Alesi Míawɔ Ado Dzidzɔ Na Mawu

NUKAE míate ŋu awɔ wòado dzidzɔ na Mawu? Ðe nane li míate ŋu atsɔ anaea?— Yehowa gblɔ be: “Tɔnyee nye avemelãwo katã.” Egblɔ hã be: “Tɔnyee nye klosalo, eye tɔnyee nye sika.” (Psalmo 24:1; 50:10; Xagai 2:8) Ke hã nane li míate ŋu atsɔ ana Mawu. Nukae wònye?—

Yehowa ɖe mɔ na mí be míawɔ tiatia be míasubɔ ye loo alo míagasubɔ ye o. Mezia mía dzi be míawɔ nusi wòdi be míawɔ o. Na míadze agbagba ase nusita Mawu wɔ mí ale be míate ŋu awɔ tiatia faa be míasubɔ ye loo alo míagasubɔ ye o la gɔme.

Ðewohĩ ènya nusi mɔ̃ si wowɔ wòwɔa nu abe amegbetɔ ene la nye. Enye mɔ̃ si wowɔ be wòawɔ nusianu si tututu ewɔla di be wòawɔ. Eyata tiatiawɔwɔ aɖeke mele mɔ̃a si o. Yehowa ate ŋu awɔ mí abe mɔ̃ mawo ene hafi. Ate ŋu awɔ mí ale be nusi eya di be míawɔ koe míawɔ hafi. Gake Mawu mewɔ mí nenema o. Ènya nusitaea?— Enyo, mɔ̃woe fefenu aɖewo nye. Ne wote asi ɖe nanewo dzi la, wowɔa nusi tututu wo wɔla wɔ wo be woawɔ. Èkpɔ fefenu aɖe si wɔa nane le eɖokui si alea kpɔa?— Zi geɖe la, kɔɖiɖi kple fefenu aɖe si wɔa nu ɖeka tɔgbe si ko ewɔla wɔe be wòawɔ la ƒe nu va tia ame. Mawu medi be míaɖo to ye le esi míele abe mɔ̃ siwo wowɔ be woaɖo to ye ene ta ko o. Yehowa di be míasubɔ ye le esi míelɔ̃ ye eye míedi be míaɖo to ye ta.

Èsusu be aleke mía Fofo si le dziƒo sena le eɖokui me ne míeɖo toe esi wònye mía ŋutɔ míaƒe didi ta?— Enyo, gblɔe nam, aleke wò nuwɔna kpɔa ŋusẽ ɖe dziwòlawo dzii?— Biblia gblɔ be vi nyanu “doa dzidzɔ na fofoa” gake vi tsibome ‘nye nuxaxa na dadaa.’ (Lododowo 10:1) Ède dzesii be ne èwɔ nusi papa kple dada bia tso asiwò be nàwɔ la, ena wokpɔa dzidzɔa?— Gake aleke wosena le wo ɖokui me ne ègbe toɖoɖo wo?—

Azɔ na míabu Yehowa, mía Fofo si le dziƒo, ŋu kpɔ. Egblɔ alesi míawɔ ana wòakpɔ dzidzɔ la na mí. Tsɔ wò Biblia ne nàʋu Lododowo 27:11. Mawu le nu ƒom na mí le afima be: ‘Vinye, dze nunya, be nàdo dzidzɔ na nye dzi, ne mate ŋu aɖo nya ŋu na amesi le alɔme ɖem le ŋunye.’ Ènya nusi wòfia be woaɖe alɔme le ame ŋua?— Ame aɖe ate ŋu anɔ alɔme ɖem le ŋuwò anɔ kowòm ahanɔ gbɔgblɔm be mète ŋu wɔa nusi gblɔm nèle be nèwɔna la o. Aleke Satana ɖea alɔme le Yehowa ŋui?— Na míakpɔe ɖa.

Ðo ŋku edzi be míesrɔ̃e le agbalẽ sia ƒe Ta 8 lia me be Satana di be yeanɔ Ðoƒe Kɔkɔtɔ Kekeake eye edi hã be amewo katã naɖo to ye. Satana le gbɔgblɔm be esi Yehowa ana agbe mavɔ amewo ne wosubɔe ta koe wole Yehowa subɔm ɖo. Esi Satana te ŋu na Adam kple Xawa gbe toɖoɖo Yehowa vɔ megbe la, etsɔ nya ɖe Mawu hã ŋu. Egblɔ na Mawu be: ‘Nusi amewo kpɔna tsoa gbɔwò ta koe wosubɔa wò ɖo. Wò ya na mɔm ko, mate ŋu ana amesiame nagbugbɔ le yowòme.’

Ele eme baa be nya mawo tututu medze le Biblia me o ya. Gake ne míexlẽ nu tso ŋutsu si woyɔna be Hiob ŋu la, edzena ƒã be nya mawo tɔgbee Satana gblɔ na Mawu. Enye nusi le vevie ŋutɔŋutɔ, na Satana kpakple Yehowa siaa, nenye be Hiob awɔ nuteƒe na Mawu alo mawɔe o. Na míaʋu míaƒe Biblia akpɔ nusi dzɔ ɖa le Hiob ta 1 kple ta 2.

