Vivimehawo—nukawoe Wonye?
FEBRUARY 28, 1993 dzie—setɔ siwo wu alafa ɖeka va ge ɖe aƒe siwo me ŋutsu, nyɔnu, kple ɖevi geɖewo le la me. Wonɔ lãnu siwo ŋu se meɖe mɔ ɖo be wòanɔ ame si o kple ame aɖe si wosusu be enye nuvlowɔla la dim. Gake ewɔ nuku na setɔ siawo esime ame aɖewo da tu wo tso xɔawo me. Woawo hã da tu ameawo.
Ame ewoe tsi aʋakpekpe sia me eye ame geɖe xɔ abi. Le ŋkeke 50 siwo kplɔe ɖo me la, dziɖuɖua ƒe setɔ alafa geɖe tsɔ tu gbogbo aɖe ɖe asi va ƒo xlã teƒea hewɔ aʋa sue aɖe. Aʋa la va ke eye ame 86 ye tsi eme, esiwo dome ɖevi 17 teti hã nɔ.
Amekawoe nye futɔ siwo wonɔ aʋa wɔm kpli? Atike vɔ̃ɖi dzrala aɖewoea? Vivimeʋawɔla aɖewoea? Ao. Ðewohĩ abe alesi nànyae ene la, “futɔawo” nye vivimeha me tɔwo ƒe ƒuƒoƒo aɖe. Woƒe nuwɔna la he xexeame katã ƒe susu va Texas, U.S.A. ƒe dzogbenuto si ɣla la dzi. Wonɔ egbɔgblɔ dzi le radio dzi eye nyatakakawo, numedzodzrowo, kple nya geɖe siwo amewo gblɔ le alesi vivimeha subɔsubɔnyahelawo nye afɔkui ŋu la va bɔ ɖe nyadzɔdzɔgbalẽwo me zi ɖeka.
Wohe amewo ƒe susu yi nudzɔdzɔ siwo me vivimeha ƒe ŋgɔnɔlawo kplɔ wo yomedzelawo de ku me le la dzi: Manson ƒe amewuwu le California le ƒe 1969 me; vivimeha aɖe me tɔ siwo wu wo ɖokui le agbɔsɔsɔ me le Jonestown, Guyana, le ƒe 1978 me; kple amewuwu kple ameɖokuiwuwu si ŋu vivimehaŋgɔnɔla Park Soon-ja si tso Korea nɔ ŋgɔ na le ƒe 1987 me, si me vivimeha me tɔ 32 ku le. Edze ƒã be amesiawo dometɔ geɖe gblɔ be Kristotɔwoe yewonye eye yewoxɔ Biblia la dzi se.
Vivimeha siawo ƒe Ŋɔŋlɔawo ŋudɔwɔwɔ le mɔ gbegblẽ nu alea wɔ nuku na ame geɖe siwo bua Biblia be enye Mawu ƒe Nya eye gɔmesese nɔ eŋu. Nusi do tso emee nye be wova ɖo habɔbɔ alafa geɖe le ƒe siwo va yi me siwo alé ŋku ɖe vivimehawo ŋu ahanɔ woƒe afɔkunuwɔnawo ɖem ɖe go. Vivimehaŋutinunyalawo gblɔ be vivimehawo adzi ɖe edzi ŋutɔ le ƒe akpe yeye si ava le ƒe ʋee aɖewo megbe la me. Nyadzɔdzɔgbalẽ aɖe de dzesii be ƒuƒoƒo siwo tsi tre ɖe vivimehawo ŋu gblɔ be vivimeha akpe geɖe li siwo “le klalo be yewoakpɔ ŋusẽ ɖe wò ŋutilã kple wò susu dzi ahagblẽ wò luʋɔ. . . . Wo dometɔ ʋee aɖewo ko sie aʋawɔnu le gake wobu wo dometɔ akpa gãtɔ be afɔku le wo ŋu. Woable wò axɔ wò ga kple wò nunɔamesiwo, woaɖe srɔ̃ na wò ahawɔ kunu hã na wò.”
Nukae Nye Vivimeha?
Ame geɖe siwo menya nusi “vivimeha” fia tututu o la zãnɛ madzemadzee. Mawuŋununyala aɖewo megazãnɛ kura o be wòagava tɔtɔ amewo o.
