Ènye “Nukpɔkpɔ”!
1 Apostolo Paulo ŋlɔ be: “Elabena míezu nukpɔkpɔ na xexeame kple mawudɔlawo kple amewo siaa.” (Kor. I, 4:9) Nukae esia fia eye aleke wòle be wòakpɔ ŋusẽ ɖe míaƒe subɔsubɔdɔa dzi egbeae?
2 Le Korintotɔ gome la, nusi nyagbɔgblɔ “nukpɔkpɔ” ahe va eƒe susu me anye Romantɔwo ƒe avuwɔwɔ, si me wonaa amesiwo wotso kufia na vanɔa nukpɔla akpe nanewo ƒe ŋkume hafi woawu wo ŋutasesẽtɔe. Nenema ke, nukpɔla gbogbo aɖe—siwo nye amewo kple mawudɔlawo siaa—kpɔ funyafunya si wowɔ ƒe alafa gbãtɔ me Kristotɔwo le gbeƒãɖeɖe Fiaɖuƒea ta teƒe. (Heb. 10:32, 33) Woƒe nuteƒewɔwɔa kpɔ ŋusẽ ɖe eteƒekpɔla geɖe dzi, abe alesi míaƒe dzidodo hã wɔnɛ le egbeŋkekea me fefewɔƒea ene. Amekawoe míenye nukpɔkpɔ na?
3 Na Xexeame Kple Amewo: Ɣeaɖewoɣi la, nyadzɔdzɔgblɔmɔnuwo kakaa nyatakakawo ku ɖe Yehowa ƒe amewo ƒe dɔwɔnawo ŋu. Togbɔ be míekpɔa ŋudzedze geɖe ɖe ɖaseɖiɖi nyui si sɔ eye wòle eteƒe ŋu hã la, míekpɔa mɔ hã na ɖaseɖiɖi vɔ̃ siwo mía ŋu gblẽlawo akaka ɣeaɖewoɣi. Ke hã ele be míayi edzi aɖe mía ɖokui afia be míenye Mawu ƒe subɔlawo “to ɖaseɖiɖi vɔ̃ kple ɖaseɖiɖi nyui me.” (Kor. II, 6:4, 8) Eme kɔna na eteƒekpɔla dzianukwaretɔwo ƒã be míenye Yesu Kristo ƒe nusrɔ̃la vavãwo.
4 Na Mawudɔlawo: Gbɔgbɔmenuwɔwɔwo hã léa ŋku ɖe mía ŋu. Abosam kple eƒe gbɔgbɔ vɔ̃wo hã léa ŋku ɖe mía ŋu—gake kple ‘dziku ŋutɔ,’ eye wole didim be yewoatɔ te ‘Yesu ŋuti ɖaseɖiɖidɔa.’ (Nyaɖ. 12:9, 12, 17) Mawudɔla wɔnuteƒewo hã da ŋku ɖi le nu kpɔm eye wokpɔa dzidzɔ ne nuvɔ̃wɔla ɖeka gɔ̃ hãe trɔ dzi me. (Luka 15:10) Ele be esia nado ŋusẽ mí míanyae be mawudɔlawo kpɔa míaƒe subɔsubɔdɔa be ehiã kpata, eye wònye dɔ vevitɔ si wɔm wole le anyigba dzi egbea!—Nyaɖ. 14:6, 7.
5 Ne èdo go tsitretsiɖeŋu alo susui be wò subɔsubɔdɔa mele ku tsem o la, ɖo ŋku edzi be xexeame katã le kpɔwòm. Wò dzidodo nuteƒewɔwɔtɔe ƒoa nu geɖe tso ŋuwò. Mlɔeba la, wò “xɔse ƒe ʋiʋli nyui la” ana “wò asi nasu agbe mavɔ” la dzi.—Tim. I, 6:12.