Dzudzɔ Ʋeʋẽe Dodo—Ðe Wòwɔa Akpa aɖe le Tadedeagu Vavãtɔ Mea?

“MAWUAWO lɔ̃a dzudzɔ ʋeʋẽe.” Esiae nye nya si wogblɔna zi geɖe le blema Egipte. Le woawo gome la, dzudzɔ ʋeʋẽe dodo nye woƒe subɔsubɔ ƒe akpa vevi aɖe. Esi Egiptetɔwo xɔe se be mawuawo tsɔ ɖe yewo gbɔ ta la, wodoa dzudzɔ le woƒe gbedoxɔwo me kple le woƒe aƒeme vɔsamlekpuiwo dzi, kpakple le ɣeyiɣi si me wole dɔ aɖe wɔm gɔ̃ hã. Kɔnu siawo tɔgbe le dukɔ bubuwo hã me.

Nukae nye lifi? Woate ŋu azã nya la na dzudzɔa loo alo na atike si wole dzo tɔmee. Atimitsi alo aŋe ʋeʋẽe, abe kotoklobo kple ami ʋeʋẽe ene, ye wotsɔ wɔnɛ. Wotoa nusiawo memie eye zi geɖe la, wotsɔa nusiwo nye nu ʋeʋẽewo, ati kɔgo, kple seƒoƒowo tsakanɛ be ʋeʋẽ lilili aɖe nanɔ esi hena dɔ tɔxɛ aɖewo wɔwɔ.

Lifi nye nusi amewo lɔ̃na vevie eye esia na wòva zu nu xɔasi aɖe le blemaɣeyiɣiwo me ale gbegbe be nusiwo wotsɔ wɔnɛ la va zu nu vevi siwo ƒe asi wotsana. Asitsaha siwo toa asitsamɔ siawo dzi tsɔa nusiawo tsoa didiƒewo. Àɖo ŋku edzi be wodzra Yakob viŋutsuvi Yosef na Ismael-siha siwo “tso Gilead gbɔna heyina ɖe Egipte, eye woƒe kposɔwo tsɔ aŋe, lifi kple kotoklobo.” (Mose I, 37:25) Atike ʋeʋẽe ƒeƒle va dzi ɖe edzi ale gbegbe be kotoklobo ƒe asitsamɔ va trɔ zu Asia kple Europa dome mɔ si dzi amewo tona ŋutɔ, eye ɖikeke mele eme o be lifisitsalawoe ʋu ŋku ɖe mɔa ŋu gbã.

Wogadoa dzudzɔ ʋeʋẽe egbea le subɔsubɔha geɖewo me le subɔsubɔnuwɔnawo me kple le kɔnuwɔwɔwo me. Gakpe ɖe eŋu la, ame geɖe wu lɔ̃na be yewoado dzudzɔ ʋeʋẽe le yewoƒe aƒewo me ɖe eƒe ʋeʋẽ nyuia ta ko. Aleke wòle be Kristotɔwo nabu dzudzɔ ʋeʋẽe dodoe? Ðe wòdzea Mawu ŋu be woazãe le eƒe tadedeagu mea? Mina míadzro nusi Biblia gblɔ le nyaa ŋu me.

‘Nu Kɔkɔe aɖe na Yehowa’

Le blema Israel-viwo dome la, dzudzɔ ʋeʋẽe dodo nye dɔ vevi aɖe si nunɔlawo wɔna le avɔgbadɔa me. McClintock kple Strong ƒe Cyclopedia gblɔ be: “Le nyateƒe me la, edze abe wobua dzudzɔ ʋeʋẽe dodo le Hebritɔwo dome be enye tadedeagu alo vɔsa kɔkɔe ƒe nuwɔna ale gbegbe be míegaxlẽ nu bubu aɖeke ku ɖe eŋudɔwɔwɔ ŋu tsɔ wu esia o.”

