Fiaɖuƒe Gbeƒãɖelawo Ka Nya Ta

Dodo le Gbɔgbɔ Vɔ̃wo ƒe Ŋusẽ Te

GBƆGBƆYƆYƆ nye nusi kpɔ ŋusẽ ɖe ame miliɔn geɖe ƒe agbe dzi tso gbaɖegbe ke. Ke hã woate ŋu ado le woƒe ŋusẽkpɔɖeamedzi te! Nenemae ame geɖe wɔ le blemadu si nye Efeso me. Biblia nuŋlɔɖia gblɔ be: “Ame geɖe, siwo ka afa la, wotsɔ woƒe agbalẽwo va ƒo ƒu, eye wotɔ dzo wo le wo katã ƒe ŋku me . . . Ale Aƒetɔ ƒe nya la tsi kple ŋusẽ, eye wòkpɔ dziɖuɖu enye si.”—Dɔwɔwɔwo 19:19, 20.

Nenema ke Kristo-hamea le dzidziɖedzi kpɔm egbeae. Abe alesi wònɔ le Efeso ene la, xɔsetɔ siawo dometɔ aɖewo nye gbɔgbɔyɔlawo tsã. Nuteƒekpɔkpɔ si gbɔna si tso Zimbabwe la ɖe esia fia.

Wonya Gogo (Mama) Mthupha nyuie ɖe eƒe gbɔgbɔyɔyɔ ta. Amewo tsoa keke Zambia, Botswana, kple South Africa ke vaa egbɔ be wòada gbe le yewo ŋu kple gbetikewo. Gogo Mthupha fia ame bubuwo alesi woawɔ azu n’anga, alo bokɔnɔ. Eye eɖua dzo amewo ɣeaɖewoɣi hã!

Kwasiɖagbe ŋdi aɖe la, Yehowa Ðasefo siwo nɔ tso aƒeme yi aƒeme dɔa wɔm la va srã Gogo Mthupha kpɔ. Dze si woɖo kplii le Biblia me ŋugbedodo si ku ɖe xexe yeye si me dzɔdzɔenyenye anɔ si me ŋusẽkpɔɖeamedzi vɔ̃ aɖeke manɔ o ŋu la vivi enu ale gbegbe. Exɔ agbalẽ si nye Ate Ŋu Anɔ Agbe Tegbee le Paradiso me le Anyigba Dzi eye wòlɔ̃ be woawɔ aƒeme Biblia nusɔsrɔ̃ kpli ye.a Ete kpekpeawo dede le nusɔsrɔ̃ zi etɔ̃ ko megbe.

Gogo Mthupha to eƒe Biblia sɔsrɔ̃ dzi va kpɔe dze sii be gbɔgbɔ vɔ̃ siwo tsi tre ɖe Yehowa ƒe dziɖulanyenye ŋu la gbɔe yeƒe ŋusẽ tɔxɛawo tso. (Petro II, 2:4; Yuda 6) Esrɔ̃e hã be ɖe gbɔgbɔ vɔ̃ siawo ɖoe koŋ be yewoatrɔ amesiame si yewoate ŋui la ɖa tso Yehowa kple subɔsubɔ dzadzɛ ŋu. Esi wònye eƒe dɔwɔɖui enye nukaka na amewo to gbɔgbɔ vɔ̃wo dzi ta la, aleke wɔ ge wòala?

Gogo Mthupha di be yeaɖe yeƒe atiblɛwo kple gbɔgbɔyɔnuwo katã ɖa. Nusiawo dometɔ aɖewoe nye eƒe tatsyɔnu tɔxɛ aɖe kple “nyidzo siwo ƒoa nu” siwo wòzãna tsɔ daa gbee le eƒe n’anga gbedadawo me. Gogo Mthupha di be yeaɖe nu mawo katã ɖa ne yeate ŋu asubɔ Yehowa, Mawu gbagbe vavã ɖeka la.

Gake eƒe ƒometɔ aɖewo melɔ̃ ɖe edzi nɛ o le esi wòdɔa alɔ wo le ga gome ta. Woɖe kuku nɛ be wòatrɔ eƒe gbɔgbɔyɔnuawo kple eƒe afakaŋusẽwo na yewo ne wòanɔ vi ɖem na yewo. Ke Gogo Mthupha melɔ̃ ɖe edzi o.

Yehowa Ðasefowo ƒe hame si le wo gbɔ la kpe ɖe eŋu wòlɔ gbɔgbɔyɔnuwo de kotoku gã etɔ̃ me eye wòtɔ dzo wo katã. Esi dzo bla Gogo Mthupha ƒe gbɔgbɔyɔnuawo la, edo ɣli gblɔ be: “Mikpɔ ɖa! Nyidzo ma mete ŋu ɖe eɖokui gɔ̃ hã o ɖe.”

Medidi o, Gogo Mthupha tsɔ nyɔnyrɔxɔxɔ ɖe tsi me ɖo kpe eƒe adzɔgbeɖeɖe dzii na Yehowa dzidzɔtɔe. Nukae nye eƒe dɔwɔɖui fifia? Detsiƒonuwoe wòdzrana. Nyateƒee, to Mawu ƒe Nya ƒe ŋusẽ dzi la, ame ate ŋu avo tso gbɔgbɔvɔ̃subɔsubɔ me. Gogo Mthupha gblɔ be: “Nyemekpɔ ablɔɖe alea gbegbe kpɔ o.”

[Etenuŋɔŋlɔ]