BIBLIA ME BIABIAWO ƑE ŊUÐOÐOWO

Ðe kukuawo agagbɔ agbea?

Ku le ko abe alɔ̃dɔdɔ ene le mɔ sia nu be kukuawo meganya neneke o, eye womate ŋu awɔ naneke hã o. Ke hã Ame si gbɔ agbe dzɔ tso la agate ŋu afɔ ame siwo ku la ɖe tsitre. Mawu ɖo kpe esia dzi esi wòna ŋusẽ Yesu wòtsɔ fɔ ame vovovo siwo ku la ɖe tsitre.​—Xlẽ Nyagblɔla 9:5; Yohanes 11:11, 43, 44.

Mawu do ŋugbe be yeafɔ ame siwo ku, siwo yemaŋlɔ be gbeɖe o la ɖe tsitre woava nɔ agbe le xexe yeye si me dzɔdzɔenyenye anɔ la me. Ele be ame siwo Mawu afɔ ɖe tsitre la nanɔ lalam va se ɖe esime wòava gbɔ agbe wo. Mawu Ŋusẽkatãtɔ la le didim vevie be yeazã yeƒe ŋusẽ atsɔ afɔ ame kukuwo ɖe tsitre.​—Xlẽ Hiob 14:14, 15.

Aleke tsitretsitsia anɔ?

Ne Mawu fɔ amewo ɖe tsitre la, woakpɔ wo ɖokuiwo adze sii, eye woakpɔ wo xɔlɔ̃wo kple woƒe ƒometɔwo hã adze sii. Togbɔ be ame ƒe ŋutilã nyunyɔna ne eku hã la, Mawu agate ŋu agbɔ agbee ahana ŋutilã yeyee.​—Xlẽ 1 Korintotɔwo 15:35, 38.

Ame siwo woafɔ ɖe tsitre la dometɔ ʋɛ aɖewo anɔ agbe le dziƒo. (Nyaɖeɖefia 20:6) Ame akpa gãtɔ anɔ agbe le paradiso si woagbugbɔ aɖo anyi ɖe anyigba dzi la me. Ame siawo agadze agbea gɔme yeyee, eye mɔnukpɔkpɔ anɔ ʋuʋu ɖi na wo be woanɔ agbe tegbee.​—Xlẽ Psalmo 37:29; Dɔwɔwɔwo 24:15.