Yehowa Mawu yɔ nu ene siwo woatsaka atɔ dzoe le avɔgbadɔa me be: “Tsɔ atike siwo ʋẽna lilili, siwo nye: lifi lãhɛtɔ, ƒumebɔbɔgo kple atimitsi ƒomevi vovovowo; woada wo katã sɔsɔe. Eye nàtsɔ wo awɔ dzudzɔ ʋeʋẽe donui; nàtɔtɔ wo abe alesi atike ʋeʋẽe wɔlawo wɔnɛ ene; nàde dze eme, eme nadza, eye woabui kɔkɔe. Eye nàtu eƒe ɖe memee ada ɖe nubablaɖaka la ŋgɔ le Mawu ƒe agbadɔ la me.” (Mose II, 30:34-36) Agbalẽnyalawo gblɔ be Yuda rabiwo tsɔ nu bubuwo kpee emegbe hena zazã le gbedoxɔa me.

Atike ʋeʋẽe si wotɔa dzoe le avɔgbadɔa me la nye nu kɔkɔe, eye Mawu subɔsubɔ me ɖeɖekoe wozãnɛ le. Yehowa de se be: “Migawɔ dzudzɔdonu, si nàwɔ la, tɔgbe aɖeke o, ke boŋ miabui kɔkɔe na Yehowa. Ne ame aɖe wɔ etɔgbe, be yeaʋẽ ase la, woatsrɔ̃e ɖa le eƒe dukɔ me viwo dome.” (Mose II, 30:37, 38) Nunɔlawo doa dzudzɔ ʋeʋẽe zi eve gbeɖeka le vɔsamlekpui aɖe si wotia dzi. (Kronika II, 13:11) Eye ne eɖo Avuléŋkeke dzi la, nunɔlagã la doa dzudzɔ ʋeʋẽe le Kɔkɔeƒewo ƒe Kɔkɔeƒea.—Mose III, 16:12, 13.

Menye dzudzɔdodo ɖesiaɖee dzea Mawu ŋu o. Ehe to na amesiwo menye nunɔlawo o gake wotsɔ dada do dzudzɔe abe nunɔlawoe wonye ene la. (Mose IV, 16:16-18, 35-40; Kronika II, 26:16-20) Dzudzɔ ʋeʋẽe si Yudatɔwo dona na Yehowa esime wogakpɔtɔ lé alakpasubɔsubɔ nuwɔnawo kple ʋukɔkɔɖi me ɖe asi la nyɔa ŋu nɛ. Woƒe alakpanuwɔwɔ na Yehowa gblɔ be: “Dzudzɔdonu nyɔŋu wònye nam.” (Yesaya 1:13, 15) Israel-viwo megava tsɔ ɖeke kura le tadedeagu mɔnu si Yehowa fia me o ale gbegbe be wodo gbedoxɔa ƒe ʋɔtruwo heyi va do dzudzɔ ʋeʋẽe le vɔsamlekpui bubuwo dzi. (Kronika II, 28:24, 25) Ƒe aɖewo megbe la, wova nɔ atike ʋeʋẽe kɔkɔe la ŋudɔ wɔm le alakpasubɔsubɔ nuwɔna ɖigbɔwo me. Nuwɔna mawo nye ŋunyɔ na Yehowa.—Xezekiel 16:2, 17, 18.

Dzudzɔ Ʋeʋẽe Kple Kristotɔ Gbãtɔwo

Woɖe Se ƒe nubabla, si me sedede si bia be nunɔlawo nado dzudzɔ ʋeʋẽe kɔkɔe la hã le, la ɖa esi Kristo ɖo nubabla yeyea anyi le ƒe 33 M.Ŋ. (Kolosetɔwo 2:14) Nuŋlɔɖi aɖeke meli si fia be Kristotɔ gbãtɔwo do dzudzɔ ʋeʋẽe le woƒe subɔsubɔ me o. McClintock kple Strong ƒe Cyclopedia gblɔ ku ɖe esia ŋu be: “Kakaɖedzi le eŋu be [Kristotɔ gbãtɔwo] mezã atike ʋeʋẽewo o. Le nyateƒe me la, ezazã fia trɔ̃subɔsubɔnuwɔna . . . Atike ʋeʋẽe ʋɛ si trɔ̃subɔla wu ɖe vɔsamlekpui dzi fia subɔsubɔnuwɔna.”

