Gbetɔame aɖe si Ka Wò

ÐE XƆLƆ̃ alo ƒometɔ vevi aɖe le asiwò, si tsi metoa mia kplii dome oa? Ne ame aɖe tsɔ nya ɖe ŋuwò be ɖokuitɔdidi ta koe nèlé ɖe xɔ̃wò alo ƒometɔ vevi sia ŋu ɖe, alekee nàse le ɖokuiwò me? Ðe alakpanya sia maɖe fu na wò ŋutɔ, alo ɖewohĩ ana nàdo dziku kura gɔ̃ hã oa? Nya ma tututue Satana Abosam tsɔ ɖe amesiwo katã le ƒomedodo kplikplikpli me kple Yehowa Mawu la ŋu.

Gabu nusi dzɔ le Eden-bɔa me esime Satana ble Adam kple Xawa woda se si Mawu de na wo la dzi hewɔ ɖeka kplii le eƒe aglãdzedze ɖe Mawu ŋu me la ŋu kpɔ. Ðe nusi dzɔ la ɖee fia be viɖe ta koe amewo ate ŋu aɖo to Yehowa ɖoa? (Mose I, 3:1-6) Esime ƒe 2,500 aɖewo va yi le Adam ƒe aglãdzedzea vɔ megbe la, Satana gava fɔ ameblenya ma ɖe te—le go sia ya me la, ame aɖe si ŋkɔe nye Hiob ye wòtɔ ŋkui. Esi wònye be amenutsonya si Abosam fɔ ɖe te ɣemaɣi na eƒe gbetɔamea dze gaglã ta la, mina míadzro Biblia me nudzɔdzɔ ma me tsitotsito.

‘Nyemasẽ Nu Le Nye Fɔmaɖimaɖi Ŋu O’

Hiob nye “ame maɖifɔ, ame dzɔdzɔe kple mawuvɔ̃la, eye wòtsri nu vɔ̃ɖi.” Gake Satana ya tsɔ nya ɖe Hiob ŋu be menye susu nyui aɖeke tae wòwɔa nu dzɔdzɔe ɖo o. Ebia Yehowa be: “Dzodzroe Hiob vɔ̃a Mawua?” Emegbe Abosam tso Mawu kple Hiob siaa nu alakpatɔe be ɖe Yehowa tsɔ takpɔkpɔ kple yayra ƒle Hiob ƒe nuteƒewɔwɔ. Etɔ gbe Mawu be: “Ke do asi ɖa, ne nàde asi nusiwo katã le esi la ŋu kpɔ, be magbe wò nya ɖe ŋkuwò me keŋ oa?”—Hiob 1:8-11.

Be Yehowa naɖo gbetɔame sia ŋu na Satana la, eɖe mɔ nɛ be wòate Hiob kpɔ. Abosam lɔ afɔku gbogbo aɖewo, siwo tsya ɖe wo nɔewo nu la, ƒu nuteƒewɔla ma dzi be yeatsɔ ana wòadzudzɔ Mawu subɔsubɔ. Wofi Hiob ƒe lãha aɖewo eye mamlɛawo tsrɔ̃, wowu Hiob ƒe subɔlawo eye viawo hã ku. (Hiob 1:12-19) Gake ɖe Satana ɖu dzia? Kpao! Togbɔ be Hiob menya be Abosam ye le nu tum kpli ye o hã la, mefa konyi o, boŋ egblɔ be: “Yehowae na, Yehowae gaxɔe, woakafu Yehowa ŋkɔ!”—Hiob 1:21.

Emegbe Satana do ɖe Yehowa ŋkume eye Yehowa gblɔ nɛ be: ‘Hiob galé eƒe dzɔdzɔenyenye me ɖe asi ko, togbɔ be ède adã ta me nam, be magblẽ edome naneke mawɔmawɔe hã.’ (Hiob 2:1-3) Hiob ƒe fɔmaɖimaɖi ŋue Satana ƒe gbetɔamea ku ɖo. Fɔmaɖimaɖi nye nɔnɔme si nana be ame wɔa nuteƒe na Mawu le nɔnɔme ɖesiaɖe me tamanamanae, eye wòléna ɖe nu dzɔdzɔe wɔwɔ ŋu goŋgoŋ. Ẽ, Hiob ɖu dzi le gbetɔame si Abosam fɔ ɖe te ku ɖe eƒe fɔmaɖimaɖi ŋu la me. Ke hã, Abosam mena ta o.

