Akpa 7
Nukae Do Tso Aglãdzedze La Me?
1-3. Aleke ɣeyiɣiwo ƒe yiyi ɖo kpe edzi be nyateƒee Yehowa to?
LE MAWU ƒe gome be wòaɖu dzi ƒe nyaʋiʋlia me la, nukae do tso ƒe alafa gbogbo siawo siwo amegbetɔwo tsɔ ɖu dzi Mawu manɔmee la me? Ðe amegbetɔwo nya dzi ɖuɖu wu Mawua? Ne míetsɔ amegbetɔ ƒe ŋutasesẽ le nɔvia amegbetɔ ŋu bu eŋui la, míakpɔe kɔte be menyo wu kura o.
2 Esi mía dzila gbãtɔwo gbe Mawu ƒe dziɖuɖu la, afɔkue tso eme. Wohe fukpekpe va wo ɖokui kple amegbetɔƒome si wodzi la dzi. Eye womate ŋu ada vodada la ɖe ame aɖeke dzi wu woawo ŋutɔwo ɖokui dzi o. Mawu ƒe Nya la gblɔ be: “Wowɔ nu tovo ɖe eŋu, ŋukpenanu wonye, eye womenye viawo o; dzidzime baɖa kple ame gbegblẽwo wonye!”—Mose V, 32:5.
3 Ŋutinya ɖo kpe alesi Mawu gbe nya na Adam kple Xawa be ne woɖe wo ɖokui ɖa le Mawu ƒe mɔnuɖoɖowo te la, nu anɔ gbegblẽm le wo ŋu ʋuu vaseɖe esime woaku kura mlɔeba la ƒe nyateƒenyenye dzi. (Mose I, 2:17; 3:19) Woɖe wo ɖokui ɖa le Mawu ƒe dziɖuɖu te nyateƒe, eye esi ɣeyiɣiawo va le yiyim la, nu gblẽ le wo ŋu eye woku.
4. Nukatae wodzi mí katã blibomadelawoe eye míedzea dɔ kuna?
4 Nusi dzɔ ɖe woƒe dzidzimeviwo katã dzi emegbe la le abe alesi Romatɔwo 5:12 ɖe emee ene be: “To ame ɖeka [Adam, ameƒomea katã ƒe ƒomefofo] dzi nuvɔ̃ la va xexeame, eye to nuvɔ̃ me ku la va, eye nenema ku la va to amewo katã dzi yi.” Eyata esi mía dzila gbãtɔwo dze aglã ɖe Mawu ƒe dzikpɔkpɔ ŋu la, wozu nuvɔ̃me siwo ŋu gbegblẽƒe va ɖo. Abe alesi wòle le vidzidzi ƒe domenyinyisewo mee ene la, blibomademade si me woge ɖo la koe woate ŋu atsɔ adzi wo viwoe. Eyatae wodzi mí katã ɖe vodada me ɖo, eye míedzea dɔ kuna.
5, 6. Nukae ŋutinya ɖe fia ku ɖe agbagba siwo amegbetɔ dze be yeahe ŋutifafa kple nudzedziname vavãtɔ vɛ la ŋu?
5 Ƒe alafa geɖe tso eme va yi. Fiaɖuƒe gãgãwo nɔ anyi kpɔ eye wo nu va yi. Wote dziɖuɖu ƒomevi ɖesiaɖe si va susu me na ame kpɔ. Gake nu dziŋɔwo dzɔ ɖe amegbetɔƒomea dzi zi gbɔ zi geɖe. Le ƒe akpe ade megbe la, àsusu be amegbetɔwo ayi ŋgɔ aɖo afisi woahe ŋutifafa, dzɔdzɔenyenye, kple nudzedziname ava anyigba la katã dzii eye fifia nɔnɔme nyui siwo nye dɔmenyonyo, veveseseɖeamenu, kple ɖekawɔwɔ nanɔ wo dome.
6 Nusi to vovo na ema tututu boŋ ye dzɔ. Dziɖuɖu siwo amegbetɔwo to vɛ dometɔ aɖeke mehe ŋutifafa kple nudzedziname vavãtɔ vɛ na amesiame o. Le ƒe alafa 20 lia sia ɖeɖe me la, míekpɔ alesi woɖoe wu ame miliɔn geɖe le Nazitɔwo ƒe Ametsɔtsrɔ̃gã la me kple le ame miliɔn 100 kple edzivɔwo wuwu le aʋawɔwɔwo me la teƒe. Le míaƒe ɣeyiɣia me la, wowɔ funyafunya ame gbogbo aɖewo, wowu ɖewo, eye wode bubuwo game le ŋutasesẽ kple dunyahehenukpɔsusu ƒe vovototo ta.
