Agbenɔnɔ Ƒe Gɔmeɖose Siwo Dzi Míewɔna Ðo

Yehowa Dasefowo xɔe se be agbe nyui nɔnɔ ŋuti nukpɔsusu siwo trɔ vevie la kpɔ ŋusẽ gbegblẽ ɖe sɔhɛwo dzi. Abe alesi nenyae ene la, yeaɖi agbe yeye va xɔ aƒe ɖi tso ƒe 1960 ƒe ƒeawo me. Ame gbãtɔ siwo de esia dzi la dometɔ ɖeka si nye England ƒe Woolwich ƒe Bisiɔp la gblɔ be: “Womate ŋu ayɔ naneke le eɖokui si be ‘nu gbegblẽ’ o.” Míelɔ̃ ɖe ema dzi o, gake míedi be míana eme nakɔ be míedi be míaʋli nya kple amesiwo lɔ̃ ɖe edzi la o. Ðeko míedi be míaɖe agbenyuinɔnɔ ƒe gɔmeɖose siwo dzi míewɔna ɖo kple nusitae la me.

Joseph Fletcher si nye mawuŋunufiala xɔŋkɔ aɖe le United States la gblɔ le agbe yeyea ŋuti be: “Nu gobii aɖeke mele agbenɔnɔ ƒe gɔmeɖose sia me si tsi tre ɖe dɔdɔ kple ame bubu le srɔ̃wò megbe ŋu o, eye le go aɖewo me la enyo.” Eye Frederic C. Wood si nye mawunyafialagã ƒe kpeɖeŋutɔ le United States la ɖe eme na nusrɔ̃viwo be: “Se aɖeke mele gbɔdɔdɔ ŋu o. Magagblɔe ake: se aɖeke o. Naneke meli si wòle be nawɔ, alo mele be nawɔ o.”—Theology Today, October 1965, axa 396.

Togbɔ be agbenɔnɔ ŋuti nukpɔsusu mawo anɔ ame geɖe si hã la, Yehowa Ðasefowo bua wo be wotsi tre ɖe Biblia ŋu eyata womenyo o. Míaƒe nɔnɔme si nɔ te ɖe Biblia dzi la dze le míaƒe ƒe 1976 ƒe agbalẽ Your Youth—Getting the Best out of It si dzro alesi agbenyuinɔnɔ ƒe gɔmeɖosewo wɔa dɔ ɖe míaƒe agbenɔnɔ dzie me la me. Esi numekula aɖe na sukuvi 100 siwo xɔ tso ƒe 12 vaseɖe 19 dzro eme vɔ la, eŋlɔ ɖeklemiɖenya sia be: “Agbenɔnɔ ƒe dzidzenu siwo le abe esiwo mieŋlɔ ɖe miaƒe agbalẽa me ene la anya wɔ dɔ ɣeaɖeɣi, gake nyemeka ɖe edzi be woawɔ dɔ fifia o. Dzidzime sia ʋu ŋku wu bubu ɖesiaɖe.”

Gake medze abe agbenɔnɔ ƒe dzidzenu yeyeawo na sɔhɛwo “ʋu ŋku wu” ene na mí o. Le nyitsɔ laa ƒe numekuku aɖe si wowɔ le sɔhɛ 160,000 kple vɔ siwo xɔ tso ƒe 13 vaseɖe 15 ŋu me la, ŋutsuvi 41 le alafa ɖesiaɖe me kple nyɔnuvi 21 le alafa ɖesiaɖe me kpɔ gome le gbɔdɔdɔ me. Eye le amesiwo xɔ tso ƒe 16 vaseɖe 18 dome la, ŋutsuvi etɔ̃ le ene ɖesiaɖe me kple nyɔnuviawo ƒe afã kloe wɔ esia. Gake nukae nye emetsonuawo?

Ƒewuiviwo ƒe fufɔfɔ si kaka ɖie. Nyɔnuvi ƒewuivi ɖeka le ewo ɖesiaɖe me le United States fɔa fu ƒe ɖesiaɖe—esi nye 1,250,000 ƒe ɖesiaɖe. Amesiawo dometɔ 600,000 kloe dzia via—mamleawo ɖea fua. Azɔ hã ƒe sia ƒe la sɔhɛ miliɔn geɖe lɔa nu, esi ŋu herpes dziŋɔ la kpe ɖo. Eyata míexɔe se be gɔmesese nyui li si ta míabu hadomenɔnɔme siawo abe ‘ŋkuʋuʋu’ ƒe emetsonu ene o.

Agbenɔnɔ ƒe Gɔmeɖose Nyuiwo

Tɔtɔ geɖe li ku ɖe agbenɔnɔ ƒe gɔmeɖose si woafia sɔhɛwo la ŋu. Zi geɖe la nufialawo xaa nu le esia ŋuti nufiafia si me kɔ si meli o la ŋu. Míekpɔe dze sii be nufiala aɖewo di be ablɔɖe geɖe wu nanɔ yewo si be yewoafia yewoƒe sukuviawo agbenɔnɔ ƒe gɔmeɖose nyui siwo le Biblia me la hafi. Abe Yehowa Ðasefowo ene la, míexɔe se anukwaretɔe be Biblia ƒe nufiafia si ku ɖe agbenyuinɔnɔ ŋu la kpɔa ŋusẽ nyui ŋutɔ ɖe ame dzi.