Kristotɔ gbãtɔwo gbe hã be yewomatɔ dzo lifi atsɔ aɖee fia be yewolɔ̃ ɖe Roma fiagã ƒe “mawunyenye” dzi o, togbɔ be ne womewɔe o la, ate ŋu ana woawu wo gɔ̃ hã. (Luka 4:8; Korintotɔwo I, 10:14, 20) Le esi wozãa dzudzɔ ʋeʋẽe le trɔ̃subɔsubɔ me ta la, mewɔ nuku o be Kristotɔ gbãtɔwo meƒoa wo ɖokui ɖe lifisitsatsa me gɔ̃ hã o.

Dzudzɔ Ʋeʋẽe Dodo Egbea

Aleke wozãa dzudzɔ ʋeʋẽe egbeae? Le Kristodukɔa ƒe sɔlemeha geɖewo me la, wodoa dzudzɔ ʋeʋẽe le woƒe subɔsubɔnuwɔnawo me kple le kplɔ̃ŋudede wɔnawo me. Le ƒome geɖe me le Asiatɔwo dome la, wodoa dzudzɔ ʋeʋẽe le gbedoxɔ me alo le vɔsamlekpui siwo le woƒe aƒeme dzi be woatsɔ ade bubu woƒe mawuwo ŋu alo be woatsɔ akpɔ woƒe ame kukuwo ta. Le subɔsubɔkɔnuwo me la, wozãa lifiwo le mɔ vovovowo nu tsɔ doa dzudzɔ ɖe xɔme, tsɔ yɔa dɔe, tsɔ kɔa nu ŋui, eye wotsɔ kpɔa nu ta hã.

Dzudzɔ ʋeʋẽe dodo gafɔ ɖe te nyitsɔ laa eye amesiwo gblɔ be yewomele subɔsubɔha aɖeke me o gɔ̃ hã donɛ. Wo dometɔ aɖewo doa dzudzɔ ʋeʋẽe ne wole ŋugble dem. Mɔfiagbalẽ aɖe gblɔ be woate ŋu atɔ dzo lifi be wòakplɔ ame ayi “gbɔgbɔ me ɖoƒe manyamanya vovovowo” eye be wòana “ŋusẽ” si wu dzɔdzɔmetɔ la wo. Le agbemekuxiwo gbɔ kpɔkpɔ ƒe nya me la, agbalẽa kafui hã be woate ŋu ado dzudzɔ ʋeʋẽe be woado ka kple “gbɔgbɔmemewo.” Ðe nuwɔna siawo dze na Kristotɔa?

Yehowa bua fɔ amesiwo tenɛ kpɔ be yewoatsaka alakpasubɔsubɔ nuwɔnawo kple tadedeagu vavãtɔ la vevie. Apostolo Paulo yɔ Yesaya ƒe nyagblɔɖi me nyawo tsɔ xlɔ̃ nu Kristotɔwo be woate wo ɖokui ɖa tso alakpasubɔsubɔ ƒe makɔmakɔnyenye gbɔ. Eŋlɔ be: “Mido go le wo dome, eye miɖe mia ɖokui ɖa, Aƒetɔ la gblɔe, eye migaka asi nu makɔmakɔ ŋuti o, eye nye la maxɔ mi.” (Korintotɔwo II, 6:17; Yesaya 52:11) Kristotɔ vavãwo kpɔa egbɔ be yewoƒo asa na nusianu si do ka kple alakpasubɔsubɔ alo gbɔgbɔyɔyɔ.—Yohanes 4:24.

