Amekawoe Xɔ Gbɔgbɔ Vɔ̃wo Dzi Se?

ÈXƆE SE be gbɔgbɔ makpɔmakpɔwo ate ŋu akpɔ ŋusẽ ɖe yeƒe agbe dzia? Ame geɖe agbe gbidii be ao. Togbɔ be wolɔ̃ ɖe edzi be Mawu li hã la, dzixɔse si nye be ŋusẽ triakɔ aɖewo siwo wɔa vɔ̃ li la ɖia fefenya na wo.

Nusi na ame geɖewo mexɔ gbɔgbɔ makpɔmakpɔwo dzi se le Ɣetoɖoƒedukɔwo me o ƒe akpa aɖe tso Kristodukɔa si fia nu ƒe alafa geɖee nye sia be anyigba lae le xexeame katã titina, le dziƒo kple dzo mavɔ si le anyigba te dome la ƒe ŋusẽkpɔɖeamedzi gbɔ. Nufiafia sia gblɔ be mawudɔlawo sea vivi bliboe le dzidzɔ me le dziƒo eye gbɔgbɔ vɔ̃wo ya kpɔa dzo mavɔ me nyawo dzi.

Esi nusiwo ŋu woke ɖo le dzɔdzɔmeŋutinunya me na be amewo gbe xexeame ƒe nɔnɔme ŋuti nukpɔsusu totrowo la, ewɔe be gbɔgbɔmenuwɔwɔwo dzixɔse megadzea ame geɖewo ŋu fifia o. The New Encyclopædia Britannica gblɔ be: “Le Copernicus ƒe tɔtrɔ si wowɔ le ƒe alafa 16 lia megbe kpuie (si wotu ɖe Copernicus si nye Poland-ɣletiviŋutinunyala ƒe nufiafia dzi), esi me wokpɔe le be . . . Anyigba la mele xexeame godoo titina o, ke boŋ enye ɣletinyigba si le ɣletivihatsotso si ƒoa xlã ɣea me, eye eya hã nye ɣletivihatsotso gã aɖe ƒe akpa sue aɖe ko le xexe si dze ƒã be seɖoƒe meli na o me la—wɔe be mawudɔlawo kple gbɔgbɔ vɔ̃wo dzixɔse dze abe nusiwo megasɔ o ene.”

Togbɔ be ame geɖe mexɔ gbɔgbɔ vɔ̃wo dzi se o hã la, ame miliɔn geɖe ya xɔ wo dzi se. Mawudɔla siwo wɔ nuvɔ̃ la wɔ akpa vevi aɖe le subɔsubɔha geɖe siwo nɔ anyi le blema kple fifia me. Tsɔ kpe ɖe alesi gbɔgbɔ vɔ̃ siawo gblẽa ame ƒe gbɔgbɔmemenyenye dome ŋuti la, wova kpɔe hã be woawoe hea afɔkuwo siwo nye aʋawɔwɔ, dɔwuame, kple anyigbaʋuʋu, kpakple dɔléle, tagbɔgbegblẽdɔ, kple ku vɛ.

Moslemtɔwo yɔa Satana Abosam si nye gbɔgbɔ vɔ̃wo ƒe tatɔ le Kristotɔnyenye kple Yuda-subɔsubɔ me be Iblis. Woyɔnɛ le blema Persiatɔwo ƒe subɔsubɔha si nye Zoroastatɔnyenye me be Angra Mainyu. Wobui le subɔsubɔha si nɔ anyi le ƒe alafa evelia kple etɔ̃lia M.Ŋ. me, si me tɔwo gblɔ be yewoƒe gbɔgbɔ me nyateƒea ƒe sidzedze koe ana woakpɔ ɖeɖe la be enye Demiurge, si nye ŋkɔ si wotsɔ na mawu ʋãŋu si bɔbɔ ɖe anyi, amesi ameƒomea me tɔ gbogbo aɖewo dea ta agu na le manyamanya me.

Gbɔgbɔ vɔ̃ siwo ƒe tatɔe nye gbɔgbɔ vɔ̃ gãtɔ aɖe la, ŋuti dzixɔse dze zi geɖe le Ɣedzeƒesubɔsubɔhawo me. Hindutɔwo xɔe se be asurawo (gbɔgbɔ vɔ̃wo) tsia tre ɖe davawo (mawuwo) ŋu. Asura siwo wovɔ̃na vevie wu bubuawoe nye rakshasawo, wonye gbɔgbɔ vɔ̃ ɖivɔvɔ̃ siwo nɔa ameɖiƒewo.

Buddhatɔwo bua gbɔgbɔ vɔ̃wo be wonye ŋusẽ siwo trɔa wo ɖokui ɖe ame ƒe nɔnɔme me siwo xea mɔ na amewo be woagaɖo Nirvana si nye afisi ame ƒe dzodzro ɖesiaɖe nu tsina le la o. Ameblela gãtɔ le wo domee nye Mara kple via etɔ̃ siwo ƒe ŋkɔe nye Rati (Didi), Raga (Dzidzɔ), kple Tanha (Tamanamana).

Chinatɔwo doa gaglãgbedzo, wosia akakatiwo, hedaa safuituwo alo fefetuwo bene yewoatsɔ akpɔ yewo ɖokui ta tso kuei alo dzɔdzɔmegbɔgbɔ vɔ̃wo si me. Woxɔe se le Japan-subɔsubɔhawo hã me be gbɔgbɔ vɔ̃ geɖewo li, esiwo dome tengu si ɖi vɔvɔ̃ hã le, eye gbɔgbɔ siawo nɔa amewo me vaseɖe esime nunɔla aɖe nanyã wo ado goe.

Woxɔe se le subɔsubɔha siwo ƒe subɔsubɔ ŋuti nuŋlɔɖi aɖeke mele o le Asia, Afrika, Oceania, kple Amerika-nutowo me be gbɔgbɔmenuwɔwɔwo kpena ɖe ame ŋu alo wowɔa nuvevi ame, wowɔa esia le dzidzɔ alo dziku ƒe nɔnɔme si me wole la nu. Amewo subɔa gbɔgbɔ siawo be woaɖe dzɔgbevɔ̃e le mɔ dzi na yewo eye woana nu nyui yewo ɖe eteƒe.

Ne ètsɔ alesi amewo le vivi dom ɖe akunyawɔwɔ kple gbɔgbɔyɔyɔ ŋu kpe ɖe esiawo katã ŋu la, eme akɔ na wò be gbɔgbɔ vɔ̃wo dzixɔse ƒe ŋutinya gbɔ didi eye wòkaka ɖe afisiafi. Gake ɖe susu le eme be woaxɔe ase be nuwɔwɔ mawo lia? Biblia gblɔ be woli. Gake ne woli vavã la, ke nukatae Mawu ɖe mɔ na wo be woakpɔ ŋusẽ ɖe amegbetɔwo dzi ahagblẽ nu le wo ŋu?