Ƒe Dzidziɖedzi Nyadzɔdzɔ Vɔ̃wo
ÈDE dzesii be tanya siwo ɖea gbeƒã nya vɔ̃wo nyɔa nuxlẽlawo ƒe ɖetsɔleme wu esiwo gblɔa nyanyuiwoa? Eɖanye nyadzɔdzɔgbalẽ me nyati si ku ɖe dzɔdzɔmefɔku aɖe ŋu alo nyasegblɔ ʋãme aɖe si dze gbadzaa le magazine dzeani aɖe ƒe ŋgɔgbekpa dzi o, edze abe woƒlea nya vɔ̃ ŋuti gbalẽwo wu nyanyuiwo tɔ ene.
Nya vɔ̃ mele vevem egbea o. Gake ɣeaɖewoɣi ame aɖe abia eɖokui be nya vɔ̃e wona hehe nyatakalawo kple nyadzɔdzɔŋlɔlawo be woadi vɛ—ne woaŋe aɖaba aƒu nyanyui dzi hã.
Ebɔ Ŋutɔ le Ŋutinya Katã Me
Le nyateƒe me la, nya vɔ̃ bɔ ŋutɔ tso ƒe alafa geɖe siwo va yi me, eye wosɔ gbɔ wu nyanyui ɖesiaɖe. Amegbetɔ ƒe fukpekpe, numadzedziname, kple mɔkpɔkpɔbuɖeame, siwo nye ameƒomea ƒe gome lae bɔ ɖe ŋutinya nuŋlɔɖiwo me.
Mina míakpɔ kpɔɖeŋu ʋee aɖewo ɖa. Agbalẽ si nye Chronicle of the World si Jacques Legrand ŋlɔ gblɔ ŋutinya vovovowo, eye wòŋlɔ ɖesiaɖe ɖe ŋkeke si dzi tututu nua dzɔ nu gake wòdze abe egbeŋkekea me nyadzɔdzɔŋlɔla aɖe ye le nyaa gblɔm ene. Míekpɔ nya vɔ̃ gbogbo siwo gbegbe amegbetɔ se le xaxa ƒe ɣeyiɣi siwo katã wòtsɔ nɔ Anyigba dzi afisia la nyuie wu le nyatakaka siawo siwo ŋu wowɔ numekuku le nyuie la me.
Gbã la, de ŋugble le nyatakaka gbãtɔ sia si tso Greece le ƒe 429 D.M.Ŋ. me ŋu kpɔ. Eƒo nu tso aʋa si nɔ Atene kple Sparta dome ɣemaɣi la ŋu: “Atenetɔwo ƒe toɖeɖe ɖe Potidaea-dugã si nye dukɔ le eɖokui si na wòna ta esi wona dɔ wu wo ale gbegbe be dua me nɔlawo va nɔ woƒe ame kukuwo ɖum vɔ megbe.” Nya vɔ̃ enye sia vavã!
Ne míege ɖe ƒe alafa gbãtɔ si do ŋgɔ na Mía Ŋɔli me la, míakpɔ Julius Caesar ƒe ku ŋuti nyatakaka si me kɔ nyuie, si woŋlɔ le Roma March 15, ƒe 44 D.M.Ŋ. “Wowu Julius Caesar. Nugbeɖolawo ƒe ha aɖe siwo dometɔ aɖewo nye eƒe zɔhɛ kplikplikpliwoe tɔ hɛe wòku esi wònɔ anyi nɔm le Dunyahemegãwo ƒe Sewɔtakpekpea me egbe si nye March 15 lia.”
Le ƒe alafa siwo kplɔe ɖo me la, nya vɔ̃wo ganɔ agbɔ sɔm ɖe edzi. Wo dometɔ ɖeka si doa voɖi na ame enye nyadzɔdzɔ sia si tso Mexico le ƒe 1487 me: “Le vɔsanuwɔna si ɖe dzesi wu ɖesiaɖe si wokpɔ kpɔ le Aztektɔwo ƒe fiadu si nye Tenochtitlan me la, wotsɔ ame 20,000 ƒe dzi sa vɔe na aʋawɔwɔmawu Huitzilopochtli.”
Menye amegbetɔ ƒe ŋutasesẽ koe zu nya vɔ̃ o ke eƒe bemalemale na nu dzi nya vɔ̃ gbogboawo ɖe edzi. Edze abe London ƒe dzobibi gã la nye afɔku mawo dometɔ ɖeka ene. Nyatakaka si tso London, England, si woŋlɔ be edzɔ le September 5, 1666 la xlẽ be: “Esi York-dufia kplɔ ameha vovovo siwo tsɔ tɔdzisrafowo ƒe ɖu vɛ wotsɔ gbã xɔ siwo ganɔ dzobibia ƒe mɔ dzi la, wotsi dzoa mlɔeba le ŋkeke ene kple zã ene megbe. Anyigba si ade agbleka 400 bi dzo kolikoli eye sɔlemexɔ 87 kple aƒe 13,000 kple vɔ tsrɔ̃. Nukutɔe la, ame asieke pɛ koe ku.”
