Wokɔ Gbɔgbɔ Kɔkɔea Ðe Kornelio Dzi

Roma-ʋafia aɖe si woyɔna be Kornelio la nɔ Kaisarea. Togbɔ be menye Yudatɔe wònye o hã la, Yudatɔwo dea bubu eŋu. Ekpena ɖe ame dahewo kple ame siwo hiã kpekpeɖeŋu la ŋu dɔmenyotɔe. Kornelio xɔ Yehowa dzi se eye wòdoa gbe ɖa nɛ edziedzi. Gbe ɖeka la, mawudɔla aɖe ɖe eɖokui fia Kornelio eye wògblɔ nɛ be: ‘Mawu se wò gbedodoɖawo. Azɔ dɔ amewo ɖo ɖe Yopa dua me, afi si Petro le, eye nàgblɔ nɛ be wòava.’ Enumake, Kornelio dɔ ŋutsu etɔ̃ ɖo ɖe Yopa si didi abe kilometa 48 ene le dua ƒe anyiehe gome.

Gake do ŋgɔ la, Petro kpɔ ŋutega aɖe le Yopa. Ekpɔ lã siwo ŋu womeɖe mɔ na Yudatɔwo be woaɖu o la, eye wòse gbe aɖe si nɔ gbɔgblɔm nɛ be wòaɖu wo. Petro gbe hegblɔ be: ‘Nyemeɖu lã makɔmakɔ aɖeke le nye agbe me kpɔ o.’ Gbea gblɔ nɛ ake be: ‘Mègayɔ lã siawo be lã makɔmakɔwo o. Mawu kɔ wo ŋu.’ Gbea gagblɔ nɛ be: ‘Ŋutsu etɔ̃ le wò ʋɔtru nu. Yi kpli wo.’ Petro yi ʋɔtrua nu eye wòbia ŋutsuawo susu si ta wova ɖo. Woɖo eŋu be: ‘Roma-ʋafia, Kornelio ye dɔ mí. Ebe nàva yeƒe aƒe me le Kaisarea.’ Petro bia tso wo si be woatsi yeƒe aƒe me adɔ le zã ma me. Esi ŋu ke la, eya kple nɔvi aɖewo siwo tso Yopa la dze wo yome yi Kaisarea.

Esi Kornelio kpɔ Petro azɔ la, edze klo. Gake Petro gblɔ be: ‘Tso! Amegbetɔ koe menye abe wò ke ene. Mawu gblɔ nam be mava aƒewòme, togbɔ be Yudatɔwo meyia ame siwo menye Yudatɔwo o ƒe aƒe me o hã. Azɔ meɖe kuku, gblɔ nu si ta nèdɔ ame wova yɔm la nam.’

Kornelio gblɔ na Petro be: ‘Ŋkeke enee nye esi va yi menɔ gbe dom ɖa na Mawu, eye mawudɔla aɖe gblɔ nam be madɔ woayɔ wò nam. Meɖe kuku, fia Yehowa ƒe nyawo mí.’ Petro ɖo eŋu be: ‘Azɔ menyae be Mawu mekpɔa ame ŋkume o. Exɔa ame sia ame si di be yeasubɔe.’ Petro fia nu geɖe wo tso Yesu ŋu. Emegbe gbɔgbɔ kɔkɔe la va Kornelio kple ame siwo nɔ afi ma kplii la dzi, eye wonyrɔ wo katã.