Akpa 6
Nukatae Fukpekpe Kple Nu Madzɔmadzɔ Wɔwɔ Bɔ Alea Gbegbe Ðo?
1, 2. Le nusi teƒe amegbetɔwo kpɔ ta la, nya kawoe míate ŋu abia?
1 Gake ne Dziɖula Gãtɔ la ɖo tame be ame deblibowo nanɔ anyigba dzi tegbee le paradiso ƒe nɔnɔmewo me eye ne esia gakpɔtɔ nye eƒe tameɖoɖo la, ke nukatae paradiso meli fifia o? Nukatae ameƒomea to fukpekpe kple nu madzɔmadzɔ wɔwɔwo boŋ me ƒe alafa geɖewo?
2 Ðikekemanɔmee la, amegbetɔ ƒe ŋutinya me yɔ fũ kple nuxaxa si aʋawɔwɔ, dutanyigbawo dzi ɖuɖu, amebaba, nu madzɔmadzɔ wɔwɔ, ahedada, afɔku, dɔléle, kple ku he vɛ la. Nukatae nu gbegblẽ geɖewo dzɔ ɖe ame maɖifɔ geɖewo dzi ɖo? Ne Mawu nye ŋusẽkatãtɔ la, ke nukatae wòɖe mɔ fukpekpe manyagblɔ sia gbegbe nɔ anyi ƒe akpe geɖe? Esi wònye Mawue wɔ xexeame eye wòwɔe ɖe ɖoɖo nyui nu alea gbegbe ta la, ke nukatae wòaɖe mɔ zitɔtɔ kple nuwo gbegblẽ nayi edzi le anyigba dzi?
Kpɔɖeŋu Aɖe
3-5 (a) Kpɔɖeŋu kae akpe ɖe mía ŋu be míase nusitae Mawu si wɔa nu ɖe ɖoɖo nu aɖe mɔ zitɔtɔ nanɔ anyigba dzi ɖo la gɔme? (b) Nu geɖe siwo gbɔ kuxia ate ŋu atso dometɔ kae sɔ ɖe nɔnɔme si me anyigba le la nu?
3 Na míawɔ kpɔɖeŋu aɖe atsɔ afia nusitae Mawu si wɔa nu ɖe ɖoɖo nu aɖe mɔ zitɔtɔ nanɔ anyigba dzi ɖo. Tsɔe be yezɔ yina ɖe ave aɖe me eye yeke ɖe aƒe aɖe ŋu. Esi nèle ŋku lém ɖe aƒea ŋu la, èkpɔe be nuwo gblẽ le aƒea ŋu. Fesreawo gbã, xɔa tame ŋɔ flofloflo, atixɔ si wotu ɖe xɔa nu la ŋɔ flofloflo, ʋɔtru la ƒe akpa ɖeka ɖe ɖa, eye pɔmpi siwo li la hã gblẽ.
4 Esi nèkpɔ nu gbegblẽ siawo katã la, ɖe nàƒo nya ta be menye aɖaŋuwɔla nyanu aɖekee tu xɔa oa? Ðe alesi nuwo gblẽe ana nàxɔe ase be ɖeko aƒea ŋutɔ dzɔ le eɖokui sia? Alo ne èƒo nya ta be ame aɖee ta eƒe nɔnɔme hetui la, ɖe wòawɔ na wò be aɖaŋu mele tagbɔ na amesia o eye mebua nu ŋu nyuie oa?
5 Ne ègbugbɔ galé ŋku ɖe xɔa ŋu nyuie la, àkpɔe be wotui le gɔmedzedzea me nyuie eye wòɖe nuŋububu nyui geɖe si wotsɔ tui la fia. Gake fifia nuwo gblẽ le eŋu eye wòkpɔtɔ vie wòamu. Nukae nusiwo gblẽ le eŋu kple kuxi siwo le aƒea me la afia? Woate ŋu afia be (1) aƒeatɔ ku; (2) enye xɔtula bibi gake megatsɔ ɖeke le aƒea ƒe nya me o; alo (3) ehayae na amesiwo mekpɔa ŋudzedze ɖe nu ŋu o wole eme. Kpɔɖeŋu mamlɛtɔ siae sɔ kple nɔnɔme si me anyigba sia le.
Nusi Gblẽ
6, 7. Nukae dzɔ ɖe Adam kple Xawa dzi esi woda le Mawu ƒe se dzi?
6 Míesrɔ̃e le Biblia ƒe nuŋlɔɖi gbãtɔ me be menye Mawu ƒe tameɖoɖoe wònye be amewo nakpe fu alo aku o. Esi mía dzila gbãtɔ Adam kple Xawa meɖo to Mawu o tae woku ɖo. (Mose I, ta 2 kple ta 3) Esi wosẽ to la, womeganɔ Mawu ƒe lɔlɔ̃nu wɔm o. Woɖe wo ɖokui ɖa le Mawu ƒe dzikpɔkpɔ te. Le ema wɔwɔ me la, woɖe wo ɖokui ɖa le Mawu, “agbedzɔƒe” la ŋu.—Psalmo 36:10.
