Nyabiabia Siwo Tso Exlẽlawo Gbɔ
Aleke Yehowa Ðasefowo bua akɔdadae?
Gɔmeɖose siwo me kɔ le Biblia me siwo kpena ɖe Mawu subɔlawo ŋu be nukpɔsusu nyuitɔ nanɔ wo si le nya sia ŋu. Gake edze abe gɔmeɖose aɖeke metsi tre ɖe akɔdada ŋutɔŋutɔ ŋu o ene. Le kpɔɖeŋu me, susu aɖeke meli si ta dɔdzikpɔlawo mada akɔ kple susu be yewoatso nya me le nya si ka yewoƒe dɔwɔƒe ŋu o. Zi geɖe la, Yehowa Ðasefowo ƒe hamewo tsoa nya me le woƒe kpekpedeɣiwo kple alesi woazã hamea ƒe gawoe ŋu to asidodoɖedzi ƒe akɔdada me.
Ke akɔdada le dunyahehe ƒe ametiatiawo me ya ɖe? Le nyateƒe me le demokrasi dukɔ aɖewo me la, dukɔa me nɔlawo ƒe afã sɔŋ meyina va daa akɔ le ametiagbe o. Le Yehowa Ðasefowo gome la, womedea nu akɔdada ƒe gome si le ame bubuwo si ŋuti nyawo me o; eye wometsia tre ɖe dunyahehe ƒe ametiatiawo hã ŋu le mɔ aɖeke nu o. Wodea bubu tatɔ siwo wotiana le ametiatia siawo me ŋu hewɔa nu aduadu kple wo. (Romatɔwo 13:1-7) Be Yehowa Ðasefowo nada akɔ na ame aɖe si di be woatia ye alo womadae nɛ o la nye wo dometɔ ɖesiaɖe ƒe nyametsotso si wòawɔ wòanɔ te ɖe eƒe dzitsinya si wòtsɔ Biblia na hehee kple alesi wòse agbanɔamedzi si le edzi le Mawu kple Dziɖuɖua gbɔ gɔmee dzi. (Mateo 22:21; Petro I, 3:16) Le ame ŋutɔ ƒe nyametsotso sia wɔwɔ me la, Ðasefowo bua nya aɖewo ŋu gbã.
Gbã, Yesu Kristo gblɔ le eyomedzelawo ŋu be: “Womenye xexeame ƒe akpa aɖeke o, abe alesi nye hã nyemenye xexeame ƒe akpa aɖeke o ene.” (Yohanes 17:14, NW) Yehowa Ðasefowo bua gɔmeɖose sia nya vevii. Esi “womenye xexeame ƒe akpa aɖeke o” ta la, womedea akpa aɖeke dzi le xexeame ƒe dunyahenyawo me o.—Yohanes 18:36.
Evelia, apostolo Paulo gblɔ be yenye “ame dɔdɔ” le Kristo teƒe na ye ŋɔlimetɔwo. (Efesotɔwo 6:20; Korintotɔwo II, 5:20) Yehowa Ðasefowo xɔe se be Kristo Yesue nye Mawu ƒe Dziƒofiaɖuƒea ƒe Fia si woɖo, eye ele be yewoaɖe gbeƒã nya sia na dukɔwo, abe alesi ame dɔdɔwo wɔna ene. (Mateo 24:14; Nyaɖeɖefia 11:15) Wokpɔa mɔ be ame dɔdɔwo made dukɔ siwo me wodɔ wo ɖo ƒe dukɔmenyawo ƒe akpa aɖeke dzi o eye womade nu wo me hã o. Esi Yehowa Ðasefowo nye Mawu ƒe Dziƒofiaɖuƒea teƒenɔlawo ta la, woawo hã kpɔe be mele be yewoade nu dukɔ siwo me yewole ƒe dunyahenyawo me o.
Nu etɔ̃lia si ŋu wòle be míade ŋugble le enye be woate ŋu abu fɔ amesiwo da akɔ na ame ale be wòɖo ɖoƒe aɖe la ɖe eƒe nuwɔnawo ta. (Tsɔe sɔ kple Timoteo I, 5:22.) Ele be Kristotɔwo nabu eŋu nyuie nenye be wodi be yewoatsɔ agba ma loo alo womedii o.
Enelia, Yehowa Ðasefowo dea asixɔxɔ gã aɖe woƒe Kristotɔwo ƒe ɖekawɔwɔ ŋu. (Kolosetɔwo 3:14) Ne subɔsubɔhawo de nu dunyahenyawo me la, nusi dzɔnae nye be mama ɖoa woƒe hametɔwo dome. Le Yesu Kristo sɔsrɔ̃ me la, Yehowa Ðasefowo ƒoa asa na wo ɖokui ƒoƒo ɖe dunyahenyawo me ale be Kristotɔwo ƒe ɖekawɔwɔ gakpɔtɔ nɔa wo dome.—Mateo 12:25; Yohanes 6:15; 18:36, 37.
