔ

“Sidzedze ƒe ame si manɔmanɔ menyo o.”—LODODOWO 19:2.

Nu kae nya sia fia? Ne míenya nyateƒea o la, míatso nya me nyuie o. Ne míexɔ alakpanyawo dzi se le esi teƒe be míaxɔ nyateƒenyawo dzi asea, ana be míabu susu manyomanyo ɖe amewo ŋu.

Vi Kae Wòaɖe Ne Míenya Nyateƒea?

Ne míenya nyateƒe si ku ɖe amewo ŋu la, ke míaxɔ alakpanya siwo amewo agblɔ tso wo ŋu la dzi ase o. Eye ne míeva nya be alakpae nya aɖe si míese tso ƒuƒoƒo aɖe me tɔwo ŋu la nye la, ke míaxɔ nya sia nya si míase tso ƒuƒoƒo bubu aɖe ŋu dzi ase enumake o.

Agbemenudzɔdzɔ: Jovica (Balkan)

Esime Jovica, si ŋu nya míegblɔ le nyati siwo do ŋgɔ me nɔ tsitsim la, esenɛ wo detɔwo, nyadzɔdzɔwo, kple television dzi wɔnawo gblɔa nya manyomanyowo tso ame hatsotso aɖe si amewo mebuna ɖe naneke me o la ŋu. Jovica gblɔ be: “Ena meva nɔ nazã bum ɖe ame hatsotso mawo ŋu, eye melé fu wo kura gɔ̃ hã. Mesusui be esɔ be menɔ sesem le ɖokuinye me nenema.

“Gake esi meva zu asrafo la, eva hiã be manɔ ame hatsotso ma dometɔ aɖewo siwo hã nye asrafowo la dome awɔ dɔ kpli wo ɖekae. Le ɣeyiɣi aɖewo megbe la, meva srɔ̃ nu geɖe tso wo ŋu. Meva dze wo degbea gɔ̃ hã sɔsrɔ̃ gɔme, eye meɖoa to woƒe hawo. Wo dome nɔnɔ va nɔ nunye vivim, eye ale si mebua wo tsã la va trɔ. Ke hã, menya be nazãbubu ƒe seselelãmewo agate ŋu anyɔ ɖe menye. Eya ta meƒoa asa na nyadzɔdzɔ siwo ƒoa nu gbegblẽ tso wo ŋu la sese. Azɔ hã, nyemekpɔa video alo fefe siwo amewo wɔna tsɔ ɖea alɔme le wo ŋu la o. Menya be nazãbubu ate ŋu ahe dzikudodo kple fuléle vɛ.”

Nu Si Nàte Ŋu Awɔ

Amewo ate ŋu agblɔ nya gbegblẽwo tso ƒuƒoƒo aɖe me tɔwo ŋu, gake ɖo ŋku edzi be menye ame sia ame si le ƒuƒoƒo ma mee le nenema o.
Lɔ̃ ɖe edzi be menye nya sia nyae yenya tso amewo ŋu o.
Dze agbagba nàdi nyateƒea le nyatakakatsoƒe si ŋu kakaɖedzi le.