Alesi Nuwo Le Egbea
7. Nukae míate ŋu agblɔ tso nɔnɔme si me ameƒomea le egbea la ŋu?
7 Hekpe ɖe emawo ŋu la, bu nɔnɔme si me amegbetɔƒomea le egbea la katã ŋu kpɔ. Nuvlowɔwɔ kple ŋutasesẽ bɔ. Atike vɔ̃ɖiwo zazã xɔ aƒe ɖi. Dɔ siwo woxɔna le gbɔdɔdɔ ƒe agbegbegblẽnɔnɔ me kaka ɖe afisiafi. AIDS dɔvɔ̃ si dzia ŋɔ na ame le nu gblẽm le ame miliɔn geɖewo ŋu. Dɔwuame kple dɔléle wua ame miliɔn geɖe ƒe sia ƒe, evɔ kesinɔnuwo yɔ aƒe gbagba na ame ʋee aɖewo. Amegbetɔwo le ɖi ƒom anyigba la eye wole eƒe kesinɔnuwo dome gblẽm asitsɔtsɔe. Ƒomegbenɔnɔ kple agbenyuinɔnɔ me gblẽ le afisiafi. Le nyateƒe me la, alesi Satana, “xexe sia me mawu la” ƒe dziɖuɖu vɔ̃ɖii la dzena le alesi amewo ƒe agbenɔnɔ le egbea me. Xexe si dzi wòɖu aƒetɔ ɖo la nye vevemasemaseɖeamenu kple nublanuimakpɔmakpɔ ƒe xexe, eye eƒe afisiafi ƒaƒã keŋkeŋ.—Korintotɔwo II, 4:4.
8. Nukatae míate ŋu ayɔ nusiwo ameƒomea wɔ la be ŋgɔyiyi akuakua o?
8 Mawu ɖe mɔ ɖe ɣeyiɣi si didi nyuie ŋu na amegbetɔwo be woaɖo woƒe dzɔdzɔmeŋutinunya kple ŋutilãmeŋgɔyiyi ƒe kɔkɔƒe kekeake. Gake ɖe woayɔe be ŋgɔyiyi ŋutɔŋutɔ, esi tu siwo dana tre ɖe enu, aʋawɔʋuwo, bɔmbdayameʋuwo, kple nukliaɖituwo va xɔ ɖe da kple dati teƒea? Ŋgɔyiyie wònye be amewo nate ŋu ayi yamenutome gake womate ŋu anɔ ŋutifafa me kple wo nɔewo le anyigba dzi oa? Ŋgɔyiyie wònye esi amewo le vɔvɔ̃m na ablɔdzi zɔzɔ le zã me, alo le ŋkeke me gɔ̃ hã le teƒe aɖewoa?
Nusi Ɣeyiɣiawo Ðe Fia
9, 10. (a) Nukae ƒe alafa siwo va yi la ɖe fia kɔte? (b) Nukatae Mawu maxɔ lɔlɔ̃nu faa ƒe ablɔɖe le ame si o?
9 Nusi va dze le ƒe alafawo mee nye be amegbetɔwo mate ŋu afia mɔ woƒe afɔɖeɖe Mawu manɔmee wòadze edzi o. Alesi womate ŋu anɔ anyi numaɖumaɖui, tsimanomanoe, kple yamagbɔmagbɔe aganɔ agbe o la, nenema ke womate ŋu awɔ nusiawo hãe o. Ðaseɖiɖia me kɔ kɔte: Ðe wowɔ mí be míanɔ agbe ɖe Wɔla la ƒe mɔfiafia nu abe alesi tututu wowɔ mí be míanɔ agbe ɖe nuɖuɖu, tsi, kple ya ŋui ene.
10 Esi Mawu ɖe mɔ vɔ̃ɖinyenye li la, ena nɔnɔme wɔnublanui siwo ablɔɖe mazãmazã nyuie hena vɛ la dze wokpɔ zi ɖeka ɖe ɣeyiɣiawo katã nu. Eye tiatia faa ƒe ablɔɖe nye nunana xɔasi ale gbegbe be le esi Mawu naxɔe le amewo si teƒe la, eɖe mɔ na wo be woakpɔ nusi eŋudɔ mawɔmawɔ nyuie hena vɛ la teƒe. Nyateƒee Mawu ƒe Nya la to esi wògblɔ be: “Amegbetɔ ƒe mɔ kple ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” Egato nyateƒe esi wògblɔ be: “Amegbetɔ ɖua fia ɖe ame bubuwo dzi hena woƒe dzɔgbevɔ̃e.”—Yeremya 10:23; Nyagblɔla 8:9.