Dzila Ðasefowo dzea Biblia ƒe agbenyuinɔnɔ ƒe gɔmeɖosewo fiafia wo viwo gɔme kaba, eye zi geɖe la wowɔa Your Youth—Getting the Best out of It ŋudɔ abe nufiagbalẽ ene. Ne èlɔ̃ la, adzɔ dzi na wò sukuvi Ðasefoawo dometɔ ɖeka be wòana ɖeka wò. Ana nanya agbenɔnɔ ƒe gɔmeɖose siwo dzi míewɔna ɖo, eye wòana numeɖeɖe geɖe wò ku ɖe míaƒe nukpɔsusu le nya siwo gbɔna ŋu la ŋuti.

Gbɔdɔdɔ Do Ŋgɔ na Srɔ̃ɖeɖe: Míexɔe se be gbɔdɔdɔ ɖesiaɖe do ŋgɔ na srɔ̃ɖeɖe, esi nye matrewɔwɔ la, menyo o; enye agbegbegblẽnɔnɔ. Biblia de se be: “Misi le ahasiwɔwɔ nu!” (Korintotɔwo I, 6:18) “Miaɖe mia ɖokui ɖa atso ahasiwɔwɔ me.” (Tesalonikatɔwo I, 4:3) Míaƒe nukpɔsusue nye be gbɔdɔdɔ do ŋgɔ na srɔ̃ɖeɖe nye nuvɔ̃ gã aɖe wɔwɔ ɖe Mawu ŋu. Ŋɔŋlɔawo gblɔ be, “Ahasiwɔlawo kple matrewɔlawo la, Mawu adrɔ̃ ʋɔnu wo.”—Hebritɔwo 13:4; Nyaɖeɖefia 21:8.

Vidzinu Ðeka Tɔgbe tɔwo ƒe Gbɔdɔdɔ: Míexɔe se hã be vidzinu ɖeka tɔgbe tɔwo ƒe gbɔdɔdɔ nye agbe gbegblẽ. De dzesi nusi Biblia gblɔ ku ɖe nyɔnu siwo dɔna kple nyɔnuwo kple ŋutsu siwo dɔna kple ŋutsuwo siaa ŋu la: “Mawu tsɔ wo de asi na ahɔhlɔ̃bɔbɔ yomenɔnɔ; elabena woƒe nyɔnuwo tsɔ dzɔdzɔme ƒe kɔnu wɔ nusi mele dzɔdzɔme nu o; nenema ke woƒe ŋutsuwo hã gblẽ nyɔnuwo ƒe dzɔdzɔmekɔnu ɖi, eye wofiã le woƒe fiẽŋufiẽŋui me ɖe wo nɔewo ŋu, eye ŋutsu kple ŋutsu wɔ ŋukpenanuwo.”—Romatɔwo 1:26, 27; Korintotɔwo I, 6:9-11.

Aha Muamewo: Aha muamewo nye nuɖuɖuwo, eye ne wozã wo nyuie la viɖe ate ŋu anɔ wo ŋu. (Psalmo 104:14, 15; Timoteo I, 5:23) Gake woate ŋu awɔ wo ŋudɔ ɖe mɔ gbegblẽ nu, eye zi geɖe la wowɔnɛ nenema. Míexɔe se be abe alesi Biblia te gbe ɖe edzi ene la, wo nono fũ akpa nye agbegbegblẽnɔnɔ gã aɖe. (Lododowo 20:1; 23:29-35; Korintotɔwo I, 6:9, 10) Míedea bubu ŋusẽtɔ siwo dea se be woatsɔ aɖo asi sɔhɛwo ƒe aha muame zazã dzi la ƒe nunya ŋu, eye míewɔa nu ɖe se siawo nu.

Atikewo: Míezãna atike siwo zazã mãna ame eye wòtsia ame si, abe gbe sesẽ, heroin, cocaine, LSD, betel-ne kple atama ene, ne míayɔ ʋee aɖewo ko, la o. Yehowa Ðasefowo xɔe se be menyo be le ɖokuitɔdidi ƒe vivisese ta yewoatsɔ nusiwo zua nu mãme alo trɔa susu la agblẽ yewoƒe ŋutilã o, elabena Biblia de dzi ƒo be: “Mina míakɔ mía ɖokui ŋuti tso ŋutilã . . . ƒe ɖiƒoƒo sia ɖiƒoƒo me.”—Korintotɔwo II, 7:1.

Yakanyawo: Míebuna yakanyawo gbɔgblɔ be mesɔ o; womesɔ kple Biblia ƒe sedede be, “Ahasiwɔwɔ kple makɔmakɔnyenye katã alo ŋukeklẽ la womagayɔ eŋkɔ gɔ̃ hã le mia dome o, . . . kple yakanyagbɔgblɔwo kple atsaƒoƒo, siwo medze o” la o.—Efesotɔwo 5:3, 4.