Emegbe Satana fɔ gbetɔamenya bubu ɖe te, si lɔ ameƒome bliboa ɖe eme. Egblɔ na Yehowa be: “Ŋutigbalẽ ɖe ŋutigbalẽ teƒe, eye amegbetɔ atsɔ nusiwo katã le esi la, ana ɖe eƒe agbe ta. Ke do wò abɔ ɖa, ne nade asi eƒe ʋu kple eƒe ŋutilã ŋu kpɔ, be magbe wò nya ɖe ŋkuwò me keŋ ene oa?” (Hiob 2:4, 5) Esi Abosam megayɔ Hiob ŋkɔ azɔ o, ke boŋ wòzã nyagbe “amegbetɔ” la, efia be ele gbe tɔm amegbetɔwo katã ƒe fɔmaɖimaɖi. Le nyateƒe me la, míagate ŋu agbugbɔ Abosam ƒe nyawo agblɔ le mɔ bubu nu ale: ‘Amegbetɔ awɔ nusianu si wòate ŋui atsɔ akpɔ eƒe agbe ta. Ðe mɔ nam kpɔ, be nyemana amewo katã nagbe nu le Mawu gbɔ o mahã.’ Ðe eƒe nyawo ava eme vavã be ame aɖeke mate ŋu awɔ nuteƒe na Mawu le nɔnɔme kple ɣeyiɣi ɖesiaɖe me oa?

Yehowa ɖe mɔ na Abosam be wòatsɔ dɔ vɔ̃ɖi aɖe awɔ fu Hiob. Hiob se veve helĩhelĩ ale gbegbe be wòdo gbe ɖa be yeaku. (Hiob 2:7; 14:13) Gake Hiob gblɔ be: “Nyemasẽ nu le nye fɔmaɖimaɖi ŋu, vaseɖe esime mamia nu o.” (Hiob 27:5) Lɔlɔ̃, si me naneke mate ŋu agblẽ o, si le Hiob si na Mawu lae na wògblɔ nya sia. Hiob ɖe eƒe fɔmaɖimaɖi fia le nusianu me. Biblia gblɔ be: “Yehowa yra Hiob fifia wu tsã.” (Hiob 42:10-17) Ðe ame bubu aɖewo hã te ŋu lé fɔmaɖimaɖi me ɖe asi abe Hiob enea? Nukawoe dzɔ esime ɣeyiɣiwo va le yiyim?

Alesi Woɖo Gbetɔamea Ŋui

Le Biblia-gbalẽ si nye Hebritɔwo ƒe ta 11 lia me la, apostolo Paulo ƒo nu tso nuteƒewɔla gbogbo aɖewo, siwo nɔ anyi do ŋgɔ na ɣeyiɣi si me Kristotɔnyenye dze egɔme la ŋu. Wo dometɔ aɖewoe nye Noa, Abraham, Sara, kple Mose. Emegbe apostoloa gblɔ be: “Ɣeyiɣi la made nam be, magblɔ nya le [ame bubuwo] ŋuti o.” (Hebritɔwo 11:32) Mawusubɔla wɔnuteƒe siawo sɔ gbɔ ale gbegbe be Paulo yɔ wo be “ɖaseɖilawo ƒe alilikpo gã,” si fia be etsɔ wo le sɔsɔm kple alilikpo dodo gã aɖe si bla ɖe yame kɔtɔɔ. (Hebritɔwo 12:1) Ẽ, ƒe alafa geɖewoe nye esia si ame gbogbo manyaxlẽ aɖewo wɔ woƒe tiatiawɔblɔɖea ŋudɔ nyuie hetiae be yewoawɔ nuteƒe na Yehowa Mawu.—Yosua 24:15.

Amesi koŋ va ɖo Satana ƒe gbetɔame be yeate ŋu atrɔ amegbetɔwo katã ɖa le Yehowa yome ŋu bliboe lae nye Yesu Kristo, Mawu ŋutɔ ƒe Vi la. Veve helĩhelĩ si wòse heku le fuwɔameti ŋu kura gɔ̃ hã mete ŋu gblẽ eƒe fɔmaɖimaɖi me léle ɖe asi na Mawu me o. Hafi Yesu ƒe gbɔgbɔ nu natso la, edo ɣli sesĩe gblɔ bena: “Fofo, asiwò me metsɔ nye gbɔgbɔ la de.”—Luka 23:46.