Ele be míatsɔ dɔvɔ̃ siwo gblẽ nu le anyigbagã geɖe dzi akpe ɖe nya vɔ̃ ŋuti kpɔɖeŋu siawo ŋu—le kpɔɖeŋu me, mĩŋɔŋɔdɔ si to le ƒe 1830 ƒeawo ƒe gɔmedzedze lɔƒo. Tanya si wotsɔ ka nya sia ta xlẽ be: “Mĩŋɔŋɔdɔ ƒe kaka le ŋɔdzi dom na Europa.” Nyatakaka si kplɔe ɖo gblɔ alesi nya la le ŋutɔŋutɔ eye wòfia alesi nya vɔ̃ ɖi vɔvɔ̃e: “Mĩŋɔŋɔdɔ si ŋu womenya nu le le Europa o vaseɖe ƒe 1817 me la le ta kekem tso Asia ɖo ta ɣetoɖoƒe gome. Russia-dugãwo abe Moscow kple St. Petersburg ene me nɔlawo ƒe xexlẽme dzi ɖe kpɔtɔ xoxo—dɔnɔawo ƒe akpa gãtɔ nye dugãmetɔ hiãtɔwo.”
Eƒe Dzidziɖedzi le Nyitsɔ Laa Ƒewo Me
Eyata togbɔ be enye nyateƒe be nya vɔ̃ dzɔ woŋlɔ ɖi le ŋutinya katã me hã la, ƒe alafa 20 lia sia ƒe nyitsɔ laa ƒewo ɖo kpe edzi be nya vɔ̃ le dzidzim ɖe edzi, le nyateƒe me la, ele ta kekem ɖe edzi kabakaba.
Ðikekemanɔmee la, aʋawɔwɔ ŋuti nyae nye nya vɔ̃ vloetɔ kekeake si wose kpɔ le míaƒe ƒe alafa sia me. Aʋa eve siwo nye gãtɔ kekeake le ŋutinya me—siwo woyɔ wòsɔ be Xexemeʋa I kple Xexemeʋa II lia—na woka nya ta le nya vɔ̃ dziŋɔwo ŋu vavã. Gake le nyateƒe me la, ema nye nya vɔ̃ siwo dzɔ le ƒe alafa sia si me dzidzɔkpɔkpɔ mele o ƒe akpa sue aɖe ko.
De ŋugble le tanya ʋee aɖewo siwo wotia ɖekaɖeka ŋu kpɔ:
September 1, 1923: Anyigbaʋuʋu gbã Tokyo gudugudu—ame 300,000 ku; September 20, 1931: Nuwo tɔtɔ—Britania ɖiɖi pound ƒe asixɔxɔ; June 25, 1950: Dzigbe Korea ho ɖe Anyigbe ŋu; October 26, 1956: Hungaritɔwo dze aglã ɖe Soviet-dziɖuɖu ŋu; November 22, 1963: Woda tu John Kennedy le Dallas wòku; August 21, 1968: Russia-tɔwo ƒe aʋawɔʋuwo ho be yewoatsi Prague-tɔwo ƒe aglãdzedze nu; September 12, 1970: Wotɔ dzo yameʋu siwo wofi akpasesẽe le dzogbe; December 25, 1974: Ahom si woyɔna be Tracy kaka Darwin-dua—ame 66 ku; April 17, 1975: Kɔmiunistʋawɔlawo ɖu Cambodia dzi; November 18, 1978: Ame gbogbo aɖewo wu wo ɖokui le Guyana; October 31, 1984: Woda tu Aƒenɔ Gandhi wòku; January 28, 1986: Yamenutomeyimɔ̃ aɖe wó esi wòho yina; April 26, 1986: Soviettɔwo ƒe ŋusẽnamɔ̃ lé dzo; October 19, 1987: Adzɔhawo ƒe gomewo dzraƒea ɖu agba; March 25, 1989: Tomemikɔʋu aɖe gbã eye amia gblẽ nu geɖe le Alaska; June 4, 1989: Asrafowo wu tsitretsiɖeŋulawo le Tiananmen Takpeƒea.
Nyateƒee, ŋutinya ɖee fia be nya vɔ̃ bɔ ɣesiaɣi, gake nyanyui ya mebɔ o ne wotsɔ wo sɔ kple wo nɔewo. Esi nya vɔ̃ le dzidzim ɖe edzi le ƒe siawo me ta la, nyanyui le vɔvɔm esi ƒe ɖesiaɖe va le yiyim.
Nukatae wòle alea? Ðe wòanɔ nenema ɣesiaɣia?
Nyati si kplɔe ɖo aɖo biabia eve siawo ŋu.
[Nɔnɔmetata Tsoƒe si le axa 3]
WHO/League of Red Cross