Fiaɖuƒegbeƒãɖeɖe Xɔa Amewo Ðe Agbe!
1 Enye dɔ vevitɔ kekeake si le edzi yim le xexeame fifia. Yehowa Mawu, Yesu Kristo, kple mawudɔla gbogbo aɖewo ƒe susu le eŋu vevie. Nukae wònye eye nukatae wòle vevie ɖo? Fiaɖuƒegbeƒãɖeɖe ye, eye exɔa amewo ɖe agbe!—Rom. 1:16; 10:13, 14.
2 Ame aɖewo ase le wo ɖokui me be míanɔ nyui geɖe wɔm na amewo ne míele etem kpɔ be míadzra nɔnɔmeawo ɖo le xexeame boŋ. Dagbadagba be woahe ŋutifafa vɛ, woada dɔlélewo, eye woana ganyawo nanyo ɖe edzi xɔ ame geɖe ƒe susu me ale gbegbe. Gake nukae akpe ɖe amewo ŋu wu?
3 Dɔ Vevi Ŋutɔ Aɖee: Fiaɖuƒegbedasia koe ɖea tameɖoɖo si le agbe ŋu, nusi na amegbetɔ le fu kpem, kple etsɔmemɔkpɔkpɔ vavã ɖeka kolia gɔme fiana. Nyanyuia naa amewo va zua Yehowa xɔlɔ̃wo ale be wokpɔa “Mawu ƒe ŋutifafa, si ƒo gɔmesesewo katã ta.” (Fil. 4:7) Fiaɖuƒegbedasia koe naa mɔfiame nyui amewo be wòakpe ɖe wo ŋu woanɔ te ɖe agbemekuxiwo nu fifia, eye wòfiaa nusi woawɔ be woatsi agbe ne wova tsrɔ̃ xexe vɔ̃ɖi sia le etsɔme. (Yoh. I, 2:17) Ðe esia menye nusita míawɔ mía tɔ sinua le Fiaɖuƒegbeƒãɖeɖedɔa me oa?
4 Le kpɔɖeŋu me: Kae nye mɔ nyuitɔ si dzi woato akpe ɖe kɔƒe aɖe me tɔ siwo le alɔ̃me evɔ tsita aɖe gbɔna gbagbã ge kpuie aɖe wo la ŋuti? Tɔkpo tsɔtsɔ aku tsia le ta si le gbagbãm me yea? Kɔƒea me dzadzraɖo be wòanya kpɔ yea? Gbeɖe! Ele be woanyɔ kɔƒea me nɔlawo, woaxlɔ̃ nu wo ku ɖe afɔku si le ŋgɔ ŋu, eye woakpe ɖe wo ŋu be woasi! Amesiwo le alɔ̃ dɔm le gbɔgbɔ me egbea la ɖo afɔku gã aɖe me. (Luka 21:34-36) Esi nuɖoanyi sia nu ava yi kpuie ta la, mina míadze agbagba aɖe gbeƒã kple ŋkubiã na amesiwo katã míate ŋui!—Tim. II, 4:2; Pet. II, 3:11, 12.
5 Nɔ Edzi: Mina míadi mɔnu siwo dzi míato aɖo dzinyuitɔ geɖe wu gbɔ kple nyanyuia—le woƒe aƒewo me, le mɔdodowo dzi, to telefon dzi, kple le vo me. Dɔ si Yehowa de asi na mí be míawɔ lae nye dɔ vevitɔ kekeake si míate ŋu awɔ. Ne míewɔe dzonɔamemetɔe la, ‘míaxɔ mía ɖokui kple amesiwo ɖoa to mí la ɖe agbe.’—Tim. I, 4:16.