Vɔ̃ɖinyenye Ƒe Dɔlawo

AKPA si wɔm gbɔgbɔ vɔ̃wo le le amegbetɔwo ƒe nyawo me ŋuti numeɖeɖe si le Biblia me la ɖo vɔ̃wɔwɔ ŋuti nyabiabia vevi siwo anye ne womakpɔ ŋuɖoɖo na wo hafi o la ŋu. Le kpɔɖeŋu me, bu nya si agbalẽ si nye International Herald Tribune gblɔ le aʋawɔwɔ si le edzi yim le Balka-nutowo me ŋu kpɔ: “Europatɔwo ƒe Habɔbɔ ƒe numekuha aɖe ƒo nya ta be [asrafowo] dɔ Moslemtɔ siwo nye nyɔnuwo kple nyɔnuviwo dometɔ 20,000 sɔŋ gbɔ sesẽe . . . si nye ŋɔdzidoname ƒe nugbeɖoɖo be woatsɔ ado vɔvɔ̃ na wo, aɖe dzi le wo ƒo eye woazi wo dzi be woadzo le woƒe aƒewo me.”

Woŋlɔ nya aɖe ɖe Time magazine me tsɔ dze agbagba be woaɖe nya sia mee be: “Ɣeaɖewoɣi la, ɖekakpui siwo le aʋagbedzi dɔa nyɔnuwo gbɔ sesẽe be yewoƒe nu nadze yewoƒe ame tsitsiwo, amegãwo ŋu ne woakpɔ ŋudzedze ɖe yewo ŋu abe vi kple tɔ ene. Nyɔnuwo gbɔ dɔdɔ sesẽe sia nyea kpeɖodzi be yewoda asi ɖe yewoƒe asrafoha si me yewole la ƒe ŋutasẽnuwɔna dzi. Ðekakpui si lɔ̃ be yeawɔ tagbɔsesẽnuwo la tea eƒe dzitsinya ɖe to be wòate ŋu awɔ ɖeka kple ƒuƒoƒoa ƒe tameɖoɖo matrɔmatrɔwo. Wotsɔa ŋutasẽnuwɔwɔ ɖoa kpe woƒe nuteƒewɔwɔ dzii.”

Gake nukata “ƒuƒoƒoa ƒe tameɖoɖo matrɔmatrɔwo” gblẽna wu ƒuƒoƒoa me tɔwo ƒe dzitsinya? Ne womã wo me ɖekaɖekae la, wo dometɔ ɖesiaɖe kloe dina be yeanɔ ŋutifafa me kple ye havi. Eyata nukatae le aʋaŋɔli la, amewo dɔa nyɔnuwo gbɔ sesẽe, wɔa funyafunya amewo hewua wo nɔewo? Susu vevi siwo tae dometɔ ɖekae nye be gbɔgbɔ vɔ̃woe le wo dom.

Akpa si wɔm gbɔgbɔ vɔ̃wo le gɔmesese hã na míekpɔ ŋuɖoɖo na nusi ame aɖewo yɔna be “mawunyaŋununyala ƒe kuxi.” Kuxi lae nye alesi woawɔ be ɖekawɔwɔ nanɔ nya etɔ̃ siawo dome: (1) Mawu nye ŋusẽkatãtɔ; (2) Mawu nye lɔlɔ̃ eye eƒe dɔme nyo; kple (3) nu dziŋɔwo dzɔna. Ame aɖewo bunɛ be anya wɔ be woana ɖekawɔwɔ nanɔ nya siawo dometɔ eve dome, gake ɖekawɔwɔ mate ŋu anɔ wo ame etɔ̃a katã dome gbeɖe o. Mawu ƒe Nya la ŋutɔ ɖo eŋu na mí, eye gbɔgbɔ makpɔmakpɔ siwo nye nuvɔ̃ɖiwɔlawo ŋue ŋuɖoɖoa ku ɖo.

Aglãdzela Gbãtɔ

Biblia gblɔ na mí be Mawu ŋutɔ nye gbɔgbɔ. (Yohanes 4:24) Emegbe Ewɔ gbɔgbɔmeme miliɔn bubu geɖe siwo nye mawudɔlawo hã. Mawu subɔla Daniel kpɔ mawudɔla miliɔn alafa ɖeka le ŋutega me. Gbɔgbɔmeme siwo katã Yehowa wɔ la nye ame dzɔdzɔe siwo wɔa eƒe lɔlɔ̃nu.—Daniel 7:10; Hebritɔwo 1:7.