Bubu dede Ŋusẽ Ŋu: Le Biblia ƒe gɔmeɖosewo nu la míekpɔa mɔ be míaƒe sɔhɛwo nade bubu ŋusẽ siwo katã woɖo ɖi ŋu, esi lɔ sukunufialawo hã ɖe eme. (Romatɔwo 13:1-7; Petro I, 2:13-17) Yehowa Mawu, amesi míefiaa mía viwo be woatsɔ bubu deto na la gblɔ be ele be míaɖi anukware, ato nyateƒe ahatsɔ ɖe le eme na ame bubuwo.—Hebritɔwo 13:18; Kolosetɔwo 3:9; Efesotɔwo 4:25; Mateo 7:12.

Biblia ƒe Gɔmeɖosewo ƒe Asixɔxɔ

Míekpɔe be wɔwɔ ɖe Biblia ƒe agbenyuinɔnɔ ƒe gɔmeɖosewo dzi na míaƒe amewo ƒe agbenɔnɔ nyo ɖe edzi ŋutɔ. Togbɔ be kuxiwo ɖea fu na míawo hã eye mía viwo mede blibo o hã la, mía dome ame akpa gãtɔ vo tso nu gbegblẽwo abe fififi, aʋatsokaka, amebaba kple nuvevi wɔwɔ ame bubuwo ene me. Zi alesi mía kple mía viwo míewɔ ɖe Mawu ƒe sewo dzi la, zi nenema kee nulɔdɔwo, vidada siwo meɖe srɔ̃ o, tɔmanɔsiviwo kple fuwo ɖeɖe kpakple dzigbagbã kple dzitsinya ƒe fuɖename meɖea fu na mí o. Míexɔe se be Amerika ƒe dukplɔla gbãtɔawo dometɔ ɖeka si nye John Adams la ƒe nya sɔ esime wòyɔ Biblia be “agbalẽ nyuitɔ kekeake le xexeame.” Míexɔe se hã be Dukplɔla Abraham Lincoln ƒe nya sɔ esime wògblɔ be ne èxɔ Biblia dzi se la “ànye ame nyui wu ahakpɔ dzidzɔ wu le agbe me hafi aku.”

Gake abe alesi nenyae ene la, ɖeviwo ƒe hatiwo ƒonɛ ɖe wo nu fũ ŋutɔ be woawɔ nusi ŋu Biblia ɖo aɖaŋu tsi tre ɖo, esi nye be ‘woaƒu du kpli yewo ayi ɖe nu vlo wɔwɔ ƒe ba me.’ Eye ne wo dometɔ aɖewo gbe la, ‘ewɔa yaa na ame bubuawo, eye woyia edzi gblɔa busunyawo ɖe wo ŋu.’ (Petro I, 4:4) Ɣeaɖewoɣi la woɖua fewu le mía viwo ŋu hekoa wo kura gɔ̃ hã le esi womekpɔa gome le nuwɔnawo abe gbɔdɔdɔ do ŋgɔ na srɔ̃ɖeɖe ene me o ta. Eyata míekpɔa ŋudzedze ɖe eŋu ne nufialawo de mía viwo ƒe agbagbadzedze be yewoawɔ ɖe Biblia ƒe gɔmeɖosewo dzi la dzi eye woto ema dzi de dzi ƒo na mía vi siwo le agbagba dzem be yewoanɔ agbe ɖe gɔmeɖose siawo nu la.

Àkpɔe be míaƒe sɔhɛwo mesena le wo ɖokui me be nane le yewo ŋu tsim le Biblia ƒe agbenyuinɔnɔ ƒe sededewo ta o. Ke boŋ esime sɔhɛ Ðasefo aɖe tsɔ eƒe agbe nɔ sɔsɔm kple eƒe sukuhatiwo tɔ la, egblɔ be: “Nusi tsi ŋunye koe nye kuxi geɖe.” Le míaƒe nukpɔkpɔ nu la, míaƒe takpɔkpɔ tae Mawu Ŋusẽkatãtɔ ƒe nudidiawo li ɖo, eye viɖe sɔŋ koe míekpɔna tso wɔwɔ ɖe wo dzi me.—Psalmo 19:8-12.

[Nya si ɖe dzesi si le axa 11]

‘Ne èxɔ Biblia dzi se la anye ame nyui wu ahakpɔ dzidzɔ wu le agbe me hafi aku.’—Abraham Lincoln

[Nɔnɔmetata si le axa 8]

Agbalẽ si dzroa alesi agbenyuinɔnɔ ƒe gɔmeɖosewo lɔa agbenɔnɔ ɖe emee la me. Dzila Ðasefowo tsɔnɛ fiaa nu wo viwo

[Nɔnɔmetataŋunya si le axa 9]

Nusi kpe ɖe agbe yeyea ŋu va ye nye hadomekuxiwo ƒe dzidziɖedzi

Dzila Ðasefowo dzea Biblia ƒe agbenyuinɔnɔ ƒe gɔmeɖosewo fiafia wo viwo gɔme kaba