Ðe Yehowa Ðasefowo Nye Vivimehaa?

WOTSÒ Yesu Kristo nu be enye ahamula, nutsuɖula, Sabat Se dzi dala, aʋatsoɖaseɖila, busudomawula, kple Satana ƒe dɔla. Wotsɔ nya ɖe eŋu hã be dugbãnuwɔlae wònye.—Mateo 9:34; 11:19; 12:24; 26:65; Yohanes 8:13; 9:16; 19:12.

Le Yesu ƒe ku kple tsitretsitsi megbe la, wotso eƒe nusrɔ̃lawo hã nu vevie nenema ke. Amewo he ƒe alafa gbãtɔ me Kristotɔwo ƒe ƒuƒoƒo aɖe yi dumegãwo gbɔ hedo ɣli be: ‘Amesiawoe de zi xexeame.’ (Dɔwɔwɔwo 17:6) Wokplɔ apostolo Paulo kple eƒe zɔhɛ Sila yi dziɖuɖumegãwo gbɔ ɣebubuɣi hetso wo nu be wole fu ɖem na amewo ŋutɔ le Filipi-dua me.—Dɔwɔwɔwo 16:20.

Emegbe wotso Paulo nu be enye “dɔvɔ̃ kple amesi dea zi Yudatɔwo katã dome le xexeame godoo” eye ete kpɔ hã be ‘yeagblẽ kɔ ɖo na gbedoxɔ la.’ (Dɔwɔwɔwo 24:5, 6) Yudatɔwo ƒe amegã siwo nɔ Roma la ƒo nu tso Yesu yomedzelawo ƒe nɔnɔme ŋu wòsɔ esime wogblɔ be: “Wogblɔ nya ɖe kɔmamã sia ŋuti le afisiafi.”—Dɔwɔwɔwo 28:22.

Edze ƒã be ame aɖewo bu ƒuƒoƒo yeye sia si Yesu Kristo ɖo anyi la be enye subɔsubɔha si ƒe nukpɔsusu kple nuwɔnawo mewɔ ɖeka kple hadomenuwɔna si dzi woda asi ɖo le ŋkeke mawo me o. Ðikeke mele eme o be ame geɖe siwo li egbea abu Kristotɔ mawo be wonye vivimeha si gblẽa nu. Zi geɖe la, amenutsolawo nyea ame ŋkuta siwo ŋu wodea bubui le nutoa me, eye edze abe esia naa nutsotsoawo dzea nya gãe ene. Ame geɖe xɔ Yesu kple eƒe nusrɔ̃lawo nutsonyawo dzi se. Gake abe alesi ɖewohĩ nànyae ene la, nutsotso siawo katã nye aʋatso! Nyateƒe si wònye be amewo gblɔ nya siawo mena wozu nyateƒenyawo o.

Egbea ya ɖe? Ðe wòasɔ be woagblɔ be Yehowa Ðasefowo nye subɔsubɔha si me tɔwo ƒe nukpɔsusu kple nuwɔnawo mewɔ ɖeka kple hadomenuwɔna siwo dzi woda asi ɖo oa? Ðe Yehowa Ðasefowo nye vivimehaa?

Nusi Ðaseɖiɖiawo Ðe Fia

Dziɖuɖumegã aɖe si le St. Petersburg, Russia, la gblɔ be: “Wogblɔ na mí be Yehowa Ðasefowo nye adzamekɔmamã ƒomevi aɖe siwo ɣla wo ɖokui hewua ɖeviwo kple woa ŋutɔ ɖokui.” Gake nyitsɔ laa la, Russiatɔwo va nya alesi Ðasefowo le ŋutɔŋutɔ la nyuie. Esi dziɖuɖumegã ma ke wɔ dɔ kple Yehowa Ðasefowo le dukɔwo dome takpekpe aɖe ŋuti ɖoɖowɔwɔwo me la, egblɔ be: “Fifia ya ame nyui siwo ɖo nukomo eye wonyo wu ame geɖe siwo menya gɔ̃ hã la kpɔmee mele. Wonye ŋutifafamewo kple ame fafawo, eye wolɔ̃ wo nɔewo ŋutɔ.” Egblɔ kpee be: “Nyemese nusita amewo gblɔa alakpanya siawo tɔgbe ɖe wo ŋu la gɔme o.”