Emegbe esi Mawu “ɖo anyigba gɔme anyi” la, mawudɔla siawo ‘tso aseye’ ‘eye wogli kple dzidzɔ.’ (Hiob 38:4-7) Gake didi va ge ɖe wo dometɔ ɖeka me be subɔsubɔ si dze na Wɔla la ɖeka ko la nazu ye tɔ. Esi mawudɔla sia dze aglã ɖe Mawu ŋu ko la, ewɔ eɖokui satana (si gɔmee nye “tsitretsiɖeŋula”) kple abosam (si gɔmee nye “ameŋugblẽla”).—Tsɔe sɔ kple Xezekiel 28:13-15.

Satana to da aɖe dzi le Eden-bɔa me ƒo nu na nyɔnu gbãtɔ Xawa eye wòblee be wòda le Mawu ƒe se si wòde tẽ be womegaɖu abɔmeti aɖe ƒe tsetse o la dzi. Emegbe srɔ̃a hã wɔ ɖeka kplii. Ale ame eve gbãtɔwo wɔ ɖeka kple mawudɔla la eye wodze aglã ɖe Yehowa ŋu.—Mose I, 2:17; 3:1-6.

Togbɔ be nusiwo dzɔ le Eden adze abe toɖoɖo ŋuti nufiame nyui si me kɔ ene hã la, Satana fɔ agbenɔnɔ ŋu nya vevi eve ɖe tsitre. Gbã, Satana ke ɖi nenye be Yehowa le eƒe nuwɔwɔwo dzi ɖum le dzɔdzɔenyenye me be wòaɖe vi na wo bliboe. Ðewohĩ amegbetɔwo ate ŋu aɖu wo ɖokui dzi wòanyo wu. Evelia, Satana ke ɖi be ɖe nuwɔwɔ nyanu aɖe ate ŋu ayi edzi aɖi anukware na Mawu ahawɔ nuteƒe nɛ ne edze abe toɖoɖo mele vi aɖeke ɖem nɛ le ŋutilã me ene o hã.a

Nya siwo fɔ ɖe te le Eden gɔmesese nyuie kple sidzedze Yehowa ƒe amenyenyewo akpe ɖe mía ŋu míase “mawunyaŋununyala ƒe kuxi” la, si nye alesi woana gbɔgbɔ vɔ̃wo ƒe anyinɔnɔ kple Mawu ƒe amenyenye si nye ŋusẽ kple lɔlɔ̃ nawɔ ɖeka la ƒe ŋuɖoɖo gɔme. Togbɔ be enye nyateƒe be ŋusẽ si seɖoƒe meli na o ye le Yehowa si eye lɔlɔ̃ le esi hã la, nunya hã le esi eye wònye dzɔdzɔetɔ. Ewɔa amenyenye ene siawo ŋudɔ wòdana sɔna pɛpɛpɛ. Eyata mewɔ eƒe ŋusẽ si nu womate ŋu axe mɔ ɖo o la ŋudɔ tsɔ tsrɔ̃ aglãdzela etɔ̃awo enumake o. Ema anye nu dzɔdzɔe wɔwɔ gake mefia kokoko be anye nusi me nunya kple lɔlɔ̃ anɔ o. Hekpe ɖe eŋu la, metsɔe ke wo heɖe asi le nya la ŋu ko o, esi nye nusi ame aɖewo asusu be enye lɔlɔ̃ si wòaɖe afia hafi. Ne ewɔe nenema la, menye nusi me nunya kple dzɔdzɔenyenye le o.