Atɔ̃lia kple mamlɛtɔ, Yehowa Ðasefowo ƒe numademade dunyahenyawo me nana be wovona le wo ɖokui me te ŋu tena ɖe dunyaheha ɖesiaɖe me tɔ ŋu gblɔa Fiaɖuƒegbedasi vevia na wo faa.—Hebritɔwo 10:35.
Le Ŋɔŋlɔawo me gɔmeɖose siwo míeyɔ va yi ta la, le dukɔ geɖe me la, Yehowa Ðasefowo tsoa nya me na wo ɖokui be yewomada akɔ le dunyahehe ƒe ametiatiawo me o, eye dukɔa ƒe se daa megbe na mɔ si wokpɔ awɔ nyametsotso ma. Gake ne sea bia tso dukɔmeviwo si be woada akɔ ya ɖe? Le go sia me la, ekpo ɖe Ðasefo ɖesiaɖe gbɔ be wòazã eƒe dzitsinya ahanɔ te ɖe Biblia dzi atso nya me le alesi wòakpɔ nyaa gbɔe ŋu. Ne ame aɖe tso nya me be yeage ɖe akɔdaɖakaa me la, eya ŋutɔ ƒe nyametsotsoe wònye. Nusi wòawɔ le akɔdaɖakaa me nye eya kple eƒe Wɔla dome nya.
November 15, 1950 ƒe Eŋlisigbe me Gbetakpɔxɔ gblɔ le axa 445 kple 446 be: “Ne Kaisaro wɔe wònye dzizizi na dukɔmeviwo be woada akɔ la, . . . [Ðasefowo] ate ŋu ayi akɔdaƒea age ɖe akɔdaɖakaa me. Afisiae wobia tso wo si le be woade dzesi akɔdagbalẽvia dzi alo aŋlɔ amesi ƒe akpa dzi wole. Akɔdalaawo wɔa nusianu si dze wo ŋu kple akɔdagbalẽviawo. Eyata Mawu ƒe ŋkume le afisiae wòle be eƒe ɖasefowo nawɔ nu wòawɔ ɖeka kple eƒe sededewo kple le ɖekawɔwɔ me kple woƒe dzixɔse le. Menye míaƒe dɔe wònye be míagblɔ nusi woawɔ kple akɔdagbalẽvia na wo o.”
Ke ne nyɔnu Kristotɔ srɔ̃ŋutsu dzimaxɔsetɔ zi edzi be wòayi ava da akɔ ya ɖe? Nya lae nye be srɔ̃aŋutsua tee wòle, abe alesi Kristotɔwo le ŋusẽtɔwo tee ene. (Efesotɔwo 5:22; Petro I, 2:13-17) Ne wòse srɔ̃a ƒe gbe heyi akɔdaɖakaa me la, eya ŋutɔ ƒe nyametsotsoe wònye. Mele be ame aɖeke naɖe ɖeklemii o.—Tsɔe sɔ kple Romatɔwo 14:4.
Ke dukɔ siwo me sea mezi akɔdada ɖe ame dzi le o gake woléa fu amesiwo meyia akɔdaɖaka la me o—ɖewohĩ wowɔa nuvevi wo ɖe? Alo ame ɖekaɖeka siwo wohea to na vevie le mɔ aɖe nu le akɔdaɖakaa me mayimayi ta, evɔ sea mebia tso wo si be woada akɔ o hã ɖe? Le nya siawo kple esiwo ɖii gome la, ele be Kristotɔ natso nya me na eɖokui. “Amesiame atsɔ ye ŋutɔ ƒe agba.”—Galatiatɔwo 6:5.
Ðewohĩ aɖia ame aɖewo nu ne wokpɔe be ne wole akɔ dam le yewoƒe dukɔ me la, Yehowa ƒe Ðasefo aɖewo yia akɔdaƒea gake bubuwo ya meyina o. Ðewohĩ woagblɔ be, ‘Yehowa Ðasefowo mewɔa nu ɖeka o.’ Gake ele be amewo nanyae be le nya siawo ƒomevi siwo nye ame ŋutɔ ƒe dzitsinya ƒe nya gome la, ele na Kristotɔ ɖesiaɖe be wòawɔ eya ŋutɔ ƒe nyametsotso le Yehowa Mawu ŋkume.—Romatɔwo 14:12.
Nyametsotso ka kee Yehowa Ðasefowo wɔ le nɔnɔme vovovo me o, wokpɔa egbɔ be yewoakpɔ yewoƒe Kristotɔwo ƒe akpaɖekedzimademade kple dzitsinya si naneke maɖe fu na o ta. Le nusianu me la, wokpɔa Yehowa Mawu sinu be wòado ŋusẽ yewo, ana nunya yewo, eye wòakpe ɖe yewo ŋu be yewomagblẽ yewoƒe xɔse dome le mɔ aɖeke nu o. Eyata woɖoa ŋu ɖe hakpala la ƒe nya siawo ŋu be: “Wòe nye nye agakpe kple nye mɔ̃ sesẽ, eye àlé nye alɔnu akplɔm le wò ŋkɔ la ta.”—Psalmo 31:4.