BIBLIA ME BIABIAWO ƑE ŊUÐOÐOWO
Nu ka tae wòle be míaɖo ŋku Yesu ƒe kua dzi?
Yayra kawoe yesu ƒe kua ahe vɛ le etsɔme?—Yesaya 25:8; 33:24
Yesu ƒe kua ye nye nudzɔdzɔ vevitɔ le ŋutinya me—nu si tae nye be, ɖe wòku be yeana amegbetɔwo ƒe agbe naganɔ abe ale si wònɔ le gɔmedzedzea me ene. Esi wowɔ amegbetɔwo la, nu gbegblẽ wɔwɔ ƒe didi menɔ wo me o, eye womewɔ wo hã be woadze dɔ alo woaku o. (1 Mose 1:31) Ke hã, ame gbãtɔ, Adam, ye na nu vɔ̃ va xexea me. Gake Yesu tsɔ eƒe agbe sa vɔe be yeaɖe mí tso nu vɔ̃ kple ku si me.—Xlẽ Mateo 20:28; Romatɔwo 6:23.
Mawu lɔ̃ mí ale gbegbe be wòdɔ Via ɖo ɖe anyigba dzi be wòava ku ɖe mía ta. (1 Yohanes 4:9, 10) Yesu gblɔ na eyomedzelawo be woanɔ wɔna bɔbɔe aɖe si me woazã abolo kple wain le la wɔm atsɔ anɔ ŋku ɖom yeƒe kua dzi. Ne míewɔnɛ alea ƒe sia ƒe la, míaɖee afia be míekpɔ ŋudzedze ɖe ale si gbegbe Mawu kple Yesu siaa lɔ̃ míi la ŋu.—Xlẽ Luka 22:19, 20.
Ame kawoe dze aɖu abolo la ahano wain la?
Esime Yesu gblɔ na eƒe nusrɔ̃lawo be woanɔ ŋku ɖom yeƒe kua dzi la, eƒo nu tso nubabla aɖe hã ŋu. (Mateo 26:26-28) Nubabla sia ʋu mɔnukpɔkpɔ ɖi na eƒe nusrɔ̃lawo kple eyomedzela bubu aɖewo be woava zu fiawo kple nunɔlawo akpe ɖe Yesu ŋu le dziƒo. Togbɔ be ame miliɔn geɖe ye dea Yesu ƒe ku ƒe ŋkuɖodziwɔnaa teƒe hã la, ame siwo le nubabla ma me koe ɖua aboloa henoa wain la.—Xlẽ Nyaɖeɖefia 5:10.
Ƒe 2,000 kloe ye nye esia Yehowa le ame siwo ava zu fiawo la tiam. (Luka 12:32) Ame siawo ƒe xexlẽme le sue ne wotsɔ wo sɔ kple ame siwo anɔ agbe tegbee le anyigba dzi.—Xlẽ Nyaɖeɖefia 7:4, 9, 17.