Ehiã ɣeyiɣi be woatsɔ akpɔ nya siwo Satana fɔ ɖe te la gbɔe. Axɔ ɣeyiɣi hafi woate ŋu aɖo kpe edzi nenye be amegbetɔwo ate ŋu aɖu wo ɖokui dzi Mawu manɔmee wòadze edzi alo madze edzi o. Yehowa ƒe mɔɖeɖe be aglãdzela etɔ̃awo nanɔ anyi la wɔe hã be nuwɔwɔwo ate ŋu ado aʋatsokala Satana to woƒe nuteƒewɔwɔ na Mawu le nɔnɔme sesẽwo me la me.b

Yehowa gblɔ na Adam kple Xawa kɔte be ne woɖu ati si ŋuti yede se ɖo na wo la, woaku. Eye togbɔ be Satana ka ɖe edzi na Xawa be wo maku o hã la, woku. Wobu fɔ Satana hã be woatsrɔ̃e; gake do ŋgɔ na eƒe tsɔtsrɔ̃ la, ekpɔtɔ le ameƒomea blem. Le nyateƒe me la, Biblia gblɔ be: “Xexeme blibo la katã le vɔ̃ɖitɔ la me.”—Yohanes I, 5:19; Mose I, 2:16, 17; 3:4; 5:5.

Mawudɔla Bubuwo Hã Dze Aglã

Le Eden-bɔ me nudzɔdzɔwo megbe kpuie la, mawudɔla bubuwo hã dze aglã ɖe Yehowa ƒe dziɖulanyenye ŋu. Biblia gblɔ be: “Esi amewo de asi agbɔsɔsɔ me le anyigba dzi, eye wodzi nyɔnuwo la, mawuviwo kpɔ bena, amegbetɔviwo ƒe nyɔnuwo dze tugbe ŋutɔ, eye woɖe wo dometɔ, siwo katã dze wo ŋu.” Ne míagblɔe bubui la, mawudɔla siawo “gblẽ woa ŋutɔwo ƒe nɔƒe [si le dziƒo la] ɖi” eye wodo amegbetɔŋutilã heɖi va anyigba dzi va nɔ agbe gbegblẽ kple nyɔnuwo.—Mose I, 6:1, 2; Yuda 6.

Nuŋlɔɖia yi edzi le Mose I, 6:4 be: “Le ŋkeke mawo me la ame dzɔtsuwo [Nefilimwo] le anyigba dzi; eye esi Mawu viŋutsuwo ɖe amegbetɔwo ƒe vinyɔnuwo, eye wodzi vi na wo megbe la hã wogale; woawo nye ame kako ŋkɔxɔla, siwo nɔ agbe le blema.” Ŋusẽ nɔ dzidehlɔ̃mevi siawo siwo mawudɔlawo dzi na nyɔnuwo la ŋu wògbɔ eme, wonye “ame kakowo.” Wonye ŋutasẽnuwɔlawo alo Nephi-limʹ si nye Hebrigbe me nya si gɔmee nye “amemulawo.”

Enye nusi ɖe dzesi be nudzɔdzɔ siawo va dze le blema ŋutinya ƒe nuŋlɔɖiwo me emegbe. Le kpɔɖeŋu me, Babilontɔwo ƒe xotutu didi aɖe si xɔ ƒe 4,000 la ɖɔ Gilgamesh si nye mawu-afã-amegbetɔ-afã ŋusẽtɔ kple ŋutasẽla, amesi ƒe “nudzodzro [megblẽa] ɖetugbi aɖeke ɖi na eƒe lɔlɔ̃tɔ o” la ƒe nuwɔna si de ŋgɔ wu amegbetɔwo tɔ. Kpɔɖeŋu bubu si tso Helatɔwo ƒe xotutu mee nye Hercules (alo Heracles) si sẽ wu amegbetɔwo. Amegbetɔ si ŋkɔe nye Alcmene yee dzii na mawu Zeus si nye fofoa, eye esi Hercules wu srɔ̃a kple viawo le tsukukunuwɔna aɖe me vɔ megbe la, ezɔ mɔ zi geɖe va wɔ nu vlowo. Togbɔ be wotro glitoto siawo ŋutɔ esi wonɔ wogblɔm tso dzidzime yi dzidzime hã la, wowɔ ɖeka kple nusi Biblia gblɔ le Nefilimwo kple wo fofo siwo nye mawudɔla dzeaglãwo ŋu.

Le mawudɔla vɔ̃ɖiawo kple wo vi siwo sẽ wu amegbetɔwo ƒe ŋusẽkpɔɖeamedzi ta la, nuvlowɔwɔ va xɔ anyigba la dzi ale gbegbe be Yehowa ɖoe be yeatsɔ tsiɖɔɖɔ gã aɖe atsrɔ̃ xexeamee. Wotsrɔ̃ Nefilimwo kple ame mavɔ̃mawuwo katã; ame dzɔdzɔe Noa kple eƒe ƒomea koe nye amegbetɔ siwo tsi agbe.—Mose I, 6:11; 7:23.