Ðe nyateƒe si wònye be wodoa dzudzɔ ʋeʋẽe le subɔsubɔhawo ƒe nuwɔnawo me kpakple le gbɔgbɔyɔyɔ me la fia be dzudzɔ ʋeʋẽe dodo ɖesiaɖe nye nu gbegblẽa? Mefia nenema kokoko o. Ðewohĩ ame aɖe adi be yeado dzudzɔ ʋeʋẽe le aƒeme kple susu be eƒe ʋeʋẽ lililia naxɔ teƒea ko. (Lododowo 27:9) Ne alea wòle gɔ̃ hã la, ele be Kristotɔ nabu nanewo ŋu ne edi be yeatɔ dzo lifi. Ðe amesiwo le nuto si me nèle la abu dzudzɔdodo be enye alakpasubɔsubɔ nuwɔna? Ðe wobua dzudzɔ ʋeʋẽe dodo be enye gbɔgbɔyɔyɔ nuwɔna aɖea? Alo ɖe wozãnɛ na nusiwo melɔ subɔsubɔnuwɔnawo ɖe eme o zi geɖea?

Ne ame aɖe di be yeatɔ dzo lifi la, ele be wòaɖo to eƒe dzitsinya ahabu alesi ame bubuwo asusu le eƒe nyametsotso si wòawɔ la ŋu. (Korintotɔwo I, 10:29) Apostolo Paulo ƒe nya siwo wòŋlɔ na Romatɔwo sɔ le afisia. Eŋlɔ be: “Minɛ míanɔ nusiwo nye ŋutifafatɔ kple nusiwo woatsɔ atu ame nɔewo la yome. Mègagblẽ Mawu ƒe dɔwɔwɔ le nuɖuɖu ta o! Nusianu ŋuti kɔ hafi; gake la enye vɔ̃ na amesi ɖui le nuɖiaɖia me. Enyo bena, màɖu lã o, eye màno aha hã o, alo màwɔ nane, si nɔviwò klina alo wòɖia enu alo wògbɔdzɔna le eŋuti la o.”—Romatɔwo 14:19-21.

Gbedodoɖa Siwo Le abe “Dzidzɔ Ʋeʋẽewo Ene”

Dzudzɔ ʋeʋẽe dodo si nɔ anyi le Israel-viwo dome la tsi tre ɖi na gbedodoɖa siwo Mawu sena ƒe kpɔɖeŋu nyui aɖe. Eyata hakpala Dawid dzi ha na Yehowa be: “Nye gbedodoɖa nenɔ ŋkuwò me abe dzudzɔ ʋeʋẽe ene.”—Psalmo 141:2.

Israel-vi wɔnuteƒewo mebu dzudzɔ ʋeʋẽe dodo be enye kɔnu dzro aɖe ko o. Wokpɔa egbɔ nyuie be yewotrɔ asi le atike ʋeʋẽea ŋu hetɔ dzoe le mɔ si Yehowa fia la nu pɛpɛpɛ. Le esi Kristotɔ siwo li egbea nado dzudzɔ ʋeʋẽe teƒe la, wodoa gbe ɖa boŋ eye woɖea ŋudzedzekpɔkpɔ kple bubu deto fiaa wo Fofo si le dziƒo. Mawu ƒe Nya ka ɖe edzi na mí be, “Nuteƒewɔlawo ƒe gbedodoɖa dzea eŋu” abe dzudzɔ si ʋẽna lilili ene.—Lododowo 15:8.

[Nɔnɔmetata si le axa 29]

Nu kɔkɔe ye atike ʋeʋẽe siwo wotɔa dzoe le avɔgbadɔa kple gbedoxɔa me la nye

[Nɔnɔmetata si le axa 30]

Ðe wòdze be Kristotɔwo nado dzudzɔ ʋeʋẽe esime wole ŋugble dema?