Ɣeyiɣi gbogbo siwo katã va yi la ɖee fia kɔtɛ be Abosam mete ŋu he amesiame dzoe ɖa le Mawu subɔsubɔ ŋu o. Ame miliɔn gbogbo aɖewo va dze si Yehowa eye wotsɔ ‘woƒe dzi blibo kple luʋɔ blibo kpakple tamesusu blibo lɔ̃ eyama.’ (Mateo 22:37) Woƒe nuteƒewɔwɔ me léle ɖe asi na Yehowa goŋgoŋ ɖo kpe edzi be nugbe si Satana ɖo ɖe amegbetɔwo ƒe fɔmaɖimaɖi ŋu la tsi akpo dzi. Wò hã àte ŋu aɖo kpe edzi be aʋatsokalae Abosam nye ne ènɔ agbe fɔmaɖimaɖitɔe.

Nukae Wòle be Nàwɔ?

Mawu ƒe lɔlɔ̃nue wònye be “woaxɔ amewo katã, bene woava nyateƒe ƒe sidzedze la me.” (Timoteo I, 2:4) Alekee wò hã nàte ŋu awɔ ava nyateƒe ƒe sidzedze la me? Ðo ɣeyiɣi aɖe ɖi hena Biblia sɔsrɔ̃ bene ‘nànya Mawu vavã ɖeka la, kple Yesu Kristo, si wòdɔ ɖa la.’—Yohanes 17:3.

Satana tɔ gbe amegbetɔwo ƒe fɔmaɖimaɖi to nyatsɔtsɔ ɖe wo ŋu be menye susu nyui aɖekee le wo si wotsɔ le Mawu subɔmee o me. Hafi sidzedze nakpɔ ŋusẽ ɖe susu si anɔ asiwò ɖe Mawu subɔsubɔ ŋu dzi la, ele be nusi nèsrɔ̃ la nade wò dzi gbɔ. Eye hafi wòade dzia gbɔ la, ebia nu geɖe wu nyatakakawo didi le Biblia me ko. Mla ɖokuiwò be ŋugbledede le nusi srɔ̃m nèle ŋu nazu numame na wò. (Psalmo 143:5) Ne èle Biblia alo Biblia-srɔ̃gbalẽwo xlẽm la, dze agbagba nàgbɔ dzi ɖi ade ŋugble tso nyabiase vevi aɖewo abe esiwo gbɔna ene ŋu: ‘Nuka fiamee esia lem tso Yehowa ŋu? Mawu ƒe nɔnɔme kawoe dze le afisia? Nye agbenɔnɔ ƒe akpa ka ŋue wòle be matrɔ asi le bene nɔnɔme nyui sia nanɔ nye hã asinye? Nukawoe dzɔa dzi na Mawu, eye kawoe medzɔa dzi nɛ o? Alekee esia akpɔ ŋusẽ ɖe alesi mesena le ɖokuinye me ku ɖe Mawu ŋu dzi?’ Ŋugbledede sia ana wò dzime nayɔ fũ kple lɔlɔ̃ kple ŋudzedzekpɔkpɔ ɖe Wɔla la ŋu.

Fɔmaɖimaɖi me léle ɖe asi na Mawu bia nu geɖe wu subɔsubɔdzixɔsewo me léle ɖe asi ko. (Fiawo I, 9:4) Fɔmaɖimaɖi me léle ɖe asi na Yehowa Mawu bia agbenyuinɔnɔ kple nu dzɔdzɔe wɔwɔ le wò agbenɔnɔ ƒe akpa sia akpa. Mègasusui be ema wɔwɔ ana nu nyui aɖewo nato ye ŋu o. ‘Mawu dzidzɔtɔ’ ye Yehowa nye, eye edi be wò hã nàse vivi le agbe me. (Timoteo I, 1:11) Azɔ na míadzro nuwɔna aɖewo siwo wòle be nàƒo asa na ale be nàte ŋu anɔ agbe dzadzɛ si awɔe be nàkpɔ dzidzɔ vavãtɔ le agbe me, eye Mawu nakpɔ ŋudzedze ɖe ŋuwò la me akpɔ.

