BIBLIA ME BIABIAWO ƑE ŊUÐOÐOWO
Nu ka tae nyagblɔɖiwo le Biblia me ɖo?
Nu ka tae Biblia gblɔ nu siwo le dzɔdzɔm le míaƒe ŋkekea me la ɖi?—Luka 21:10, 11.
Nya siwo wogblɔ ɖi tsitotsito wova eme la ƒe kpɔɖeŋu geɖe le Biblia me. Amegbetɔ aɖeke mate ŋu agblɔ etsɔme ɖi tsitotsito o. Eya ta ale si Biblia me nyagblɔɖiwo va emee la ɖo kpe edzi kɔtɛ be Biblia nye Mawu ƒe Nya.—Xlẽ Yosua 23:14; 2 Petro 1:20, 21.
Biblia me nyagblɔɖi siwo va eme xoxo la nye susu nyui aɖe si ta míaxɔ Mawu dzi ase. (Hebritɔwo 11:1) Eye wona míeka ɖe edzi hã be ŋugbe siwo Mawu do ku ɖe etsɔme nyui aɖe ŋu la ava eme. Eya ta Biblia me nyagblɔɖiwo naa mɔkpɔkpɔ vavã mí.—Xlẽ Psalmo 37:29; Romatɔwo 15:4.
Aleke Biblia me nyagblɔɖiwo kpena ɖe mía ŋui?
Nyagblɔɖi aɖewo nyea nuxlɔ̃ame na Mawu ƒe amewo be woaɖe afɔ aɖe. Le kpɔɖeŋu me, esi Kristotɔ gbãtɔwo de dzesi nyagblɔɖi aɖewo me vava la, woʋu dzo le Yerusalem. Emegbe esi wotsrɔ̃ dua le esi emetɔ akpa gãtɔ gbe Yesu ta la, Kristotɔawo ya nɔ dedie le teƒe bubu sãa.—Xlẽ Luka 21:20-22.
Egbea, nyagblɔɖi siwo le eme vam la le eɖem fia be Mawu Fiaɖuƒea ava ɖe amegbetɔwo ƒe fiaɖuƒewo kple dziɖuɖuwo ɖa kpuie. (Daniel 2:44; Luka 21:31) Eya ta ehiã kpata be ame sia ame naɖe afɔ fifia be Yesu Kristo, si nye Fia si Mawu ɖo la, nakpɔ ŋudzedze ɖe ye ŋu.—Xlẽ Luka 21:34-36.