Kristotɔwo ƒe azãe Easter (alo Pâques) nye ŋutɔŋutɔa?

Woɖɔ Easter (alo Pâques) le nyagɔmeɖegbalẽ si nye Encyclopædia Britannica me be, enye “ŋkekenyui vevitɔ na Kristotɔwo, si dzi woɖua Yesu Kristo ƒe tsitretsitsi ƒe azã le.” Gake, Kristotɔwo ƒe azãe wònyea?

Hafi woaɖo kpe blemanu aɖe ƒe nyateƒenyenye dzi la, ehiã vevie be woawɔ numekuku tso eŋu tsitotsito. Nenema kee hafi míanya ne Easter nye Kristotɔwo ƒe azã alo menyee o la, ele vevie be míalé ŋku ɖe nu siwo do ƒome kple Easter la ŋu tsitotsito.

Gbã la, Yesu gblɔ na eƒe nusrɔ̃lawo be woaɖo ŋku yeƒe ku dzi, ke menye yeƒe tsitretsitsi dzi o. Eye apostolo Paulo yɔ azã sia be ‘Aƒetɔ ƒe Fiẽnuɖuɖu.’—1 Korintotɔwo 11:20; Luka 22:19, 20.

Tsɔ kpe ɖe eŋu la, agbalẽ si nye Britannica gblɔ be, Easter-kɔnuwo “medo ƒome” kple Yesu ƒe tsitretsitsia le mɔ aɖeke nu o, “ke boŋ dukɔwo ƒe kɔnuwo mee woɖe wo tsoe.” Le kpɔɖeŋu me, numekugbalẽ si nye The Encyclopedia of Religion gblɔ tso dzesi siwo wozãna le Easter-ɖuɖu me, siwo amewo nya nyuie, siwo nye koklozi kple fɔmizi ŋu be: “Koklozia nye kpɔɖeŋu na agbe yeye (alo koklovi) si dona tsoa koklozia, si ƒe tsro dzena abe nu kuku ene, la me.” Egblɔ kpee be: “Wonya fɔmizi nyuie be edzia vi geɖe, eya ta wotsɔe wɔ kpɔɖeŋu na adame [esime gbewo kple seƒoƒowo dea ama nyuie].”

Nunyalagã Philippe Walter, si nya nu tso agbalẽ siwo woŋlɔ le ƒe 476 kple 1500 dome ŋuti nyuie la ɖe ale si kɔnu mawo wɔ va nye Easter-kɔnuwo dometɔ aɖe la me. Eŋlɔ bena: “Le agbagbadzedze be woana trɔ̃subɔlawo ƒe subɔsubɔkɔnuwo nadze abe Kristotɔwo ƒe azã ene me” la, enɔ bɔbɔe be wotsɔ azã si trɔ̃subɔlawo ɖuna “esime vuvɔŋɔli, si me wogblɔna be agbe mele o, nu le yiyim eye wole gegem ɖe adame, si me agbe yeye gaɖoa nuwo me” la wɔ ɖeka kple Yesu ƒe tsitretsitsia. Aƒetɔ Walter gblɔ kpee be afɔ vevitɔ si woɖee nye be wotsɔ “Kristotɔwo ƒe ŋkuɖodzizãwo” da ɖe trɔ̃subɔlawo ƒe azãɖuɣiwo, ale be wòanɔ bɔbɔe be woana ame gbogbowo natrɔ dzi me.

Wometrɔ asi le azã sia ŋu be wòadze ‘abe Kristotɔwo ƒe azã ene’ esime apostoloawo nɔ agbe o, elabena apostoloawo nɔ abe “mɔxenu” ene, ale be woagatsɔ trɔ̃subɔsubɔkɔnuwo atsaka kple Kristotɔwo ƒe nufiafiawo o. (2 Tesalonikatɔwo 2:7) Apostolo Paulo xlɔ̃ nu be le yeƒe “dzodzo” megbe la, amewo “[agblɔ] nya totrowo, be woahe nusrɔ̃lawo ɖe wo ɖokuiwo ŋu.” (Dɔwɔwɔwo 20:29, 30) Eye le ƒe alafa gbãtɔ ƒe nuwuwu la, apostolo Yohanes ŋlɔ bena ame aɖewo nɔ Kristotɔwo kplɔm nɔ tatram xoxo. (1 Yohanes 2:18, 26) Eya ta mɔa nɔ ʋuʋu ɖi be vivivi la, woava dze trɔ̃subɔlawo ƒe kɔnuwo yome.

Gake ame aɖewo susu be menye nu gbegblẽe wònye be woawɔ ɖe Easter-kɔnuwo dzi o—elabena enaa mɔnukpɔkpɔ “trɔ̃subɔlawo” wosea Yesu ƒe tsitretsitsia gɔme nyuie wu. Gake Paulo mada asi ɖe nya ma dzi gbeɖe o. Togbɔ be esime wònɔ mɔ zɔm le Roma Fiaɖuƒe bliboa me la, eva nya nu tso trɔ̃subɔlawo ƒe kɔnu geɖewo ŋu hã la, mewɔ ɖe kɔnu mawo dometɔ aɖeke dzi kpɔ gbeɖe be yeana amewo nanya Yesu nyuie o. Ke boŋ ɖe wòxlɔ̃ nu Kristotɔwo be: “Migazu ame siwo nɔa kɔkuti ɖeka te kple dzimaxɔsetɔwo o, elabena mesɔ o. Elabena hadede kae le dzɔdzɔenyenye kple sedzimawɔmawɔ dome? Alo gome kae le kekeli si le viviti gbɔ? ‘Eya ta mido go le wo dome, eye miɖe mia ɖokui ɖa,’ Yehowa ye gblɔe, ‘eye midzudzɔ asikaka nu makɔmakɔ la ŋu.’”—2 Korintotɔwo 6:14, 17.

Esi míedzro kpeɖodziawo me nyuie vɔ la, vi kae wòɖe na mí? Esia na wòdze ƒaa be menye Kristotɔwo ƒe azãe Easter alo Pâques nye o.