Ƒo Asa Na Gbɔdɔdɔ ƒe Agbegbegblẽnɔnɔ

Yehowa ŋutɔ ɖo srɔ̃ɖeɖe ŋuti nudidiwo ɖi ɖe eƒe Nya Biblia la me, afisi míexlẽ le be: “Ŋutsu agblẽ fofoa kple dadaa ɖi ahaku ɖe srɔ̃a ŋuti, eye woanye ŋutilã ɖeka.” (Mose I, 2:21-24) Esi wònye be atsu kple asi zu “ŋutilã ɖeka” ta la, woawo ɖeɖe dzaa ko ƒe gomekpɔkpɔ le gbɔdɔdɔ me nye bubudede Mawu ƒe srɔ̃ɖeɖoɖoa ŋu. Apostolo Paulo gblɔ be: “Bubu nanɔ srɔ̃ɖeɖe me le amewo katã dome, eye womagaƒo ɖi srɔ̃ɖeba la o; elabena ahasiwɔlawo kple matrewɔlawo la, Mawu adrɔ̃ ʋɔnu wo.” (Hebritɔwo 13:4) Nyagbe “srɔ̃ɖeba” la tsi tre ɖi na ŋutsu kple nyɔnu si ɖe wo nɔewo le se nu la ƒe gbɔdɔdɔ. Ne wo dometɔ ɖeka kpɔ gome le gbɔdɔdɔ me kple ame bubu to vovo na srɔ̃a la, ekema ewɔ ahasi, eye Mawu ate ŋu adrɔ̃ toheʋɔnui ɖe ema ta.—Maleaxi 3:5.

Ke gbɔdɔdɔ do ŋgɔ na srɔ̃ɖeɖe, alo matrewɔwɔ, ya ɖe? Ema hã nye dada ɖe agbenyuinɔnɔ ƒe dzidzenu siwo Yehowa ɖo ɖi la dzi. Biblia gblɔ be: “Esiae nye Mawu ƒe lɔlɔ̃nu, be . . . miaɖe mia ɖokui ɖa atso matrewɔwɔ me.” (Tesalonikatɔwo I, 4:3, NW) Ŋutsu kple ŋutsu alo nyɔnu kple nyɔnu ƒe gbɔdɔdɔ, ƒometɔ kekeake gbɔ dɔdɔ, kple lãwo gbɔ dɔdɔ hã nye nuvɔ̃ wɔwɔ ɖe Mawu ŋu. (Mose III, 18:6, 23; Romatɔwo 1:26, 27) Ele be amesiame si di be yeƒe nu nadze Mawu ŋu eye yeakpɔ dzidzɔ vavãtɔ le agbe me la, natsri gbɔdɔdɔ ƒe agbegbegblẽnɔnɔ.

Ke gbɔdɔdɔ ƒe dzodzro vevie si anɔ amesi mekpɔ ɖe srɔ̃ o me ya ɖe? Nuwɔna sia medzea Yehowa ŋu o. (Galatiatɔwo 5:19) Ele be susua me navo tso gbɔdɔdɔnuwɔna ƒomevi ɖesiaɖe me. Yesu gblɔ be: “Amesiame, si ke kpɔ nyɔnu aɖe wòdzroe la, ewɔ ahasi kplii xoxo le eƒe dzi me.” (Mateo 5:28) Nya siawo lɔ amamaɖeɖenuwɔnawo kpɔkpɔ le agbalẽ me, le television dzi alo le Internet dzi; gbɔdɔnyawo xexlẽ le agbalẽ me; kple hadzidzi siwo me agbegbegblẽnɔnɔ ŋuti nyawo le la sese, ɖe eme. Asaƒoƒo na nusiawo dzea Mawu ŋu eye wònana ame ƒe agbenɔnɔ nyona ɖe edzi.

