Nu Kae Mawɔ Ne Wotsɔ Gbɔdɔdɔ Le Fu Ðem Nam?

NU KAE NÀWƆ?

Kpɔ nudzɔdzɔ sia ɖa le susu me: Heather kple Mike nya wo nɔewo ɣleti eve koe nye esia, gake ewɔna na Heather abe ƒe gbogbo aɖewoe nye esia wònyae ene. Woŋlɔa nu na wo nɔewo le asitelefon dzi ɣesiaɣi, woɖoa dze le telefon dzi gaƒoƒo geɖewo, eye ne wole dze ɖom la, wo dometɔ ɖe sia ɖe tea ŋu wua nɔvia ƒe nyagbɔgblɔwo nu gɔ̃ hã! Gake dzeɖoɖo dzro megasu na Mike o.

Le ɣleti eve siwo va yi me la, Mike kple Heather léa asi na wo nɔewo eye wogbugbɔa nu na wo nɔewo vie ko. Heather ya medi be yewoagawɔ nu bubu aɖeke wu ema o. Gake medi hã be Mike nage le ye si o. Ame aɖeke mekafunɛ be edze tugbe hele etɔxɛe de Mike nu o. Egblɔ na eɖokui be ‘Nye kple Mike míelɔ̃ mía nɔewo, eye . . . ’

Ne ètsi adze zɔzɔ kple ame aɖe gɔme eye wò nɔnɔmea sɔ kple Heather tɔ la, nu kae nàwɔ?

TƆ NÀBU EŊU KPƆ!

Ne èdzo kpo le ati dzi be yeadzo le yame abe xevi ene la, àkpɔ emetsonua. Nenema ke koe wòle ne èda le agbe nyui nɔnɔ ƒe sewo hã dzi. Esiawo dometɔ ɖeka gblɔ be: “Miatsri gbɔdɔdɔ manɔsenu” alo matrewɔwɔ.—1 Tesalonikatɔwo 4:3.

Nu kae ado tso eme ne èda se ma dzi? Biblia gblɔ be: “Ame si ƒoa eɖokui ɖe gbɔdɔdɔ manɔsenu me la le nu vɔ̃ wɔm ɖe eya ŋutɔ ƒe ŋutilã ŋu.” (1 Korintotɔwo 6:18) Aleke nya sia nye nyateƒee?

Numekulawo kpɔe be nu siwo gbɔna la dometɔ ɖeka alo esiwo wu nenema dzɔna ɖe sɔhɛ siwo wɔa matre la dzi.

• WOXAA NU. Sɔhɛ siwo wɔ matre la dometɔ akpa gãtɔ gblɔ emegbe be nu si yewowɔ la va ve yewo vevie.

• WOMEGAKANA ÐE WO NƆEWO DZI O. Ne wodɔ wo nɔewo gbɔ vɔ la, ame eveawo dometɔ ɖe sia ɖe va nɔa eɖokui biam be: ‘Ame bubu ka gbɔe wògadɔ?’

• MƆKPƆKPƆ BUNA ÐE WO. Nyɔnuvi geɖewo dia ame si akpɔ wo ta, ke menye ame si azã wo o. Ŋutsuvi geɖewo gblɔ be nyɔnuvi siwo ɖe asi le wo ɖokuiwo ŋu na yewo ƒe nu megadzɔa dzi na yewo ale o.

• Nya vevitɔ: Ne mèkpɔ ɖe srɔ̃ haɖe o, gake nèdɔ kple ame aɖe, si fia be èwɔ matre la, ke èɖe ɖokuiwò dzi kpɔtɔ esi nètsɔ nu xɔasi aɖe si le asiwò la da kaɖigbegbe alo gblẽ edome. (Romatɔwo 1:24) Wò ŋutilã xɔ asi ŋutɔ eya ta mègatsɔe da kaɖigbegbe o.

Ðee fia be ŋutete le ye si be yeatsri “gbɔdɔdɔ manɔsenu.” (1 Tesalonikatɔwo 4:3) Ekema ne èva ɖe srɔ̃ emegbe la, àte ŋu akpɔ gome le gbɔdɔdɔ me faa. Àse vivi nɛ bliboe. Àvo tso dzimaɖitsitsi, nuxaxa kple dediemanɔmanɔ siwo tsoa matrewɔwɔ, si fia gbɔdɔdɔ do ŋgɔ na srɔ̃ɖeɖe, me la si me.—Lododowo 7:22, 23; 1 Korintotɔwo 7:3.

NU KAE NÈSUSU?

• Ðe ame si lɔ̃ wò ŋutɔŋutɔ ade wo ŋutilã kple seselelãme afɔku mea?

• Ðe ame si tsɔa ɖe le eme na wò vevie la aƒoe ɖe nuwò be nàwɔ nu si agblẽ wò kple Mawu domea?—Hebritɔwo 13:4.