Sikanyivi La

OO! OO! Nukae nye si wɔm ameawo le azɔ? Wole gbe dom ɖa na nyivi! Nukatae wole nusia wɔm?

Esi Mose tsi toa dzi eteƒe didi la, ameawo gblɔ be: ‘Míenya nusi dzɔ ɖe Mose dzi o. Eyata mina míawɔ mawu aɖe, si akplɔ mí tso anyigba sia dzi.’

Mose nɔvi Aron gblɔ be: ‘Yoo. Miɖe miaƒe togɛwo vɛ nam.’ Esi woɖee la, Aron lólo wo hetsɔ wɔ sikanyivie. Eye ameawo gblɔ be: ‘Esia nye míaƒe Mawu, si kplɔ mí tso Egipte!’ Israel-viwo tu aglo gã aɖe hede ta agu na sikanyivi la.

Esi Yehowa kpɔe la, edo dziku ŋutɔ. Eyata egblɔ na Mose be: ‘Ðe abla nàyi. Ameawo le nu vlo wɔm. Woŋlɔ nye seawo be hele ta dem agu na sikanyivi.’

Mose ɖe abla heɖi tso to la dzi. Esi wòte ɖe wo ŋu la, nusi wòkpɔ enye si. Ameawo le ha dzim le ɣe ɖum ƒo xlã sikanyivi la! Dzi ku Mose ale gbegbe be wòtsɔ kpe gbadza eve, siwo dzi seawo le la xlã ɖi, eye wogbã kakɛkakɛe. Etsɔ sikanyivi la helóloe. Eye wòtui wòzu wɔ.

Ameawo wɔ nu vɔ̃ɖi ŋutɔ. Eyata Mose gblɔ na ŋutsu aɖewo be woatsɔ woƒe yiwo. Mose gblɔ be: ‘Miwu ame vɔ̃ɖi, siwo de ta agu na sikanyivi la.’ Eyata ŋutsuawo wu ame 3,000! Ðe esia mefia be ehiã be míakpɔ nyuie ahasubɔ Yehowa ɖeɖeko, eye menye alakpamawu bubu aɖeke oa?