Ke ahiãmoɖoɖo na ame ya ɖe? Woɖe ahiãmoɖoɖo na ame gɔme be enye “ahiãnuwo wɔwɔ ɖe ame ŋu fefetɔe, alo nuwɔna si aɖee afia be gbɔdɔdɔ ƒe dzodzro le ame aɖe me ɖe ame bubu ŋu vevie.” Ne srɔ̃tɔ aɖe, eɖanye ŋutsu alo nyɔnu o, le nɔnɔme sia ɖem fia ame bubu aɖe si menye srɔ̃a o la, ekema ele Biblia ƒe gɔmeɖosewo dzi dam eye esia nye bubumademade Yehowa ŋu. (Efesotɔwo 5:28-33) Ne trewo le ahiãnuwo wɔm ɖe wo nɔewo ŋu fefetɔe, si fia be menye kple susu be yewoaɖe yewo nɔewo o la, mesɔ kura o. Alekee wòanɔ ne amesi ŋu nèle ahiãnuwo wɔm le la va tsɔe be ɖe nèdi be yeaɖe ye evɔ wò ya mètsɔe nenema o? Ðe ema magblẽ nu le eƒe seselelãme ŋu ŋutɔ oa? Ne tamebubuwo koe ahiãmoɖoɖo na ame va he vɛ hã la, tamebubu siawo nye dzesi be nuwɔna sia ate ŋu akplɔ ame ade ahasiwɔwɔ alo matrewɔwɔ me. Ðe ema teƒe la, nuwɔwɔ ɖe amesiwo ƒe vidzinu to vovo ŋu le dzadzɛnyenye me nana bubu nɔa ame ŋu.—Timoteo I, 5:1, 2.

Nusiwo Dzea Mawu Ŋu Wɔwɔ Le Go Bubuwo Hã Me

Ahamuamewo bɔ ɖe afisiafi kloe. Nu gbegblẽe wònye be nàde nu wo mea? Ŋɔŋlɔawo metsi tre ɖe wein, biya, alo ahamuame bubu aɖe nono ɖe ŋku nu ŋu o. (Psalmo 104:15; Psalmo 104:15) Ke hã, ahatsunono kple ahamumu nye nu gbegblẽ le Mawu ŋkume. (Korintotɔwo I, 5:11-13) Ðe nàdi be ahatsunono nagblẽ nu le wò lãmesẽ kple wò ƒomegbenɔnɔ ŋua?—Lododowo 23:20, 21, 29-35; Lododowo 23:20, 21, 29-35.

Yehowa nye “Mawu nyateƒetɔ.” (Psalmo 31:5, NW) Biblia gblɔ be: ‘Mawu mate ŋu aka aʋatso o.’ (Hebritɔwo 6:18) Ne èdi be Mawu nakpɔ ŋudzedze ɖe ye ŋu la, ekema ele be nàtsri aʋatsokaka. (Lododowo 6:16-19; Lododowo 6:16-19; Kolosetɔwo 3:9, 10) Biblia xlɔ̃ nu Kristotɔwo be: “Amesiame nagblɔ nyateƒe na ehavi.”—Efesotɔwo 4:25.

Nu bubu hãe nye tsatsadada. Togbɔ be tsatsadada nye nuwɔna aɖe si de du hã la, ŋukeklẽ nuwɔnae wònye, elabena enye mɔnu si dzi ame aɖe tona be yeaɖu ame bubuwo ƒe ga. Yehowa mekpɔa ŋudzedze ɖe amesiwo ‘klẽa ŋu ɖe viɖe ƒoɖi didi ŋu’ la ŋu o. (Timoteo I, 3:8) Eyata ne èdi be yeƒe nu nadze Yehowa ŋu la, ekema ele be nàƒo asa na tsatsadada ƒomevi ɖesiaɖe, eɖanye lotodada loo, tsatsadada ƒomevi aɖe si woyɔna be bingo loo, alo gbetsotso ɖe sɔwo ƒe duɖimekeke dzi ye o. Le nyateƒe me la, menye tsatsadada dzie nàto akpɔ ga hena wò ŋutɔ alo wò ƒomea ƒe nuhiahiãwo gbɔkpɔkpɔ o.

Fififi, si nye asi dodo ɖe nusi menye ame tɔ o gbɔ, hã nye ŋukeklẽ ƒomevi bubu. Biblia gblɔ be: “Megafi fi o.” (Mose II, 20:15) Ne ènya be nane nye finu evɔ nète kpɔ ƒlee, alo nètsɔ nane esime mèbia nutɔa o la hã sɔ kple fififi. Biblia gblɔ be: “Fiafitɔ la nagafi fi o, ke boŋ nedze agbagba, ne wòatsɔ eƒe asiwo awɔ dɔ nyui, bene wòakpɔ nane aɖana hiãtɔwo.” (Efesotɔwo 4:28) Amesiwo lɔ̃ Yehowa mefia ɣeyiɣi le dɔ me o, ke boŋ wotsɔa dzo ɖe dɔ ŋu wɔna nyuie na woƒe dɔtɔwo. Wolɔ̃ be ‘yewoanɔ agbe nyui le nusianu me.’ (Hebritɔwo 13:18) Nana be dzitsinya nyui nanɔ ame si le nusiawo me nana ame ƒe susu dzea kɔ anyi.