Yehowa Ðasefowo mekpea ta wɔa kɔnuwo o eye womedea ta agu le adzame hã o. Nuŋlɔla Julia Mitchell Corbett si menye Ðasefo o la de dzesii be: “Ne wokpe ta, zi geɖe esi wua zi ɖeka le kwasiɖa me le woƒe Fiaɖuƒe Akpatawo me (womeyɔa woƒe takpeƒewo be sɔleme o) la, wozãa woƒe ɣeyiɣi ƒe akpa gãtɔ ɖe Biblia-nusɔsrɔ̃ kple numedzodzro ŋu.” Woŋlɔ “Fiaɖuƒe Akpata” ɖe woƒe takpeƒewo ŋu tsɔ de dzesi woe. Amesiame kpɔa gome le kpekpeawo me eye wokpea amesiame be wòava. Woxɔa amesiwo womenya o siwo vaa afima la kple dzidzɔ.

Corbett gblɔ kpee le eƒe agbalẽ si nye Religion in America me be: “Wonya Ðasefowo nyuie le woƒe anukwareɖiɖi, ŋuɖɔɖo, kple dɔwɔwɔ ta.” Ame geɖe siwo menye Ðasefowo o la gblɔna be Yehowa Ðasefowo ƒe nuwɔna aɖeke megbɔ eme o. Woƒe nuwɔna meto vovo na hadomenuwɔna siwo dzi woda asi ɖo aɖeke o. The New Encyclopædia Britannica gblɔe wòsɔ be Ðasefowo “léa agbenyuinɔnɔ ƒe dzidzenu kɔkɔ me ɖe asi le woa ŋutɔwo ƒe nuwɔnawo me.”

Television dɔwɔƒe aɖe si le United States ƒe nyadzɔdzɔwo kple dɔ tɔxɛwo dzikpɔlagã ŋlɔ agbalẽ na Yehowa Ðasefowo tsɔ ɖo nyatakaka aɖe si ɖe nazãbubu fia ɖe Ðasefowo ŋu le television dzi nyadzɔdzɔ si wona ŋkɔe be 60 Minutes me la ŋui. Egblɔ be: “Ne ame geɖe nɔ agbe ɖe miaƒe xɔsea nu la, dukɔ sia manɔ abe alesi wòle fifia o. Nyadzɔdzɔdɔwɔla siwo nya be wotu miaƒe habɔbɔa ɖe lɔlɔ̃ kple Wɔla la dzi xɔxɔ se vevie dzi la dometɔ ɖekae menye. Medi be mana mianya be menye Nyadzɔdzɔdɔwɔlawo katãe bua nazã ɖe mia ŋu o.”

Subɔsubɔha si Wonya Nyuie

Ðe wòsɔ be woagblɔ be Yehowa Ðasefowo nye subɔsubɔha sue aɖe si mã tso bubu aɖe gbɔa? Ne wotsɔ Yehowa Ðasefowo ƒe agbɔsɔsɔ sɔ kple subɔsubɔha aɖewo la, womesɔ gbɔ ya o. Gake ɖo ŋku nusi Yesu gblɔ la dzi be: “Agbo la le biie, eye mɔ la hã xaxa, si kplɔa amewo yina ɖe agbe la me, eye ame ʋeewo nye amesiwo kpɔnɛ.”—Mateo 7:13, 14.

Gake Ðasefowo menye vivimeha sue si mã tso bubu aɖe gbɔ o. Le ƒe 1993 ƒe adame la, amesiwo wu miliɔn 11 ye de Kristo ƒe ku ƒe Ŋkuɖodzi si Ðasefowo ɖuna la. Gake nusi le vevie wu woƒe agbɔsɔsɔe nye woƒe agbenyuinɔnɔ kple nuwɔna si nye kpɔɖeŋu si na xexeame katã kafu wo la. Ðikeke mele eme o be esia tae woda asi ɖe wo dzi le dukɔ geɖe me be wonye subɔsubɔha si ɖia anukware.

Esi ɖe dzesi wue nye Europatɔwo ƒe Amegbetɔ ƒe Gomenɔamesi Dɔwɔƒea ƒe ʋɔnu si wòdrɔ̃ nyitsɔ laa. Egblɔ be ablɔɖe le Ðasefowo si le tamesusu, dzitsinya, kple mawusubɔsubɔ me eye be gome le wo si be woaƒo nu tso woƒe xɔse ŋu ahafia nu ame bubuwo tso eŋu. Mate ŋu ava eme alea ne Yehowa Ðasefowo nye ametafala siwo blea amewo nu vaa woƒe hamea me alo ne wowɔa ayemenuwo tsɔ kpɔa ŋusẽ ɖe wo yomedzelawo ƒe susu dzi o.

