Nyanyui Le Ŋgɔ Gbɔna!
MÍ KATÃ míeléa blanui ne míese nya vɔ̃ aɖe si ka mí. Gake, míekpɔa dzidzɔ ne míese nyanyui aɖe—dzidzɔnya na mía ŋutɔwo alo míaƒe lɔlɔ̃tɔwo. Gake ne nya vɔ̃ dzɔ ɖe ame bubuwo dzi ke menye míawo dzi o la, míedina vevie zi geɖe be míanya nusi dzɔ; dzɔgbevɔ̃e si dzɔ ɖe ame bubuwo dzi sese vivia ame aɖewo nu gɔ̃ hã. Ðewohĩ esia aɖe nusitae woƒlea nya vɔ̃ ŋuti gbalẽwo wu ɖo me vie!
Kpɔɖeŋu si ɖe ɖetsɔleme gbegblẽ si le amewo me ɖe dzɔgbevɔ̃e ŋu dze nyuie le Xexemeʋa II ƒe gɔmedzedze lɔƒo. Aʋawɔtɔdziʋu si ŋkɔe nye Graf Spee si bla aʋakpa nyuie eye wòkpena tɔn 10,000 la nye Germania tɔdziʋuwo dometɔ ɖeka si ŋu woɖoa ŋu ɖo le ƒe 1939 me. Aʋawɔtɔdziʋu sia nɔ nu gblẽm le dukɔ siwo bla nu ƒe asitsatɔdziʋuwo ŋu le Anyigbe Atlantik kple India atsiaƒu gãwo dzi kwasiɖa geɖe. Mlɔeba la, Britaniatɔwo ƒe aʋawɔtɔdziʋu sue etɔ̃ nyã Graf Spee ɖe nu hedze edzi, esi na amewo ku eye wonyã wo ɖe nu wòna tɔdziʋua zɔ sagasaga yi Uruguay-melidzeƒea le Montevideo hena edzadzraɖo. Uruguay dziɖuɖua ɖe gbe be woatrɔ aʋawɔtɔdziʋua ayi tɔ dzi enumake, ne menye nenema o la woaɖo asi edzi. Eyata edze abe aʋawɔwɔ sesẽ si ade akpa ɖeka dzi gbɔna dzɔdzɔ ge ene.
Esi asitsala hotsuitɔ aɖewo siwo le United States se esia la, woda yameʋu si amesiame xe fe si ade $2,500 be yewoayi Uruguay aɖakpɔ aʋawɔwɔ sia si me woakɔ ʋu ɖe anyi le teƒe. Woƒe mɔkpɔkpɔ tsi akpo dzi, aʋa la medzɔ o. Adolf Hitler ɖe gbe be woaŋɔ do ɖe Graf Spee la te bene wòanyrɔ̃. Esi Graf Spee me nɔlawo ŋɔ do ɖe egɔme la, ewó sesĩe eye wònyrɔ̃ si nye nusi nukpɔla akpe geɖe siwo ƒo zi ɖe tɔa to le mɔkpɔkpɔ me be yewoakpɔ tɔdziʋawɔwɔ dziŋɔ aɖe la se eye wokpɔ. Ʋumefia da tu eya ŋutɔ ƒe ta hewu eɖokui.
Togbɔ be seselelãme vɔ̃ɖi aɖe anɔ ame aɖewo me hã la, ame akpa gãtɔ alɔ̃ ɖe edzi be nyanyui dzɔa dzi na yewo wu nya vɔ̃. Ðe mèsenɛ le ɖokuiwò me nenema oa? Ke nukatae nya vɔ̃ ŋuti nuŋlɔɖi gbogbo aɖe le ŋutinya me gake nyanyui ʋee aɖe koe li? Ðe nɔnɔmea ate ŋu atrɔ gbaɖegbea?
Nya Vɔ̃wo Katã Tsoƒe
Biblia ƒo nu tso ɣeyiɣi si me nyanyui sɔŋ koe nɔ anyi ŋu. Womenya nu tso nya vɔ̃ ŋu o, womesee kpɔ o. Esime Yehowa Mawu wu eƒe nuwɔwɔwo nu la, Anyigba la sɔ gbe na amegbetɔ kple lãwo be woase vivi le edzi. Mose ƒe Agbalẽ Gbãtɔ me nuŋlɔɖia gblɔ na mí be: “Mawu kpɔ nusiwo katã wòwɔ la, eye kpɔ ɖa, wonyo ŋutɔ.”—Mose I, 1:31.
