“Nya si Wogblɔ Ðe Egblɔɣi”
1 Ðe agbenyaa gbɔgblɔ na amewo nye nu sesẽ na wòa? Ðe nèsusuna be ele be nya si yeagblɔ nade to ale gbegbe be wòawɔ dɔ ɖe yeƒe nyaselawo dzia? Esi Yesu dɔ eƒe nusrɔ̃lawo la, egblɔ na wo be: “Ne miele yiyim la, miɖe gbeƒã gblɔ bena: ‘Dziƒofiaɖuƒe la ɖo vɔ!’” (Mat. 10:7) Gbedasia mesesẽ o, eye egbɔgblɔ nɔ bɔbɔe. Vovototo aɖeke mele eme egbea o.
2 Zi geɖe la, nya ʋɛ aɖewo koe hiã be woatsɔ adze dzeɖoɖo gɔmee. Esi Filipo do go Etiopiatɔ aƒedzikpɔla la, ebiae be: “Èle nya, si xlẽm, nèle la gɔme sema?” (Dɔw. 8:30) Numedzodzro dodzidzɔname ka gbegbe nye si do tso “nya, si wogblɔ ɖe egblɔɣi” la me!—Lod. 25:11.
3 Àte ŋu adze dzeɖoɖo gɔme alea ne èle subɔsubɔdɔa wɔm. Aleke nàwɔe? To ŋkuléle ɖe nu ŋu kple nya siwo sɔ ɖe nɔnɔmewo nu tiatia me. Bia nya aɖe, eye nàɖo to ase ŋuɖoɖoa.
4 Biabia Bɔbɔe Aɖewo: Àte ŋu ate biabia siawo dometɔ ɖesiaɖe kpɔ atsɔ adze dzeɖoɖo gɔmee:
◼ “Èzãa Aƒetɔ ƒe Gbedodoɖa (alo, ‘Mía Fofo’) le wò subɔsubɔ mea?” (Mat. 6:9, 10) Gblɔ eƒe akpa aɖe, eye emegbe nàgblɔ be: “Ame aɖewo biana be, ‘Mawu ƒe ŋkɔ si Yesu gblɔ be ele be woakɔ eŋu lae nye ka?’ Ame bubuwo biana be, ‘Nukae nye Fiaɖuƒe si Yesu gblɔ be míado gbe ɖa abia?’ Èkpɔ ŋuɖoɖo siwo dze ŋuwò na biabia siawoa?”
◼ “Èbia kpɔ be: ‘Asixɔxɔ kae le agbe ŋu?’” Ðee fia be edo ƒome kple sidzedze Mawu.—Nyagb. 12:13; Yoh. 17:3.
◼ “Èbu be woava ɖe ku ɖa gbaɖegbea?” Zã Yesaya 25:8 kple Nyaɖeɖefia 21:4 nàtsɔ ana ŋuɖoɖo si ŋu kakaɖedzi le.
◼ “Ðe mɔ bɔbɔe aɖe li si dzi míato akpɔ ta na tɔtɔ si le xexeamea?” Ðee fia be Mawu fia nu be, “lɔ̃ hawòvi.”—Mat. 22:39.
◼ “Ðe afɔku aɖe adzɔ si atsrɔ̃ anyigba blibo la katã gbaɖegbea?” Gblɔ Biblia ƒe ŋugbedodo, si nye be anyigba la anɔ anyi tegbee.—Ps. 104:5.
5 To mɔ si le bɔbɔe hele tẽ dzi nàtsɔ nyanyuia ana le dɔmefafa me. Yehowa ayra ɖe agbagba siwo nàdze be yeagblɔ nyateƒea ƒe ‘nya ɖeka’ teti ya na amewo la dzi.