7 Abe alesi mɔ̃ si woɖe tso eƒe ŋusẽtsoƒe ŋu dzudzɔa dɔwɔwɔ hetɔna ene la, woƒe ametia kple susua va nɔ gbɔdzɔgbɔdzɔm. Nusi do tso emee nye be Adam kple Xawa va gbɔdzɔ, woku amegã kple nyagã eye le ɣeyiɣi aɖe megbe la woku. Nukae dzɔ ɣemaɣi? Wogbugbɔ yi afisi wotso: “Anyi nènye, eye anyi ke nagatrɔ azu!” Mawu xlɔ̃ nu wo be ne womewɔ ɖe yeƒe sewo dzi o la woaku: “Ku ke naku.”—Mose I, 2:17; 3:19.
8. Aleke mía dzila gbãtɔwo ƒe nuvɔ̃ kpɔ ŋusẽ ɖe amegbetɔƒomea dzii?
8 Menye mía dzila gbãtɔwo koe ku o, ke wokplɔ woƒe dzidzimeviwo, si nye amegbetɔƒomea katã hã de ku me. Nukatae? Elabena le agbe ƒe domenyinyi ƒe sewo nu la, ɖeviwo nyia wo dzilawo ƒe nɔnɔmewo dome. Eye nusi ƒe dome mía dzila gbãtɔwo ƒe viwo katã nyi lae nye blibomademade kple ku. Romatɔwo 5:12 gblɔ na mí be: “To ame ɖeka [Adam, ameƒomea tɔgbui] dzi nuvɔ̃ la va xexeame, eye to nuvɔ̃ me ku la va, eye nenema ku la va to amewo katã dzi yi, esi wo katã wɔ nuvɔ̃ [to blibomademade ƒe domenyinyi me, esi nye nuvɔ̃ ƒe nɔnɔmewo] ŋuti la.” Eye esi wònye nuvɔ̃, blibomademade, kple ku ye nye nusiwo ko amewo nya ta la, ame aɖewo bua wo be wonye dzɔdzɔmenu kple nusi nu womate ŋu asi le o. Gake ɖe wotsɔ agbe tegbee nɔnɔ ƒe ŋutete wɔ amegbetɔ gbãtɔwoe hede eƒe didi wo me. Eyatae wòɖea dzi le ame akpa gãtɔ ƒo ŋutɔ ne wokpɔe be ku ava tso yewoƒe agbe dzi.
Nukatae Eteƒe Didi Alea Gbegbe Ðo?
9. Nukatae Mawu ɖe mɔ fukpekpe yi edzi ɣeyiɣi didi sia gbegbe ɖo?
9 Nukatae Mawu ɖe mɔ na amegbetɔwo be woalé woa ŋutɔwo ƒe mɔ atsɔ ɣeyiɣi didi sia gbegbe ɖo? Nukatae wòɖe mɔ fukpekpe li ƒe alafa geɖewoe nye sia? Susu vevi siwo tae dometɔ ɖekae nye be nya vevi aɖe fɔ ɖe te: Ameka sie gome le be wòaɖu dzi? Mawue le be wòanye amegbetɔwo Dziɖula loo alo ɖe woate ŋu aɖu wo ɖokui dzi wòadze edzi eya manɔmeea?
10. Ŋutete kae wona amegbetɔwo, eye agbanɔamedzi kae kpe ɖe eŋu?
10 Wotsɔ lɔlɔ̃nu faa si nye tiatiawɔwɔ ƒe ŋutete wɔ amegbetɔwoe. Womewɔ wo wonye mɔ̃wo alo lãwo, siwo seselelãme ɖeɖeko fiaa mɔe o. Eyata amegbetɔwo ate ŋu atia amesi woasubɔ. (Mose V, 30:19; Korintotɔwo II, 3:17) Eyata Mawu ƒe Nya la xlɔ̃ nu be: “[Miwɔ nu] abe ablɔɖeviwo ene, eye menye abe amesiwo wɔa ablɔɖenyenye la ŋuti dɔ be, wòanye vɔ̃ɖinyenye ƒe nutsyɔnu la ene o, ke boŋ abe Mawu ƒe dɔlawo ene.” (Petro I, 2:16) Gake togbɔ be tiatiawɔblɔɖe ƒe nunana wɔnuku la le amegbetɔwo si hã la, ele be woaxɔ nusi woa ŋutɔwo tia wɔ la me tsonuwo.