Nya vɔ̃ ƒe anyimanɔmanɔ teƒe medidi boo le amegbetɔ wɔwɔ vɔ megbe o. Hafi Adam kple Xawa nava dzi vi la, aglã si wodze ɖe Mawu kple eƒe xexeame katã ƒe ɖoɖo dzɔdzɔe hena nyuiwɔwɔ ŋu la ƒe nya vɔ̃a ɖi. Gbɔgbɔmevi si si nɔƒe kɔkɔ le gblẽ eƒe dɔ si woka ɖe edzi be ate ŋu awɔ la ɖi eye wòte ŋu na srɔ̃tɔ gbãtɔawo wɔ ɖeka kplii le eƒe aglãdzedze kple tsitretsiɖeŋunuwɔna la me.—Mose I, 3:1-6.
Nya vɔ̃ gbogbo si teƒe ameƒomea kpɔ la dze egɔme tso ɣemaɣi. Mewɔ nuku o be amefuflu, amebeble, alakpadada, nyateƒematomato, kple numevivinyawoe xɔ nɔƒe gbãtɔ le nya vɔ̃ siwo bɔ ɖe xexeame tso ɣemaɣi ke me. Yesu Kristo da fɔbubua ɖe Satana Abosam dzi kaŋ be eyae to nya vɔ̃ vɛ, esime wògblɔ na Eƒe ɣeyiɣia me subɔsubɔhaŋgɔnɔlawo be: “Miawo la mietso fofo, si nye Abosam la me, eye mia fofo ƒe nudzodzrowo miedina be, miawɔ. Eya la amewula wònye tso gɔmedzedzea me, eye mele tsitre ɖe nyateƒe la me o, elabena nyateƒe mele eyama me o. Ne ele aʋatso kam la, eƒoa nu tso eya ŋutɔ ɖokui me, elabena aʋatsokala kple aʋatsokafofo wònye.—Yohanes 8:44.
Esi ameƒomea nɔ agbɔ sɔm ɖe edzi la, nya vɔ̃ hã dzi ɖe edzi. Le nyateƒe me la, esia mefia be aseyetsotso kple dzidzɔkpɔɣi aɖeke menɔ anyi kpɔ o, elabena agbemenuwo nɔ anyi siwo naa wotsoa aseye. Gake xaxa kple blanuiléle ƒe agbɔsɔsɔ ɖe dzesi ƒã le ameƒomea ƒe dzidzime ɖesiaɖe me vaseɖe fifia.
Nu bubu aɖe hã si hea nɔnɔme wɔnublanui sia vɛ li. Eyae nye nu vɔ̃ɖi kple afɔkunuwɔwɔ ƒe didi si ƒe dome míenyi. Yehowa ŋutɔ de dzesi nya vɔ̃ tsoƒe matrɔmatrɔ sia esi wògblɔ be: “Ame ƒe dzimesusu enye vɔ̃ tso ɖevime ke.”—Mose I, 8:21.
Nukatae Nya Vɔ̃ le Dzidzim Ðe Edzi?
Gake susu aɖe li si ta nya vɔ̃ dzi ɖe edzi le ƒe alafa 20 lia sia me. Wogblɔ susu sia kɔte ɖe Biblia si gblɔe ɖi me be ameƒome si le ƒe alafa 20 lia me la age ɖe ɣeyiɣi tɔxɛ aɖe si woyɔna be “ŋkeke mamleawo” alo “nuwuɣi” la me. (Timoteo II, 3:1; Daniel 12:4) Biblia me nyagblɔɖi kple Biblia ƒe ɣeyiɣikɔntabubu de dzesi “nuwuɣi” sia be adze egɔme tso ƒe 1914 me. Taflatse kpɔ agbalẽ si nye Sidzedze si Kplɔa Ame Yia Agbe Mavɔ Me ƒe ta 11 si Watchtower Bible and Tract Society of New York, Inc. ta hena numeɖeɖe deto si wotu ɖe Ŋɔŋlɔawo dzi.
Ŋkeke mamleawo adze egɔme kple nudzɔdzɔ si awɔe godo be nya vɔ̃ nadzi ɖe edzi kabakaba le anyigba dzi. Nukae? Eyae nye Satana Abosam kple eƒe gbɔgbɔ vɔ̃wo ƒe ha la nyanyã tso dziƒo. Àte ŋu axlẽ nya vɔ̃ ƒe dzidziɖedzi matrɔmatrɔ sia si woɖɔ eme kɔ nyuie le Nyaɖeɖefia 12:9, 12: “Wotsɔ ʋɔ driba gã, si nye da xoxo la, esi woyɔna be: Abosam kple Satana, amesi nye xexeame katã blela la, ƒu gbe, eye wotsɔe ƒu gbe ɖe anyigba, eye wotsɔ eƒe dɔlawo hã ƒu gbe ɖe anyi hekpe ɖe eŋuti. . . . Baba na anyigba kple atsiaƒu; elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.”
