Yehowa Ƒe Dɔla Aɖe Kpɔ Hizkiya Ta

Asiria Fiaɖuƒea xɔ Israel-to ewo fiaɖuƒea. Fifia Asiria-fia Senakerib di be yeaxɔ Yuda-to eve fiaɖuƒea hã. Edze Yuda duawo xɔxɔ gɔme ɖekaɖeka. Gake du si wòdi vevie be yeaxɔe nye Yerusalem. Ke hã, Senakerib menya be Yehowa le Yerusalem dua ta kpɔm o.

Yuda-fia Hizkiya xe ga gbogbo aɖe na Senakerib be wòaɖe asi le Yerusalem ŋu. Togbɔ be Senakerib xɔ gaa hã la, edɔ eƒe aʋawɔla sesẽwo ɖa be woaho aʋa ɖe Yerusalem ŋu. Ame siwo nɔ Yerusalem dua me la nɔ vɔvɔ̃m ale gbegbe elabe Asiriatɔwo nɔ dua gogom. Eya ta Hizkiya gblɔ na wo be: ‘Migavɔ̃ o. Asiria-ʋakɔa sesẽ gake Yehowa ana míasesẽ wu wo.’

Senakerib dɔ eƒe dɔla si nye Rabsake ɖe Yerusalem be wòaɖe alɔme le wo ŋu. Rabsakea, va tɔ ɖe dua godo eye wòdo ɣli be: ‘Yehowa mate ŋu axɔ na mi o. Migana Hizkiya nable mi o. Mawu aɖeke meli si ate ŋu aɖe mi tso mía si me o.’

Hizkiya do gbe ɖa bia nu si wòawɔ la Yehowa. Yehowa ɖo eŋu be: ‘Mègavɔ̃ nya si gblɔm Rabsakea le o. Senakerib maxɔ Yerusalem o.’ Emegbe Senakerib ɖo lɛta aɖewo ɖe Hizkiya. Lɛtaa me nyawo gblɔ be: ‘Wò ya na ta ko. Yehowa mate ŋu axɔ na wò o.’ Hizkiya gado gbe ɖa be: ‘Yehowa meɖe kuku, xɔ na mí, ale be ame sia ame nakpɔe be wò ɖeɖe koe nye Mawu vavã la.’ Yehowa ɖo eŋu nɛ be: ‘Asiria-fia maɖo afɔ Yerusalem o. Makpɔ nye dua ta.’

Senakerib ka ɖe edzi be yeaxɔ Yerusalem kpuie. Gake le zã aɖe me la, Yehowa dɔ eƒe dɔla aɖe ɖe afi si Asiria-ʋawɔlawo ƒo ƒu ɖo le dua godo. Mawudɔla la wu asrafo 185,000 sɔŋ! Fia Senakerib ƒe aʋawɔla sesẽwo katã ku. Naneke meli wòawɔ tsɔ wu be wòatrɔ ayi aƒe kple ŋukpe o. Yehowa kpɔ Hizkiya kple Yerusalem ta abe ale si wòdo ŋugbee ene. Ne ɖe nènɔ Yerusalem ɣemaɣi la, àɖo ŋu ɖe Yehowa ŋua?