Ame geɖe nya Yehowa Ðasefowo nyuie le xexeame katã. Míabia ame miliɔn geɖe siwo le Biblia srɔ̃m kple Ðasefowo alo amesiwo srɔ̃e kpli wo kpɔ la be, Ðe Ðasefowo dze agbagba be yewoazi yewoƒe nufiafia ɖe mia dzia? Ðe Ðasefowo to mɔ aɖewo dzi be yewoatrɔ miaƒe susua? Ðikeke mele eme o be miaɖo eŋu le nyateƒe me be “Ao.” Edze ƒã be ɖe woto mɔ siawo dzi la, ne ame geɖe siwo ŋu wowɔ nusiawo ɖo la atsi tre ɖe Ðasefowo taʋlinya ɖesiaɖe ŋu.

“Wolɔ̃a Kpekpeɖeŋu Nana Amewo Vevie”

Vivimeha me tɔwo ɖea wo ɖokui ɖe aga zi geɖe tso ƒometɔwo, xɔlɔ̃wo, kple ame bubuwo katã gɔ̃ hã gbɔ. Nenemae Ðasefowo lea? Nyadzɔdzɔdɔwɔla aɖe si le Czech Dukɔa me la ŋlɔ bena: “Menye Yehowa Ðasefoe menye o.” Gake eyi edzi gblɔ be: “Edze ƒã be [Yehowa Ðasefowo] nɔa agbe nyui ŋutɔ. . . . Wodea bubu dziɖuŋusẽwo ŋu, gake woxɔe se be Mawu ƒe Fiaɖuƒea koe ate ŋu akpɔ amegbetɔwo ƒe kuxiwo katã gbɔ. Gake de dzesii—womenye subɔsubɔnyahelawo o. Wonye amesiwo lɔ̃a kpekpeɖeŋu nana amewo vevie.”

Wometia teƒe aɖe va nɔ heɖe wo ɖokui ɖe aga tso ƒometɔwo kple ame bubuwo gbɔ o. Yehowa Ðasefowo nya be enye yewoƒe agbanɔamedzi si tso Ŋɔŋlɔawo me be yewoalɔ̃ yewoƒe ƒometɔwo ahakpɔ wo dzi. Wonɔa ameƒomevi kple subɔsubɔha bubu me tɔwo katã dome hewɔa dɔ kpli wo. Ne afɔku dzɔ la, wowɔa kaba ɖoa kpekpeɖeŋununana ɖe afima eye wova wɔa kpekpeɖeŋudɔwo hã le afima.

Vevietɔ wu la, wole nufiafiadɔ si ɖeke mesɔ kpli o la wɔm. Subɔsubɔha nenie wɔ ɖoɖo ɖe amesiame si le woƒe nutoa me sasrãkpɔ ŋu? Yehowa Ðasefowo le esia wɔm le dukɔ siwo wu 200 me le gbegbɔgblɔ siwo wu 200 me! Edze ƒã be Yehowa Ðasefowo “lɔ̃a kpekpeɖeŋu nana amewo.”

Wodzea Biblia ƒe Nufiafia Yome Tututu

Enye nyateƒe be Yehowa Ðasefowo ƒe nufiafiawo to vovo tso esiwo sɔlemehawo fiana gbɔ. Yehowa Ðasefowo xɔe se be Yehowae nye Mawu Ŋusẽkatãtɔ eye be Yesue nye Via, menye mawuɖekaetɔ̃ ƒe akpa aɖe o. Wotu woƒe xɔse ɖe dzixɔse si nye be Mawu ƒe Fiaɖuƒea koe ate ŋu ahe ŋutasẽnuwɔnawo ava nuwuwui la dzi. Woxlɔ̃a nu amewo le nuɖoanyi vɔ̃ɖi sia ƒe tsɔtsrɔ̃ si tu aƒe ŋu. Woɖea gbeƒã ŋugbe si Mawu do be yeatsɔ paradisonyigba ana ameƒomea me tɔ toɖolawo la. Womesubɔa atitsoga o. Womeɖua Kristmas o. Woxɔe se be luʋɔ kuna eye be dzomavɔ aɖeke meli o. Womeɖua ʋu alo donɛ o. Womekpɔa gome le dunyahehe kple aʋawɔwɔ me o. Ðe nèbia ɖokuiwò kpɔ be nukatae Yehowa Ðasefowo ƒe nufiafiawo to vovo nenema gbegbe hã?

