Fuwɔame Etɔ̃ Gbãtɔwo

Wozi Israel-viwo dzi wowɔ dɔ sesẽ abe kluviwo ene. Yehowa dɔ Mose kple Aron be woagblɔ na Farao be: ‘Ðe asi le nye amewo ŋu ne woayi ava subɔm le gbedzi.’ Farao ɖo eŋu dadatɔe be: ‘Nyemaɖo to Yehowa o, eye nyemaɖe asi le Israel-viwo ŋu woadzo o.’ Farao zi wo dzi be woagawɔ dɔ sesẽ ɖe edzi. Yehowa atu nu kple Farao. Ènya nu si wòwɔa? Ehe Fuwɔame Ewo va Egiptetɔwo dzi. Yehowa gblɔ na Mose be: ‘Farao medi be yeaɖo tom o. Etsɔ ŋdi Farao ayi Nil-tɔsisia to. Yi ɖagblɔ nɛ be esi nègbe be yemaɖe asi le nye amewo ŋu woadzo o ta la, Nil-tɔsisia katã atrɔ azu ʋu.’ Mose ɖo to eye wòyi Farao gbɔ. Farao nɔ Aron kpɔm esi wòtsɔ eƒe atikplɔ ƒo Nil-tɔsisia dzi eye wòtrɔ zu ʋu. Tɔsisia nɔ ʋeʋẽm kũu, tɔmelãwo ku, eye womekpɔ tsi nyui aɖeke le Nil-tɔsisia me ano o. Ke hã Farao gbe be yemaɖe asi le Israel-viwo ŋu woadzo o.

Le ŋkeke adre megbe la, Yehowa gadɔ Mose ɖe Farao gbɔ be wòagblɔ nɛ be: ‘Ne mèɖe asi le nye amewo ŋu wodzo o la, mana akpɔkplɔwo nayɔ Egipte fũu.’ Aron do eƒe atikplɔ ɖe dzi, eye akpɔkplɔwo va xɔ anyigba la dzi. Akpɔkplɔawo ge ɖe amewo ƒe aƒewo me, woƒe abawo dzi kple woƒe nuɖugbawo me. Akpɔkplɔawo xɔ afi sia afi! Farao gblɔ na Mose be wòaɖe kuku na Yehowa ne wòaɖe fuwɔame sia ɖa. Farao do ŋugbe be yeaɖe asi le Israel-viwo ŋu woadzo. Eya ta Yehowa na fuwɔame la tɔ te, eye Egiptetɔwo ƒo akpɔkplɔ kukuawo nu ƒu gleglegle. Anyigba la dzi te ʋeʋẽ kũu. Gake Farao gagbe kokoko be yemaɖe asi le Israel-viwo ŋu woadzo o.

Emegbe Yehowa gblɔ na Mose be: ‘Aron netsɔ eƒe atikplɔ ƒo anyigba eye kea atrɔ azu muwo alo nudzodzoevi siwo ɖua ame.’ Eteƒe medidi o muawo xɔ afi sia afi. Farao ŋutɔ ƒe ame aɖewo gblɔ nɛ be: ‘Fuwɔame sia tso Mawu gbɔ.’ Gake Farao medi be yeaɖe asi le Israel-viwo ŋu woadzo o.