Alekee Mawu bua amesi doa dziku kabakaba? Biblia xlɔ̃ nu be: “Megade ha kple dɔmedzoetɔ o, eye mia kple dzikutɔ migado ka o.” (Lododowo 22:24) Zi geɖe la, dɔmedzoe helĩhelĩ dodo nana ame wɔa nu adãtɔe. (Mose I, 4:5-8) Biblia gblɔ tso hlɔ̃biabia ŋu be: “Migaɖo vɔ̃ vɔ̃ teƒe na ame aɖeke o, miaƒe tamesusuwo nanɔ nu nyuiwo yome le amewo katã ƒe ŋku me; ne ate ŋu anye, nusi ke atso mia gome la, minɔ anyi kple amewo katã le ŋutifafa me! Migabia hlɔ̃ na mia ɖokui o, nye lɔlɔ̃tɔwo, ke miɖe mɔ na dziku la boŋ, elabena woŋlɔ ɖi bena: ‘Tɔnyee nye hlɔ̃biabia, nye la maɖo eteƒe, Aƒetɔ la gblɔe.’” (Romatɔwo 12:17-19) Ne míenɔ agbe ɖe aɖaŋuɖoɖo siawo nu la, míanye ŋutifafamewo geɖe wu, eye esia ana míakpɔ dzidzɔ vavãtɔ.

Àte Ŋu Aɖu Dzi

Ðe nàte ŋu aɖu dzi le avu si wɔm nèle be yealé fɔmaɖimaɖi me ɖe asi na Mawu la me togbɔ be nu geɖewo li siwo ate ŋu aƒoe ɖe nuwò be nàwɔ nu gbegblẽ hã? Ẽ, àte ŋui. Nenɔ susu me na wò be Mawu di be nàɖu dzi bene nàtsɔ aɖee afia be nya si Satana tsɔ ɖe amegbetɔwo ƒe fɔmaɖimaɖi ŋu la nye dzodzro, elabena Mawu ƒe Nya la gblɔ be: “Vinye, dze nunya, be nado dzidzɔ na nye dzi, ne mate ŋu aɖo nya ŋu na amesiwo le alɔme ɖem le ŋunye.”—Lododowo 27:11.

Àte ŋu ado gbe ɖa na Yehowa be wòado ŋusẽ ye yeawɔ nusi le dzɔdzɔe le eƒe ŋkume. (Filipitɔwo 4:6, 7, 13) Eyata ku kutri vevie be Mawu ƒe Nya, Biblia la, ŋuti sidzedze nagasu asiwò geɖe wu. Ŋugbledede tso nusiwo nèsrɔ̃ le Biblia me ŋu nyuie akpe ɖe ŋuwò be wò lɔlɔ̃ na Mawu nagade to ɖe edzi, eye esia aʋã wò be nàwɔ nusi adze eyama ŋu. Yohanes I, 5:3 na míenya be: “Lɔlɔ̃ na Mawu enye si bena, míalé eƒe seawo me ɖe asi, eye eƒe seawo mesesẽ o.” Yehowa Ðasefo siwo le miaƒe nutoa me la alɔ̃ faa be yewoakpe ɖe ŋuwò le Biblia sɔsrɔ̃ me. Eyata bia kpekpeɖeŋu sia tso wo dometɔ ɖesiaɖe si nàdo goe le miaƒe nutoa me la gbɔ, alo nàŋlɔ agbalẽ ɖo ɖe magazine sia talawo.

[Nɔnɔmetata si le axa 4]

Hiob yi edzi wɔ nuteƒe le dodokpɔ me

[Nɔnɔmetata si le axa 7]

Ne èyi edzi le Mawu ƒe Nya la srɔ̃m la, ado ŋusẽ didi si le mewò be yeawɔ nu dzɔdzɔe la