De dzesii be le Hiob ta 1 me la, Satana hã nɔ mawudɔlawo dome le dziƒo esi wo katã wova do ɖe Yehowa ŋkume. Eyata Yehowa bia Satana be: “Afikae nètso?” Satana ɖo eŋu be yeva nɔ tsa ɖim le anyigba dzi henɔ ŋku lém ɖe nuwo ŋu. Eyata Yehowa biae be: ‘Èlé ŋku ɖe nye dɔla Hiob ŋua, be esubɔam eye mewɔa nu vɔ̃ɖi oa?’—Hiob 1:6-8.

Enumake Satana gblɔ nyawo tsɔ tsi tre ɖe eŋui. ‘Dzodzroe, esi fukpekpe aɖeke mevaa Hiob dzi o tae wòle subɔwòm ɖo. Ne èɖe wò ametakpɔkpɔ kple yayrawo le edzi la, aƒo fi ade wò le ŋkuwòme.’ Eyata Yehowa gblɔ nɛ be: ‘Enyo, Satana, àte ŋu awɔ nusianu si nèdi la Hiob, gake mègawɔ nuvevi aɖeke eya ŋutɔ o.’—Hiob 1:9-12.

Nukae Satana wɔ?— Ena amewo va fi Hiob ƒe nyiwo kple tedziwo eye wowu amesiwo nɔ lãawo dzi kpɔm. Eyome dzi ɖe gbe ɖe eƒe alẽwo kple wo kplɔlawo katã dzi woku. Emegbe amewo va fi eƒe tedziwo eye wowu wo kplɔlawo. Mlɔeba la, Satana na ya sesẽ ʋuduʋudu aɖe mu xɔ si me Hiob vi ewoawo le wòdze wo dzi wo katã woku. Le esiawo katã megbe hã la, Hiob yi edzi nɔ Yehowa subɔm kokoko.—Hiob 1:13-22.

Esi Satana gava Yehowa ŋkume la, Yehowa fia asii be Hiob gakpɔtɔ lé nuteƒewɔwɔ me ɖe asi kokoko. Satana gagblɔ tsitretsiɖeŋunyawo ake, be: ‘Ne àɖe mɔ nam mana eƒe ŋutilã nase veve la, aƒo fi ade wò le ŋkuwòme.’ Eyata Yehowa gaɖe mɔ na Satana be wòawɔ fu Hiob ƒe ŋutilã gake ede se nɛ be megawu Hiob o.

Satana na ƒoƒoe vɔ̃ aɖe ƒo ɖe Hiob ŋu katã ale be eŋu katã wɔ abi. Abiawo nɔ ʋeʋẽm ale gbegbe be ame aɖeke megadina be yeate ɖe eŋu o. Hiob srɔ̃ va gblɔ nɛ be: “Gbe Mawu, ne naku!” Ame aɖewo siwo wɔ wo ɖokui abe Hiob xɔlɔ̃woe wonye ene va srãe kpɔ eye wogado nuxaxa nɛ ɖe edzi esi wogblɔ nɛ be nu vɔ̃ɖi aɖe kokokoe wòanya wɔ tae fukpekpe siawo katã va edzi ɖo. Gake le fukpekpe kple vevesese siwo katã Satana he va Hiob dzi megbe la, Hiob yi edzi subɔ Yehowa nuteƒewɔwɔtɔe.—Hiob 2:1-13; 7:5; 19:13-20.

Èsusu be aleke Hiob ƒe nuteƒewɔwɔ ana Yehowa nase le eɖokui me?— Ena Yehowa kpɔ dzidzɔ elabena ate ŋu agblɔ na Satana be: ‘Kpɔ Hiob ɖa! Esubɔam le esi wònye eya ŋutɔ ƒe didi ta.’ Ànɔ abe Hiob enea, amesi Yehowa ate ŋu afia asii be enye kpɔɖeŋu si ɖo kpe edzi be aʋatsokalae Satana nyea?— Nyateƒee, mɔnukpɔkpɔ gãe wònye na mí be míana wòakpɔ ŋuɖoɖo na Satana ƒe nutsotso be yeate ŋu atrɔ amesiame ɖa tso Yehowa subɔsubɔ gbɔ. Yesu bu esia be enye mɔnukpɔkpɔ gã na ye.

Nufiala Gã la meɖe mɔ na Satana ɣeaɖekeɣi be wòana Wòawɔ nu gbegblẽ aɖeke o. Wò ya bu alesi gbegbe eƒe kpɔɖeŋu nyuia ado dzidzɔ na Fofoae ŋu kpɔ! Yehowa ate ŋu afia asi Yesu ahana ŋuɖoɖo Satana be: ‘Kpɔ Vinyea ɖa! Elé nuteƒewɔwɔ deblibo me ɖe asi le esi wòlɔ̃m ta!’ Eye gabu alesi wòado dzidzɔ na Yesu ŋutɔ hãe be yewɔ nusi do dzidzɔ na ye Fofo ƒe dzi ŋu kpɔ. Le dzidzɔ ma ta la, Yesu do dzi vaseɖe keke ku me ke gɔ̃ hã le fuwɔameti ŋu.—Hebritɔwo 12:2.

Èdi be yeanɔ abe Nufiala Gã la ene ado dzidzɔ na Yehowa?— Ekema yi edzi nànɔ nu srɔ̃m tso nusi dim Yehowa le be nàwɔ ŋu, eye nàdo dzidzɔ nɛ to nusiawo dzi wɔwɔ me!