11. Ðe amegbetɔ ƒe dziɖuɖu ƒomevi aɖe te ŋu ɖe fukpekpe ɖaa?
11 Mawu ƒe mɔɖeɖe ɖe amegbetɔ ƒe dziɖuɖu ŋu ƒe akpe ade ɖee fia kɔte be amegbetɔ mate ŋu axe mɔ ɖe fukpekpe nu o. Mete ŋu xe mɔ ɖe enu ɣeaɖekeɣi kpɔ o. Le kpɔɖeŋu me, le Israel-fia Salomo ŋɔli la, togbɔ be enya nu ale gbegbe eye kesinɔnu geɖe kple ŋusẽ gã aɖe nɔ esi hã la, mete ŋu ɖe fukpekpe si amegbetɔ ƒe dziɖuɖu hena vɛ ɖa o. (Nyagblɔla 4:1-3) Nenema ke le míaƒe ŋkekea me la, xexeamekplɔlawo hã mete ŋu tsɔ nusiwo wowɔ le nunya ƒe ŋgɔyiyi ta la ɖe fukpekpe ɖae o. Gavɔ̃ɖi wu la, ŋutinya ɖee fia be esi amegbetɔ ɖe eɖokui ɖa le Mawu ƒe dziɖuɖu te la, edzi fukpekpea ɖe edzi boŋ le esi wòaɖee ɖa teƒe.
Mawu ƒe Nukpɔsusu si De Didiƒe
12-14. Viɖe mavɔ kawoe do tso Mawu ƒe mɔɖeɖe be fukpekpe nanɔ anyi me?
12 Mawu ƒe mɔɖeɖe ɖe fukpekpe ŋu nye vevesese na mí. Gake etsɔ nukpɔsusu si de didiƒe kpɔ nya la gbɔe, elabena enya nu nyui siwo ado tso eme la ava mlɔeba. Mawu ƒe nukpɔsusu aɖe vi na nuwɔwɔwo, menye le ƒe akpe ʋee aɖewo me ko o, ke boŋ ƒe miliɔn geɖe, ẽ, aɖe vi na wo mavɔmavɔe.
13 Ne nane agava dzɔ le etsɔ me eye ame aɖe mazã eƒe tiatiawɔwɔblɔɖe la nyuie o eye wòake ɖi le alesi Mawu le nuwo wɔmee ŋu la, magahiã be woana ɣeyiɣii be wòatsɔ aɖo kpe nusi wòsusu la dzi o. Esi Mawu ɖe mɔ na aglãdzelawo ƒe akpe geɖe ta la, eɖo kpɔɖeŋu si le se nu si ŋu woate ŋu atrɔ ɖo ɣesiaɣi la ɖi, esi woate ŋu azã tso mavɔ me yi mavɔ me le xexeame katã ƒe afisiafi.
14 Esi Yehowa ɖe mɔ ɖe vɔ̃ɖinyenye kple fukpekpe ŋu vaseɖe fifia ta la, kpeɖodzi si li la asɔ gbɔ nyuie xoxo be nusianu si mewɔ ɖeka kple eyama o la ƒe ɖeke madze edzi o. Adze ɖikekemanɔŋui be amegbetɔwo loo alo gbɔgbɔmenuwɔwɔwo ƒe ɖoɖo aɖeke mate ŋu ahe viɖe mavɔwo vɛ o. Eyata Mawu tɔ adzɔ le go sia go me be wòatsrɔ̃ aglãdzela ɖesiaɖe ɖa gbidii enumake. “[Atsrɔ̃] ame vɔ̃ɖiwo katã.”—Psalmo 145:20; Romatɔwo 3:4.
[Nɔnɔmetata si le axa 15]
Esi mía dzila gbãtɔwo tia be yewomanɔ Mawu ƒe kpɔkplɔ te o la, wova tsi heku mlɔeba
[Nɔnɔmetata si le axa 16]
Amegbetɔ ƒe dziɖuɖu Mawu manɔmee nye afɔku sɔŋ
[Afi Si Míexɔ Mɔɖeɖe Tso]
U.S. Coast Guard photo