11. Mɔ ɖeka ka dzie woato anya ne ame ɖokui ɖeɖe ɖa le Mawu ŋu ƒe tiatia la adze edzi alo madze edzi o?
11 Mía dzila gbãtɔwo wɔ tiatia gbegblẽ. Wotiae be yewoaɖe yewo ɖokui ɖa le Mawu ŋu. Nyateƒee, Mawu ate ŋu atsrɔ̃ aglãdzela eve gbãtɔwo enumake esi wozã woƒe tiatiawɔblɔɖe la ɖe mɔ gbegblẽ nu hafi. Gake ema makpɔ gome si le Mawu si be wòaɖu amegbetɔwo dzi ŋuti nyaʋiʋli la gbɔ o. Esi wònye ɖokuisinɔnɔ tso Mawu gbɔ dimee ame eve gbãtɔwo le ta la, ele be woaɖo nya sia ŋu: Ðe nuwɔna ma ana woakpɔ dzidzɔ kple dzidzeme le agbe mea? Mɔ ɖeka si ko dzi woato anyae nye be woaɖe mɔ mía dzila gbãtɔwo kple woƒe dzidzimeviwo nalé woa ŋutɔwo ƒe mɔ atsɔ, elabena emae wotia. Ɣeyiɣia afia ne wowɔ amegbetɔwo be woaɖu wo ɖokui dzi wo Wɔla manɔmee wòadze edzi na wo loo alo madze edzi o.
12. Nukae Yeremya kpɔ le amegbetɔwo ƒe dziɖuɖu ŋu, eye nukatae esia le alea ɖo?
12 Biblia ŋlɔla Yeremya nya nusi ado tso esia me. Mawu ƒe gbɔgbɔ kɔkɔe si ŋu ŋusẽ le alo eƒe dɔwɔŋusẽ ʋãe wòŋlɔe le nyateƒe me be: “Yehowa, menyae be, amegbetɔ ƒe mɔ kple ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o. Yehowa, he to nam.” (Yeremya 10:23, 24) Enya be ele be amegbetɔwo naxɔ Mawu ƒe dziƒonunya ƒe mɔfiafia. Nukate? Elabena Mawu mewɔ amegbetɔwo be woakpɔ dzidzedze yeƒe mɔfiafia manɔmee o.
13. Nukae nusiwo do tso ƒe akpe geɖe siwo amegbetɔwo tsɔ ɖu dzii me la ɖe fia ɖikekemanɔmee?
13 Nusiwo do tso ƒe akpe geɖe siwo amegbetɔwo tsɔ ɖu dzii me la ɖee fia ɖikekemanɔmee be mele amegbetɔwo si me be woakpɔ woa ŋutɔwo ƒe nyawo gbɔ wo Wɔla manɔmee o. Esi wotee kpɔ ta la, woa ŋutɔwo koe woabu fɔe ɖe afɔku siwo do tso eme na wo ta. Biblia la na esia me kɔ ƒã be: “Agakpe [Mawu] wònye, eƒe nuwɔwɔ de blibo; elabena eƒe mɔwo katã dzɔ. Mawu nyateƒetɔ wònye, eye alakpa mele eme o, nuteƒewɔla kple dzɔdzɔetɔ wònye. Wowɔ nu tovo ɖe eŋu, ŋukpenanu wonye, eye womenye viawo o; dzidzime baɖa kple ame gbegblẽwo wonye!”—Mose V, 32:4, 5.
Mawu Ade Nu Nya la me Kpuie
14. Nukatae Mawu magahe ɖe megbe hafi ade nu amegbetɔwo ƒe nyawo me o?
14 Esi Mawu ɖe mɔ ɖe amegbetɔwo ƒe dziɖuɖu le ƒe akpe geɖe siwo va yi me ƒe kpododonu si dze gaglã ŋu ta la, ate ŋu atso azɔ ade nu amegbetɔwo ƒe nyawo me ahaɖe fukpekpe, nuxaxa, dɔléle, kple ku ɖa. Esi Mawu ɖe mɔ na amegbetɔwo be woaɖo woƒe dɔwɔnawo ƒe kɔkɔƒe kekeake le dzɔdzɔmeŋutinunya, mɔ̃ɖaŋu, atikewɔwɔ, kple nuwɔna bubuwo me ta la, megahiã be wòana ƒe alafa bubu geɖewo amegbetɔ siwo ɖe wo ɖokui ɖa le wo Wɔla ŋu be woatsɔ afia ne woate ŋu ahe xexe si me ŋutifafa kple paradiso ƒe nɔnɔmewo le vɛ alo womahee vɛ o. Womete ŋu hee vɛ o eye womate ŋu ahee vɛ hã o. Amegbetɔ ƒe eɖokui ɖeɖe ɖa le Mawu ŋu he xexe si gblẽ ku ŋutɔ si me fuléle kple ku bɔ ɖo la vɛ.
15. Biblia ƒe aɖaŋuɖoɖo kae wòanyo be míaɖo toe?
15 Togbɔ be dziɖula ɖianukware siwo di be yewoakpe ɖe ameƒomea ŋu ɖu dzi hã la, woƒe agbagbadzedzewo medze edzi o. Amegbetɔ ƒe dziɖuɖu ƒe kpododonu ŋuti ɖaseɖiɖi le dzedzem le afisiafi egbea. Esia tae Biblia ɖo aɖaŋu be: “Migaɖo ŋu ɖe amegãwo, amegbetɔvi, siwo mate ŋu axɔ na ame o la ŋu o.”—Psalmo 146:3.
[Nɔnɔmetata si le axa 25]
Xexeamedziɖula siwo dzea agbagba vevie gɔ̃ hã mete ŋu he xexe si me ŋutifafa kple paradiso ƒe nɔnɔmewo le la vɛ o