Eyata ɣeyiɣi kae ɖasusɔ hafi ŋkeke mamleawo nava woƒe nuwuwu o, míate ŋu akpɔ mɔ be nya vɔ̃ ayi edzi anɔ dzɔdzɔm eye wòagadzi ɖe edzi ahasẽ ɖe edzi gɔ̃ hã.
Manɔ Alea Ɣesiaɣi O
Dzidzɔnya na anyigbadzinɔlawo enye be, nɔnɔme wɔnublanui si li egbea si na nya vɔ̃ le dzɔdzɔm le afisiafi la manɔ anyi ɣesiaɣi o. Le nyateƒe me la, míate ŋu agblɔ kakaɖedzitɔe be ɣeyiɣi si nya vɔ̃ aganɔ anyi la megasɔ gbɔ o. Aleke nuwo adze na míi o, mɔkpɔkpɔ mebu o. Nya vɔ̃wo katã ƒe nuwuwu tu aƒe eye ava eme godoo le Mawu ŋutɔ ƒe ɣeyiɣi ɖoɖi dzi.
Míate ŋu aka ɖe esia dzi elabena wogblɔe ɖi be alesi Mawu atsrɔ̃ eye wòaɖe nusiwo katã nana nya vɔ̃wo dzɔna ɖa lae woatsɔ aƒo ŋkeke mamleawo ta alo atsɔ awu enui. Aɖe amegbetɔ vɔ̃ɖi siwo hea mamã vɛ, siwo gbe be yewomatrɔ ahaɖe asi le woƒe agbe vlo ŋu o la ɖa. Esia awu enu le Mawu Ŋusẽkatãtɔ la ƒe ŋkeke gã la ƒe aʋawɔwɔ si woyɔna be Harmagedon me. (Nyaɖeɖefia 16:16) Le ema megbe teti la, woaxɔ ŋusẽ le Satana Abosam kple eƒe gbɔgbɔ vɔ̃wo ƒe ha la si. Nyaɖeɖefia 20:1-3 ɖɔ alesi woabla Satana amesi he nya vɔ̃ vɛ be: “Mekpɔ mawudɔla aɖe le ɖiɖim tso dziƒo, eye aʋli me safui kple kɔsɔkɔsɔ gã aɖe le esi. Eye wòlé ʋɔ driba, da xoxo, si nye Abosam kple Satana la, eye wòblae ƒe akpe ɖeka. Eye wotsɔe ƒu gbe ɖe aʋli me, eye wotu nu ɖe enu, eye wotre enu, bena ne wòagable dukɔwo o.”
Nyanyui ƒe ɣeyiɣi si tɔgbe menɔ anyi kpɔ o la akplɔ nudzɔdzɔ wɔdɔɖeamedzi siawo ɖo ava na anyigba kple edzinɔlawo. Anyigbadzinɔla siawo anye ame miliɔn siwo atsi agbe le aʋa mamle si nye Harmagedon me la me tsɔ kpe ɖe ame biliɔn siwo woafɔ ɖe tsitre tso woƒe ku ƒe alɔ̃dɔdɔ me tso yɔdowo me la ŋu. Woƒo nu tso nyanyui nyuitɔ kekeake sia ŋu le Biblia ƒe agbalẽ mamlea me be: “Mawu ƒe agbadɔ la le amewo gbɔ, eye wòanɔ anyi kpli wo, eye woawo hã woanye eƒe dukɔ, eye Mawu ŋutɔ anɔ anyi kpli wo, eye wòanye woƒe Mawu. Eye Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Nyaɖeɖefia 21:3, 4.
Àte ŋu akpɔ dzidzɔkpɔɣi ma le susu mea? Ŋutikɔkɔe ƒe etsɔme si me nya vɔ̃ aɖeke maganɔ o ye wònye vavã. Ẽ, nya vɔ̃wo katã nu ayi eye womagase wo ŋkɔ azɔ o. Nyanyui aɖu dzi ɣemaɣi, eye abɔ yi ɖase mavɔmavɔ me.