The World Book Encyclopedia ɖe eme be “tso blema ke la, wozãa nya vivimeha na tadedeagu alo subɔsubɔnuwɔna ɖesiaɖe ƒomevi.” Míate ŋu anɔ te ɖe nya sia dzi agblɔ be subɔsubɔhawo katã nye vivimehawo. Gake gɔmesese si to vovoe le “vivimeha” ŋu le alesi wozãnɛ egbea nu. Encyclopedia ma ke de dzesii be “tso keke ƒe 1900 ƒe ƒeawo me ke la, alesi vivimehawo va bɔe la na gɔmesese si le nya la ŋu trɔ. Wozãa nya la egbea na ƒuƒoƒo siwo me tɔwo nɔa kplɔla si nye amegbetɔ si doa eya ŋutɔ ƒe nufiafia kple nuwɔna yeyewo ɖe ŋgɔ yome la ŋu.”
Newsweek magazine lɔ̃ ɖe nya la zazã si bɔ la dzi heɖe eme be vivimehawo “nyea ƒuƒoƒo sue siwo mã tso bubuwo gbɔ siwo me tɔwo ƒe nuwɔna kple tameɖoɖo tsoa ame ɖeka si nye kplɔla ŋusẽtɔ gbɔ.” Nenema ke Asiaweek magazine hã de dzesii be “gɔmesese gobii aɖeke mele nya [vivimeha] la ŋu o, gake zi geɖe la, efiaa mawusubɔsubɔ ƒe xɔse yeye si wotu ɖe ŋgɔnɔla si me gbɔgbɔ le si gblɔna enuenu be yenye Mawu la dzi.”
Alesi wozã nya si nye vivimeha le Maryland Nuto si le U.S.A. ƒe Nyamedzroha ƒe Takpekpe 100 lia me hã fia nu bubu si bɔbɔ ɖe anyi wu. Wogblɔ le kpekpea me be “vivimeha nye ƒuƒoƒo alo habɔbɔ aɖe si me tɔwo tsɔ wo ɖokui katã na amegbetɔ alo dzixɔse aɖe eye wodzea aɖaŋu le amewo nu beble kple wo dzi ɖuɖu me tsɔ doa woƒe ŋgɔnɔlawo ƒe taɖodzinuwo ɖe ŋgɔ.”
Edze ƒã be ame geɖe nya be vivimehawo nye subɔsubɔha siwo ƒe nukpɔsusu kple nuwɔnawo mewɔ ɖeka kple hadomenuwɔna siwo dzi ame akpa gãtɔ da asi ɖo egbea o. Zi geɖe la, wowɔa woƒe subɔsubɔnuwɔnawo le vivi me. Vivimeha siawo dometɔ geɖe ɖea wo ɖokui ɖe aga le amenɔƒewo. Wotsɔa wo ɖokui naa amegbetɔ si ɖo eɖokui ŋgɔnɔlae la le nusianu me. Zi geɖe la, ŋgɔnɔla siawo gblɔna dadatɔe be Mawue tia yewo alo be mawumemewo yewonye.
Ɣeaɖewoɣi la, habɔbɔ siwo tsi tre ɖe vivimehawo ŋu kple nyadzɔdzɔgblɔlawo gblɔna be Yehowa Ðasefowo nye vivimeha. Nyadzɔdzɔgbalẽ me nyati geɖe siwo do nyitsɔ laa yɔ Ðasefowo kpe ɖe subɔsubɔha bubu siwo ƒe nuwɔnawo metoa mɔ ɖeka o ŋu. Gake ɖe wòasɔ be woabu Yehowa Ðasefowo be wonye subɔsubɔha sue aɖe si mã tso bubu aɖe gbɔa? Vivimeha me tɔwo ɖea wo ɖokui ɖe aga zi geɖe le wo xɔlɔ̃wo, ƒometɔwo, kple ame bubuwo katã gɔ̃ hã gbɔ. Nenemae Ðasefowo hã wɔnaa? Ðe Ðasefowo toa ayemɔ dzi hea amewo vaa woƒe ha mea?
Amewo nya be vivimehaŋgɔnɔlawo toa ayemɔ aɖewo dzi ɖua wo yomedzelawo dzi. Ðe ɖaseɖiɖi aɖe li be Yehowa Ðasefowo hã wɔa nusia? Ðe wowɔa woƒe subɔsubɔdɔ le vivi mea? Ðe wole ŋgɔnɔla aɖe si nye amegbetɔ yome hele esubɔmaa? Míabia kã be ɖe Yehowa Ðasefowo nye vivimehaa?
[Nɔnɔmetata Tsoƒe si le axa 3]
Jerry Hoefer/Fort Worth Star Telegram/Sipa Press