‘Mina Míatsɔ Nunanawo Vae Na Yehowa’

NE AME aɖe nyo dɔme na wò hena nane wò la, alekee nèɖea wò ŋudzedzekpɔkpɔ fianae? Bu ale si aʋakplɔla siwo nɔ Israel viwo dome la ɖe woƒe ŋudzedzekpɔkpɔ fia le aʋa aɖe si wowɔ kple Midiantɔwo megbe la ŋu kpɔ. Esi Israel viwo wɔ nu vɔ̃, le esi wosubɔ Baal-Peor ta, megbee wowɔ aʋa sia. Mawu na eƒe amewo ɖu aʋaa dzi, eyome woma aboyonuawo na asrafo 12,000 siwo de aʋa la kple Israel vi mamlɛawo. Le Yehowa ƒe mɔfiafia te la, asrafoawo tsɔ aboyonu siwo woxɔ la ƒe akpa aɖe na nunɔlawo, eye Israel vi bubuawo hã tsɔ wo tɔwo ƒe akpa aɖe na Lewi viwo nenema ke.—4 Mose 31:1-5, 25-30.

Ke hã, aʋakplɔlawo di be yewoana nu geɖe wu ema. Wogblɔ na Mose be: “Wò dɔlawo xlẽ aʋawɔla, siwo wode asi na mí la, eye wo dometɔ aɖeke meto le eme o.” Wotso nya me be yewoatsɔ sika kple atsyɔ̃ɖonu bubu vovovowo ana Yehowa. Sikanu siwo katã wona la ƒe kpekpeme wu kilogram 190.—4 Mose 31:49-54.

Egbea ame geɖe ƒe dzi ʋãa wo woɖea ŋudzedzekpɔkpɔ fiana ɖe nu siwo Yehowa wɔ na wo la ŋu. Tsɔ kpe ɖe eŋu la, menye Mawu subɔla ɖeadzɔgbewo koe ɖea ŋudzedzekpɔkpɔ sia tɔgbi fiana o. Le kpɔɖeŋu me, bu ʋukula aɖe si kɔ nɔviwo yi dukɔwo dome takpekpe si wowɔ le Bologna, Italy, ƒe kamedefefewɔƒe la le ƒe 2009 me, eye wogakɔ wo gbɔe la ŋu kpɔ. Esi ʋukulaa ku ʋua ŋuɖɔɖotɔe eye wòɖe tufafa fia ta la, nɔvi siwo ɖo eƒe ʋua wɔ ɖoɖo ŋlɔ akpedalɛta aɖe si ŋu wotsɔ ga vi aɖe kple Nuka Tututue Nye Biblia ƒe Nufiafia? gbalẽa kpe ɖo la nɛ. Esi nɔviawo ɖe afɔ sia la, ʋukulaa gblɔ be: “Enye dzidzɔ nam be maxɔ akpedalɛta la kple agbalẽa, ke hã, metrɔ le ga la tsɔm na mi, elabena medi be matsɔe adzɔ nui bene miate ŋu ayi dɔ si wɔm miele la dzi. Togbɔ be nyemenye Yehowa Ðasefo o hã la, medi be madzɔ nu sia, elabena mekpɔe be miewɔa nu le lɔlɔ̃ me.”

Ne èkpɔ ŋudzedze ɖe nu siwo Yehowa wɔ na wò ŋu la, mɔ ɖeka aɖe si dzi nàto ada akpe nɛ ye nye be nàdzɔ nu atsɔ akpe asi ɖe xexea me katã ƒe dɔ si wɔm Yehowa Ðasefo le la ŋu. (Mat. 24:14) Àkpɔ mɔ siwo dzi ame aɖewo tona dzɔa nu la le aɖaka si le ete la me.