Aleke Nàɖo Nya Ŋu Na Amewo?
1. Nu ka tae wòle be míasrɔ̃ Yesu ƒe kpɔɖeŋua ne amewo bia nya mí?
1 Ale si Yesu ɖo nya ŋu na ame siwo bia nyae alo ame siwo di be yewoase nanewo gɔme la gawɔa nuku na amewo va se ɖe egbea. Ne míele subɔsubɔdɔa wɔm eye amewo bia nya ƒomevi vovovowo mí la, anyo be míasrɔ̃ ale si Yesu ɖo nya ŋu na amewo.—1 Pet. 2:21.
2. Nu kae ate ŋu akpe ɖe mía ŋu míaɖo nya aɖe si ame aɖe bia mí ŋu nyuie wu?
2 Ðo To Gbã: Yesu bua susu si tae amea bia nyaa ɖo la ŋu. Ɣeaɖewoɣi la, ahiã be míabia nya aɖewo amea ale be míanya nu si tututu le susu me nɛ. Ne ame aɖe bia wò be, “Èxɔ Yesu dzi sea?” la, ɖewohĩ ɖeko wòdi be yeanya nu si tae mèɖua Kristmas o. Ne ède dzesi nu si tututu amea di be yeanya la, ekema àte ŋu aɖe nu me nɛ nyuie wu.—Luka 10:25-37.
3. Dɔwɔnu kawoe le mía si siwo ate ŋu akpe ɖe mía ŋu míakpɔ ŋuɖoɖo nyui siwo nɔ te ɖe Ŋɔŋlɔawo dzi la na amewo?
3 Zã Mawu Ƒe Nya La Tsɔ Ðo Nya Ŋui: Zi geɖe la, enyo wu be míana amea nanya ale si Biblia ɖo nya si wòbia la ŋui. (2 Tim. 3:16, 17; Heb. 4:12) Reasoning gbalẽa kple “Biblia Me Nyatiwo Hena Numedzodzro” si le Kristotɔwo Ƒe Hela Ŋɔŋlɔawo—Xexe Yeye Gɔmeɖeɖe Biblia me kpena ɖe mía ŋu míenaa ŋuɖoɖo si sɔ la amewo. Ne ame si bia nyaa mexɔ Biblia dzi se o gɔ̃ hã la, àte ŋu agblɔ nu si Ŋɔŋlɔawo fia la nɛ ŋuɖɔɖotɔe. De dzi ƒo na amea be wòade ŋugble le Biblia me nya si me nunya le eye wònye nyateƒe tso blema ke la ŋu vevie. Ne èsrɔ̃ Yesu ƒe kpɔɖeŋua la, wò nyaŋuɖoɖowo anɔ abe ‘sikatɔtɔŋuti le klosalogba me’ ene—anye nya si sɔ, si dze to, eye asixɔxɔ anɔ eŋu.—Lod. 25:11.
4. Ɣekaɣiwoe masɔ kura be míadze agbagba be míaɖo nya sia nya ŋu o?
4 Ðe Wòle Be Míaɖo Biabia Ðe Sia Ðe Ŋua? Ne mènya nya aɖe si wobia wò ƒe ŋuɖoɖo o la, megakpe ŋu na wò be nàgblɔ be: “Nyemenya ŋuɖoɖoa o, gake mayi aɖawɔ numekuku le wò biabiaa ŋu eye matrɔ ava aɖe nu si ŋu meke ɖo la me na wò.” Ŋuɖɔɖɔɖo kple ɖetsɔleme ɖeɖe fia aƒemenɔlaa alea ate ŋu aʋãe wòadi be nàtrɔ ava. Ne ède dzesii be ame siwo bia nya wò la nye tsitretsiɖeŋula siwo le agbagba dzem be yewoaʋli nya kpli wò la, anyo be nàsrɔ̃ Yesu ƒe kpɔɖeŋua ahaɖo nyaa ŋu kpuie ko. (Luka 20:1-8) Nenema kee ne ame aɖe si medi ŋutɔŋutɔ be yease nyateƒea o la le agbagba dzem be yeahe nya kpli wò la, àte ŋu awu dzeɖoɖoa nu bubutɔe eye nàzã ɣeyiɣia atsɔ adi dzi anukware tɔwo.—Mat. 7:6.
5. Kpɔɖeŋu kae Yesu ɖo ɖi le nyaŋuɖoɖo na amewo me?
5 Yesu nya be ŋuɖoɖo ɖe Yehowa ŋu le vevie be yeate ŋu awu yeƒe dɔdeasi si nye be ‘yeaɖi ɖase na nyateƒe la’ nu, si lɔ nyaŋuɖoɖo na ame siwo le didim ŋutɔŋutɔ be yewoase nyateƒea gɔme ɖe eme. (Yoh. 18:37) Mɔnukpɔkpɔ kae nye esi su mía si be míasrɔ̃ Yesu le nyaŋuɖoɖo na “ame siwo si dzi ƒe nɔnɔme nyui le hena agbe mavɔ kpɔkpɔ”!—Dɔw. 13:48.