Nyabiaɖaka
◼ Aleke woakpe ɖe amesi dzudzɔ gbeƒãɖeɖe ɣeyiɣi didi ŋu be wòagadze azu nyanyuigbeƒãɖela?
Dzidzɔnyae wònye ne ame aɖe si dzudzɔ gbeƒãɖeɖe ɖee fia be yedi tso dzi me be yeasubɔ Yehowa. (Luka 15:4-6) Anɔ eme be ɖe amea ɖe mɔ be tsitretsiɖeŋu alo agbemenuteɖeamedziwo wɔe be megakpɔa gome le ɖokuisinusɔsrɔ̃, kpekpewo dede, kple gbeadziyiyi me o. Mɔ kae nye nyuitɔ kekeake si dzi woato akpe ɖe amea ŋu be wòawɔ gbɔgbɔmeŋgɔyiyi?
Ele be mí katã míadze agbagba aɖe Kristotɔwo ƒe lɔlɔ̃ vavã si le mía si nɛ afiae. Hamemegãwo atso enumake alé ŋku ɖe nusiwo tututu hiãe le gbɔgbɔ me ŋu. (Yak. 5:14, 15) Ne ɣeyiɣi kpui aɖe koe wòdzudzɔ gbeadziyiyi la, ke ɖewohĩ gbeƒãɖela kpɔnuteƒe ƒe kpekpeɖeŋu koe nye nusi hiã be woagade dzo amea me be wòayi gbeadzi. Gake ne amesi dzudzɔ gbeadziyiyi megadea ha kple hamea o ɣeyiɣi didi la, ekema ahiã nu geɖe wu. Be wòatu eƒe xɔse kple ŋudzedzekpɔkpɔ ɖo la, woate ŋu aɖo aɖaŋu nɛ be wòazã agbalẽ si dze atsɔ asrɔ̃ Bibliae. Ne edzɔ nenema la, subɔsubɔdɔdzikpɔla awɔ ɖoɖo be gbeƒãɖela si dze nasrɔ̃e kplii. (Heb. 5:12-14; kpɔ November 1998 Míaƒe Fiaɖuƒe Subɔsubɔdɔ ƒe Nyabiaɖaka.) Ne ènya ame aɖe si hiã na kpekpeɖeŋu alea la, ƒo nu kple miaƒe hamea me subɔsubɔdɔdzikpɔla.
Hafi woakpe ame aɖe si dzudzɔ gbeƒãɖeɖe ɣeyiɣi didi be wòagakpɔ gome le subɔsubɔdɔa me la, anyo be hamemegã eve nakpe kplii akpɔe ɖa be edze anye Fiaɖuƒegbeƒãɖela hã. Woawɔe abe alesi wowɔnɛ ne wokpe kple ame yeye siwo di be yewoazu nyanyuigbeƒãɖelawo ene. (Kpɔ June 15, 1989, ƒe Gbetakpɔxɔ, axa 17.) Ele be didi vevie nanɔ amesi dzudzɔ gbeƒãɖeɖe la me be yeagblɔ nyanyuia na ame bubuwo. Ele hã be wòaɖo nudidi vevi siwo woyɔ le Míaƒe Subɔsubɔdɔ-gbalẽa ƒe axa 98-9 la gbɔ, eye wòanɔ hamea ƒe kpekpewo dem edziedzi.
Gbɔgbɔ me ɖoɖowɔɖi nyui si anɔ amesi gbugbɔ va la si akpe ɖe eŋu geɖe be wòado ŋusẽ ƒomedodo xɔasi si le eya kple Yehowa dome ahalé eme ɖe asi eye wòayi edzi azɔ le agbe mavɔ mɔ la dzi. (Mat. 7:14; Heb. 10:23-25) Ne etsɔ “veviedodo katã” wɔe eye wòtu Kristotɔwo ƒe nɔnɔme siwo nɔa anyi ɖaa ɖo la, akpe ɖe eŋu be magazu Kristotɔ nusrɔ̃la ‘si gbɔdzɔ alo ame matseku’ azɔ o.—Pet. II, 1:5-8.