Dzikpɔla Siwo Xɔa Ŋgɔ—Gbetakpɔxɔ Nusɔsrɔ̃ Dzikpɔla
1 Gbetakpɔxɔ Le Gbeƒã Ðem Yehowa ƒe Fiaɖuƒe ye nye dɔwɔnu vevitɔ si dzi “dɔla nuteƒewɔla kple aɖaŋudzela” la tona naa gbɔgbɔmenuɖuɖu mí ‘ɖe ɣeyiɣi nyui dzi.’ (Mat. 24:45) Agbanɔamedzi vevi aɖe le hamemegã si kpɔa Gbetakpɔxɔ Nusɔsrɔ̃a dzi la dzi be wòanye nufiala bibi si ɖoa kpɔɖeŋu nyui le Kristotɔwo ƒe agbenɔnɔ me.—Rom. 12:7; Yak. 3:1.
2 Be Gbetakpɔxɔ Nusɔsrɔ̃ dzikpɔla nafia nu nyuie la, ele be wòadze agbagba adzra ɖo nyuie kwasiɖa sia kwasiɖa. Ewɔa esia le gbedodoɖa kple ŋuɖɔɖɔɖo me. Eƒe ɖetsɔtsɔ le hamea me vevie dzena le alesi wòdzea agbagba vevie be nusi srɔ̃m míele naɖo míaƒe dzi gbɔ me. Etea gbe ɖe nusɔsrɔ̃a me nyati veviwo dzi eye wòkpena ɖe mía ŋu be míakpɔ alesi wodo ƒome kple nyatia ƒe tanyae.
3 Be wòadzra ɖo nyuie bia be wòaxlẽ ŋɔŋlɔawo ado ŋgɔ ale be wòanya alesi woku ɖe nusɔsrɔ̃a ŋui. Edoa Mawu ƒe Nya la ɖe dzi to dzidede ƒo na hamea be woawɔ Biblia ŋudɔ nyuie le nusɔsrɔ̃a me. Ne ŋuɖoɖo siwo hamea na la meɖe nyati vevi aɖe ɖe go o alo womegblɔ alesi woazã ŋɔŋlɔ vevi aɖee o la, ebiaa nya bubu tsɔ ɖea nufiamea ɖe goe. To esia wɔwɔ me la, ekpena ɖe mía ŋu be míaɖo nyataƒoƒo si sɔ gbɔ eye míanya alesi míatsɔ nusi srɔ̃m míele la awɔ dɔe le míaƒe agbe me.
4 Gbetakpɔxɔ Nusɔsrɔ̃ dzikpɔla la dzea agbagba edziedzi be yeadzi yeƒe nufiafia ŋutete ɖe edzi. Meƒoa nu fũ o ke boŋ edea dzi ƒo na mí be míaɖo nya ŋu—le mía ŋutɔwo ƒe nyagbɔgblɔwo me, wòanɔ kpuie, eye wòasɔ. Ɣeaɖewoɣi la, ate ŋu aɖo ŋku edzi na mí be ame gbãtɔ si aɖo nya ŋu le memamã aɖe me la ƒe ŋuɖoɖoa nanɔ kpuie eye wòasɔ tẽ ɖe nyabiabia si woŋlɔ ɖe ete la nu. Ŋuɖoɖo bubu siwo atso nyaselawo gbɔ ate ŋu ahe susu ayi alesi woazã ŋɔŋlɔawoe, nya bubu siwo wɔ ɖeka kplii, alo alesi míate ŋu atsɔ nyatia ade dɔwɔwɔ mee dzi. Gbetakpɔxɔ Nusɔsrɔ̃ dzikpɔlaa dzea agbagba dea dzi ƒo na amesiame be wòadzra ɖo le eɖokui si alo le ƒomea me ale be woate ŋu akpɔ gome le nusɔsrɔ̃a me.
5 Esi míenye “Yehowa ƒe nusrɔ̃viwo” ta la, míekpɔa ŋudzedze ɖe ‘nunana siwo nye amewo,’ abe Gbetakpɔxɔ Nusɔsrɔ̃ dzikpɔlawo ene, amesiwo ‘dzea agbagba le nufiafia me’ la ŋu.—Yes. 54:13; Ef. 4:8, 11; Tim. I, 5:17.