NU SIWO NÀWƆ NE NUWO LE ASI XƆM
Lɔ̃ Ðe Edzi Be Nuwo Trɔ
Ne nuwo ƒe asi le dzi yim vivivi la, ɖewohĩ asesẽ be míade dzesii, vevietɔ ne wodana ɖe míaƒe fetu hã dzi. Gake ne nuwo ƒe asi yi dzi bobobo, evɔ womeda ɖe míaƒe fetu dzi o alo ga si míekpɔna tso dɔ si míewɔna me mede naneke o la, esia ate ŋu ana míatsi dzimaɖi eye nu nate ɖe mía dzi, vevietɔ ne ƒome le mía si.
Míate ŋu awɔ naneke atsɔ atɔ te ale si nuwo le asi xɔmee o. Gake ne míelɔ̃ ɖe edzi be nenemae nuwo le fifia la, ade mía dzi ŋutɔ.
NU SI TAE WÒLE VEVIE
Enɔa bɔbɔe na ame siwo lɔ̃ ɖe edzi be nuwo le asi xɔm la be . . .
woaɖe dzi ɖi. Esia wɔnɛ be wobua nuwo ŋu nyuie hetsoa nya me nyuie.
woaƒo asa na nuwɔna siwo made ame dzi o. Le kpɔɖeŋu me, nunya manɔ eme be míagbe fe siwo le mía ŋu la xexe alo azã ga yakayaka o.
woaƒo asa na nyahehe kple ƒometɔwo ɖe ga ta.
woade dzesi nu siwo woate ŋu awɔ tso nɔnɔmea ŋu, le kpɔɖeŋu me, woagbugbɔ ŋku alé ɖe woƒe gazazãwo ŋu eye woazã ga ɖe nu siwo le vevie wu ŋu.
NU SI NÀTE ŊU AWƆ
Lɔ̃ faa be yeatrɔ ɖe nɔnɔmea ŋu. Ne nuwo ƒe asi le dzi yim kabakaba la, nunya anɔ eme be míaɖiɖi míaƒe gazazã dzi akpɔtɔ ne anya wɔ. Ame aɖewo dzea agbagba be yewoanɔ agbe si bia be woazã ga geɖe wu esi le wo si; esia le ko abe ale si ame aɖe natsɔ tɔkpo gbagbã anɔ tsi dum le vudo goglo aɖe me ene! Mlɔeba, ɖeko nu tia kɔ na wo dzodzro. Azɔ hã, ne ƒome le asiwò la, ke ànya tsi dzi ɖe ale si nàkpɔ woawo hã ƒe nuhiahiãwo gbɔ ŋu, eye esɔ nenema. Ke hã, ɖo ŋku edzi be: Nu si wò ƒomea me tɔwo hiã wu nu bubu ɖe sia ɖee nye be nàlɔ̃ wo ahakpɔ vovo ɖe wo ŋu.
Agbagbadzedze be míanɔ agbe si bia be míazã ga geɖe wu esi le mía si la le ko abe ale si ame aɖe natsɔ tɔkpo gbagbã anɔ tsi dum le vudo goglo aɖe me ene