Nyadzɔdzɔgbalẽ aɖe si wotana le Massachusetts si ŋkɔe nye Daily Hampshire Gazette ɖe eme be Yehowa Ðasefowo ƒe “Biblia la gɔmeɖeɖe tututu xea mɔ ɖe nuwɔna geɖe siwo amewo susu be esɔ la nu . . . , wole agbagba sia katã dzem be yewoadze ƒe alafa gbãtɔ me Kristotɔwo kple nya siwo le Biblia me la yome.” The Encyclopedia of Religion lɔ̃ ɖe edzi be “nusianu si dzi woxɔ se la nɔ te ɖe Biblia dzi. ‘Woɖoa kpe (si nye be wotsɔa mawunyakpukpui ɖoa kpe) xɔsenya ɖesiaɖe’ dzi eye woka ɖe Biblia si ɖua kɔnyinyiwo dzi la ƒe ŋusẽ dzi bliboe.” Agbalẽ si nye Religion in America gblɔ be: “Ƒuƒoƒoa mete ɖa le Biblia sɔsrɔ̃ gbɔ kpɔ o, eye wotsɔa ŋɔŋlɔawo me ɖeɖe detowo ɖoa kpe woƒe nufiafiawo dzii.”

Amekae Nye Woƒe Ŋgɔnɔla?

Alesi Yehowa Ðasefowo dze Biblia ƒe nufiafia yome tututu ta la, womesubɔa ŋgɔnɔla siwo nye amegbetɔwo abe alesi wòle le vivimehawo me egbea ene o. Wogbe vovototo dede nunɔlawo kple hameviwo dome ƒe nuwɔna la. The Encyclopedia of Religion gblɔe wòsɔ le Yehowa Ðasefowo ŋu be: “Womeɖoa nunɔlawo ƒe ha o eye wotsri dzesideŋkɔ tɔxɛwo zazã.”

Wodzea Yesu Kristo yome abe wo Ŋgɔnɔla kple Kristo-hamea ƒe Ta ene. Yesue gblɔ be: “Migana woayɔ mi be Rabi o, elabena ame ɖeka koe nye miaƒe nufiala, eye mi katã la nɔviwo mienye. Eye migayɔ ame aɖeke be mia fofo le anyigba dzi o; elabena ame ɖekae nye mia fofo, eyae le dziƒo. Eye womegayɔ mi be kplɔlawo o; elabena ame ɖekae nye miaƒe kplɔla, eyae nye Kristo.”—Mateo 23:8-12.

Edze ƒã be Yehowa Ðasefowo menye vivimeha kura o abe alesi Yesu menye nutsuɖula kple ahatsunola o ene. Enye nyateƒe be menye amesiwo katã dzi aʋatsonya siwo wogblɔ le Yesu kple eƒe nusrɔ̃lawo ŋu la kpɔ ŋusẽ ɖo lae gblɔ nya vɔ̃wo ɖe wo ŋu o. Le ame aɖewo gome la, ɖeko womegblɔ wo ŋuti nyateƒenyawo na wo o. Ne mèse Yehowa Ðasefowo kple woƒe dzixɔsewo gɔme o la, nukata màdze agbagba anya wo nyuie wu o? Woƒe Fiaɖuƒe Akpatawo ƒe ʋɔtruwo le ʋuʋu ɖi na nyateƒedilawo katã.

Wò hã àte ŋu akpɔ viɖe le woƒe sidzedze vavãtɔ si tso Biblia me la didi me eye àsrɔ̃ alesi nàde ta agu na Mawu wòasɔ kple Yesu ƒe nyawo be: “Gaƒoƒo gbɔna, eye wòde azɔ, esi nyateƒegbedoɖalawo ado gbe ɖa na Fofo la le gbɔgbɔ kple nyateƒe me; elabena Fofo la dia gbedoɖala siawo tɔgbe.”—Yohanes 4:23.