Gake mawudɔla vɔ̃ɖiawo meku o. Ke boŋ woɖe woƒe amegbetɔŋutilã ɖi eye woyi gbɔgbɔmenutowo me. Le woƒe tomaɖomaɖo ta womegaɖe mɔ na wo be woage ɖe Mawu ƒe ƒome si me mawudɔla dzɔdzɔeawo le me o; eye womegaɖe mɔ na wo hã be woagado amegbetɔŋutilã ake abe alesi wodoe le Noa ƒe ŋkekea me ene o. Wogale ŋusẽ gbegblẽ kpɔm ɖe ameƒomea dzi kokoko le Satana Abosam si nye “gbɔgbɔ vɔ̃wo ƒe fia” la ƒe kpɔkplɔ te.—Mateo 9:34; Petro II, 2:4; Yuda 6.

Ameƒomea ƒe Futɔwo

Satana kple gbɔgbɔ vɔ̃wo wua amewo hesẽa ŋuta le wo ŋu ɣesiaɣi. Satana to mɔ vovovowo dzi lɔ Hiob ƒe lãhawo dzoe eye wòwu eƒe dɔlawo dometɔ akpa gãtɔ. Emegbe ewu Hiob ƒe vi ewo esi wòna “ya ʋudu” aɖe ƒo va gbã aƒe si me wonɔ. Esia megbe Satana kplɔ “ƒoƒoe vɔ̃ɖi ƒu Hiob tso eƒe afɔƒome vaseɖe eƒe dzodome.”—Hiob 1:7-19; 2:3, 7.

Gbɔgbɔ vɔ̃wo hã ɖea nɔnɔme vɔ̃ɖi sia ke fiana. Wona amewo zu aɖetututɔwo kple ŋkuagbãtɔwo le Yesu ƒe ŋkekea me. Wona ŋutsu aɖe tsɔ kpe nɔ xaxlãm ɖe eɖokui. Wohe ŋutsuvi aɖe ƒu anyi “eye [wonyamae] ŋutɔ.”—Luka 9:42; Mateo 9:32, 33; 12:22; Marko 5:5.

Nyatakaka siwo tso xexeame katã ɖee fia be Satana kple gbɔgbɔ vɔ̃wo gale ŋuta sẽm kokoko abe tsã ene. Wotsɔ dɔléle ƒu ame aɖewo. Woɖea fu na ame bubuwo hã be wotsia zãdomadɔalɔ̃e alo wona wokua drɔ̃e nyamanyamawo alo wodɔa wo gbɔ. Wona ame aɖewo hã ku tsu, ɖewo wu ame, alo wowu wo ɖokui.

Vaseɖe Ɣekaɣie Woaɖe Mɔ na Wo Ase Ðo?

Womaɖe mɔ Satana kple eƒe gbɔgbɔ vɔ̃wo nanɔ anyi tegbee o. Susu nyui aɖe tae Yehowa ɖe mɔ na wo be woli vaseɖe míaƒe ŋkekea me, gake fifia woƒe ɣeyiɣia vɔ vɔ. Woɖe afɔ vevi aɖe le ƒe alafa sia ƒe gɔmedzedze me tsɔ ɖe woƒe dɔwɔnawo dzi kpɔtɔ. Nyaɖeɖefia ƒe agbalẽa ɖe eme be: “Aʋa dzɔ le dziƒo: Mixael [Yesu Kristo si wofɔ ɖe tsitre] kple eƒe dɔlawo yi aʋa wɔ ge kple ʋɔ driba la. Eye ʋɔ driba kple eƒe dɔlawo wɔ aʋa la, eye womeɖu dzi o, eye womegakpɔ woƒe teƒe hã le dziƒo o. Eye wotsɔ ʋɔ driba gã, si nye da xoxo la, esi woyɔna be: Abosam kple Satana, amesi nye xexeame katã blela la, ƒu gbe, eye wotsɔe ƒu gbe ɖe anyigba, eye wotsɔ eƒe dɔlawo hã ƒu gbe ɖe anyi hekpe ɖe eŋuti.”—Nyaɖeɖefia 12:7-9.

