Le Mawu ƒe dziɖuɖu te la, eƒe nuwɔwɔwo katã wɔ ɖeka eye wonɔ ŋutifafa me
Nu Ka Tae Míehiã Mawu Fiaɖuƒea?
Tso amegbetɔ gbãtɔwo dzi la, mía Wɔla, ame si ŋkɔe nye Yehowa, koe nye Dziɖula ɖeka kolia. Eɖua dzi le lɔlɔ̃ me. Etso abɔ nyui aɖe ɖe Eden na amegbetɔwo be wòanye wo nɔƒe. Azɔ hã, ena nuɖuɖu vovovowo bɔ ɖe afi ma na wo. Tsɔ kpe ɖe eŋu la, ena dɔ si me dzidzeme le la amegbetɔwo be woawɔ. (1 Mose 1:28, 29; 2:8, 15) Anye ne amegbetɔwo anɔ ŋutifafa me ne ɖe wokpɔtɔ nɔ Mawu ƒe dziɖuɖu si me lɔlɔ̃ le la te.
Amegbetɔ gbãtɔwo gbe Mawu ƒe Dziɖuɖu
Biblia ɖee fia be mawudɔla dzeaglã aɖe si wova yɔ emegbe be Satana Abosam, tso ɖe Mawu ŋu be medze aɖu dzi o. Eƒe nyaa fia be Mawu ƒe mɔfiame kple dziɖuɖu manɔmee la, amegbetɔwo akpɔ dzidzɔ wu. Nublanuitɔe la, mía dzila gbãtɔwo, Adam kple Xawa, dze Satana yome eye wodze aglã ɖe Mawu ŋu.—1 Mose 3:1-6; Nyaɖeɖefia 12:9.
Esi Adam kple Xawa gbe be Mawu nagaɖu yewo dzi o ta la, wobu Paradiso-bɔ si nye wo nɔƒe kple mɔnukpɔkpɔ si su wo si be woanɔ agbe tegbee le lãmesẽ blibo me. (1 Mose 3:17-19) Woƒe nyametsotsoa gblẽ nu le vi siwo wova dzi emegbe la hã ŋu. Biblia gblɔ be esi Adam wɔ nu vɔ̃ ta la, “nu vɔ̃ va xexea me, eye to nu vɔ̃ me ku la va.” (Romatɔwo 5:12) Nu vɔ̃ gahe nu gbegblẽ bubu vɛ. Eyae nye be: “Amegbetɔ ɖua fia ɖe amegbetɔ dzi hena eƒe gbegblẽ.” (Nyagblɔla 8:9) Le nyaa nu la, ne amegbetɔ le nɔvia dzi ɖum la, kuxiwo koe ado gã ɖe edzi.
AMEGBETƆWO ƑE DZIÐUÐUWO VA DO
Nimrod dze aglã ɖe Yehowa ŋu
Amegbetɔ gbãtɔ si ɖu dzi le anyigba dzi si ŋu Biblia ƒo nu tsoe nye Nimrod. Eye edze aglã ɖe Yehowa ƒe dziɖuɖu ŋu. Tso Nimrod ŋɔli la, amegbetɔ dziɖula siwo nye ŋusẽtɔwo zã woƒe ŋusẽ le mɔ gbegblẽwo nu. Ƒe 3,000 ye nye esi va yi la, Fia Salomo gblɔ be: “Mekpɔ ame siwo tem wole ɖe anyi la ƒe aɖatsiwo, ke akɔfala aɖeke meli na wo o. Ŋusẽ le ame siwo te wo ɖe anyi la si.”—Nyagblɔla 4:1.
Nenema koe nuwo le egbea hã. Le ƒe 2009 me la, Dukɔ Ƒoƒuawo ƒe agbalẽ aɖe gblɔ be, eva le dzedzem ƒãa be nu si gbɔ amegbetɔwo ƒe “kuxi akpa gãtɔ tso dometɔ aɖee nye amegbetɔwo ƒe dziɖuɖuwo.”
MAWU AÐE AFƆ KPUIE!
Xexea hiã na dziɖula kple dziɖuɖu siwo nyo wu. Eye ema ƒe ŋugbee mía Wɔla la do!
Amegbetɔwo ƒe dziɖuɖu nyuitɔ kekeake gɔ̃ hã mete ŋu kpɔ ta na amegbetɔwo ƒe kuxi gãtɔwo o
Mawu ɖo Fiaɖuƒe, alo dziɖuɖu aɖe anyi si ava xɔ ɖe amegbetɔwo ƒe dziɖuɖuwo katã teƒe, eye “eya ɖeɖe anɔ anyi tegbee.” (Daniel 2:44) Fiaɖuƒe siae ame miliɔn geɖe doa gbe ɖa biana. (Mateo 6:9, 10) Gake menye Mawu ŋutɔe anye fiaɖuƒe ma ƒe fia o, ke boŋ etia ame aɖe si nye amegbetɔ kpɔ be wòaɖu dzi. Ame kae Mawu tia?