Nukae do tso eme? Nuŋlɔɖia yi edzi be: “Eyata dzi nedzɔ mi, mi dziƒowo kple amesiwo nɔ wo me la!” Dzi adzɔ mawudɔla dzɔdzɔeawo elabena Satana kple eƒe gbɔgbɔ vɔ̃wo megale dziƒo o. Ke anyigba dzi tɔwo ya ɖe? Biblia gblɔ be: “Baba na anyigba kple atsiaƒu; elabena Abosam ɖi va mia gbɔ, eye dzi le ekum ŋutɔ; elabana enyae be, vovoɣi vi aɖe ko yekpɔ.”—Nyaɖeɖefia 12:12.

Le dziku me Satana kple eteviwo ɖoe kplikpaa be yewoawɔ fu amewo ɖe edzi alesi yewoate ŋui hafi woava tsrɔ̃ yewo keŋkeŋ. Le ƒe alafa sia me la, xexemeʋa eve dzɔ eye tso xexemeʋa evelia ƒe nuwuwu dzi wowɔ aʋa suesue 150 kple edzivɔ. Nyagbe aɖewo siwo ɖe dzidzime sia ƒe nuvlowɔwɔ fia la va ge ɖe míaƒe nyagbɔgblɔwo me: “dɔlékuiwo ŋudɔwɔwɔ abe aʋawɔnuwo ene le aʋawɔwɔ me,” “Dzo ƒe Ametsɔtsrɔ̃ Gã la,” “amewugbedziwo,” “nyɔnudzizisaɖawo,” “amewula siwo wua ame tre ɖe enu,” kple “bɔmbwo.” Atike vɔ̃ɖiwo, amewuwu, bɔmb dada, tsukunɔwo ƒe amelã ɖuɖu, ame gbogbowo wuwu zi ɖeka, dɔtoto, kple funyafunyawɔwɔ amewo yɔ nyatakakawo me taŋ.

Nusi nye dzidzɔnyae nye be nusiawo anɔ anyi ɣeyiɣi kpui aɖe ko. Eteƒe madidi kura o Mawu agatu nu kple Satana kple eƒe gbɔgbɔ vɔ̃wo. Esi apostolo Yohanes nɔ nu ƒom le ŋutega aɖe si wòxɔ tso Mawu gbɔ ŋu la, egblɔ be: “Mekpɔ mawudɔla aɖe le ɖiɖim tso dziƒo, eye aʋli me safui kple kɔsɔkɔsɔ gã aɖe le esi. Eye wòlé ʋɔ driba, da xoxo, si nye Abosam kple Satana la, eye wòblae ƒe akpe ɖeka. Eye wotsɔe ƒu gbe ɖe aʋli me, eye wotu nu ɖe enu, eye wotre enu, bena ne wòagable dukɔwo o, halase esime ƒe akpe ɖeka la nu nava yi.”—Nyaɖeɖefia 20:1-3.

Esia megbe “woagatu” Abosam kple eƒe gbɔgbɔ vɔ̃wo “ɣeyiɣi vi aɖe,” eye ekema woatsrɔ̃ wo gbidigbidi tegbee. (Nyaɖeɖefia 20:3, 10) Ɣeyiɣi wɔnuku kae nye si wòanye! Esi woaɖe Satana kple eƒe gbɔgbɔ vɔ̃wo ɖa tegbee la, Yehowa azu ‘nusianu na amesiame.’ Eye “dzi adzɔ” amesiame “ɖe ŋutifafa gbogbo la ŋuti” vavã.—Korintotɔwo I, 15:28; Psalmo 37:11.

[Etenuŋɔŋlɔwo]

[Nɔnɔmetata si le axa 7]

Amegbetɔwo gbɔ koe nusiawo tsoa, alo ɖe fɔbubua le vivimeŋusẽ vɔ̃ɖi aɖe hã dzia?

[Afi Si Míexɔ Mɔɖeɖe Tso]

Amiʋe siwo nɔ bibim le Kuwait, le ƒe 1991 me: Chamussy/Sipa Press

[Nɔnɔmetata si le axa 7]

Ɣeyiɣi wɔnuku kae nye esi wòanye ne gbɔgbɔ vɔ̃wo magaɖe fu na ameƒomea o!