Nya Alesi Wòle Be Nàɖo Nya Ŋui

BIABIA aɖewo le abe nyagbe si le nogoo ene. Nya la ŋutɔ le etome. Zi geɖe la, nya si le nyaa tome la le vevie wu nyabiabiaa ŋutɔ.

Ne nyaŋuɖoɖoa sese mele tsɔtsɔm na nyabialaa o hã la, nusi nàgblɔ, eɖanye nya kpui alo nya legbee o, kple mɔ si dzi nàto agblɔe la katã le alesi wòle be nàɖo nya ŋui la gɔmesese me. (Yoh. 16:12) Abe alesi Yesu gblɔe na eƒe apostoloawo ene la, ɣeaɖewoɣi la, ame aɖe abia nya si medze na eya nyabialaa be wòase o alo esi maɖe vi nɛ boo hafi o.—Dɔw. 1:6, 7.

Ŋɔŋlɔawo xlɔ̃ nu mí be: “Mina amenuveve kple dze nanɔ miaƒe nya me ɖaasi, bena mianya alesi wòdze be, miaɖo nya ŋuti na amesiame.” (Kol. 4:6) Eyata hafi míaɖo nya ŋu la, menye nusi gblɔ ge míala ko ŋue míabu o, ke míabu alesi míele egblɔ gee hã ŋu.

Dze Si Nyabialaa ƒe Nukpɔsusu

Zadukitɔwo dze agbagba be yewoatsɔ nyabiabia aɖe atre mɔ̃e na Yesu ku ɖe nyɔnu aɖe si ɖe srɔ̃ zi gbɔ zi nane ƒe tsitretsitsi ŋu. Gake Yesu nya be womexɔ tsitretsitsia dzi se gɔ̃ hã o. Eyata le eƒe ŋuɖoɖoa me la, etrɔ ɖe nukpɔsusu madzemadze si dzi wonɔ te ɖo bia nya ma boŋ ŋuti. Yesu ɖe susu kpli wo kple aɖaŋu si wɔ nuku, eye wògblɔ Ŋɔŋlɔawo me nya nyanyɛ aɖe na wo tsɔ fia asi nane si ŋuti woa ŋutɔwo mebu kpɔ o—esi nye ɖaseɖiɖi kɔte be Mawu le ame kukuwo fɔ ge ɖe tsitre vavã. Eƒe nyaŋuɖoɖoa wɔ mo yaa na amesiwo tsi tre ɖe eŋu ale gbegbe be wovɔ̃ be woagabia nya bubui.—Luka 20:27-40.

Nenema ke wòle be wò hã nàdze si amesiwo biaa nya wò la ƒe nukpɔsusu kple nusiwo me wotsɔ ɖe le be nànya alesi nàɖo nya ŋui na wo. Le kpɔɖeŋu me, ɖewohĩ sukuxɔmehati alo dɔwɔhati aɖe abia nusita mèɖua Kristmas o la wò. Nukatae wòle biabiam ɖo? Susu si ta mèɖunɛ o koŋ dim wòle be yeasea, alo esi wòle didim be yeanya nenye be woɖea mɔ na mi be miaɖu nu, ano nu ahakpɔ dzidzɔ taea? Ne èdi be yeanya la, àte ŋu abiae susu si ta wòle nyaa biam ɖo. Azɔ ɖo nyaa ŋu alesi dze. Àte ŋu awɔ mɔnukpɔkpɔa ŋudɔ hã afia alesi Biblia ƒe mɔfiafia tsɔtsɔ wɔ dɔe kpɔa mía ta tso ŋkekenyuia ƒe akpa siwo ɖea dzi le ame ƒo eye wozu agba kpekpe na amewo me.

Tsɔe be wokpe wò be nàva ƒo nu le Yehowa Ðasefowo ŋu na sukuviwo ƒe ƒuƒoƒo aɖe. Ðewohĩ woabia nya ne èƒo nu vɔ. Ne edze abe nyabiabiaawo tso dzime eye wole tẽ ene la, anyo ŋutɔ be ŋuɖoɖoawo gɔmesese nagasesẽ o eye woazɔ tẽ. Ne nyabiabiaawo ɖe susu gbegblẽ siwo le amewo si le nutoa me ɖe mía ŋu ɖe go la, anyo ŋutɔ ne wò gɔmedzenyawo anye nya kpui aɖewo gbɔgblɔ le nusiwo gbɔ wòate ŋu atso be nukpɔsusu siawo le ameawo si ɖe mía ŋu la ŋuti, eye nàgblɔ nusitae Yehowa Ðasefowo tiae nenema be Biblia nafia dzidzenu si dzi yewoazɔ ɖo la yewo. Enuenu la, viɖe nɔa eme be woabu nyabiabia siawo tɔgbe abe nya siwo le fu ɖem na ameawo ene, ke menye abe tsitretsiɖeŋunyawo ene o—togbɔ be woabia wo gbetɔametɔe hã. Eyata wò nyaŋuɖoɖoa nye mɔnukpɔkpɔ si su asiwò be nàɖe nu me na wò nyaselawo, ana nyatakaka vavãtɔ wo ahaɖe alesi míaƒe dzixɔse nɔ te ɖe Ŋɔŋlɔawo dzii la me na wo.

Aleke nàwɔ ne dɔtɔ medi be yeana ɣeyiɣi wò be nàde takpekpe o? Gbã, bu eyama ƒe nukpɔsusu ŋu kpɔ. Ðe wòade dziwò ne ègblɔ nɛ be yelɔ̃ faa be ɣebubuɣi la, yeawɔ dɔ le kpakpãɣi vɔ megbea? Ne èɖe eme nɛ be nufiame siwo míexɔna le míaƒe takpekpewo me la kpena ɖe mía ŋu be míanye dɔwɔla anukwareɖilawo kple nuteƒewɔlawo la, ase egɔme na wòa? Ne èɖee fia be yetsɔ ɖe le eƒe nyonyo me la, ɖewohĩ eya hã aɖe mɔ na wò be nàwɔ nusi wòva dze sii be ele vevie na wò le agbe me. Ke ne edi be nàwɔ nane si nye anukwaremaɖimaɖi ɖe? Ne ètsɔ numeɖeɖe si me kɔ gbe eƒe nyaae eye nègblɔ wò susu si nɔ te ɖe Ŋɔŋlɔawo dzi la, esia ana wòakpɔ wò asimadamada ɖe etɔ dzi ya. Gake ne èɖe susu kplii gbã eye nèɖe eme nɛ be amesi lɔ̃ be yeada alakpa ahafi fi nɛ la, ate ŋu ava eme be ame ma kee ada alakpa nɛ ahafi eƒe nu la, ɖe manyo wu oa?

Le go bubu me la, ɖewohĩ sukuvie nènye eye mèdi be yeakpɔ gome le suku nuwɔna aɖewo siwo mesɔ ɖe Ŋɔŋlɔawo nu o la me o. Ðo ŋku edzi be ate ŋu adzɔ be nufialaa ƒe susu mawɔ ɖeka kple ye tɔ o, eye eƒe dɔdasie wònye be wòakpɔ egbɔ be amesiame wɔ ɖe ɖoɖo dzi le sukuxɔa me. Kuxi sesẽ siwo dze ŋgɔ wòe nye be (1) nàtsɔ ɖe le nusi le vevie nɛ me, (2) nàɖe ɖokuiwò nu bubutɔe, eye (3) nàtɔ afɔnu to sesĩe hena nusi nèkpɔ be adze Yehowa ŋu. Be wòaɖe vi keŋkeŋ la, ahiã be nàwɔ geɖe wu nusi dzi nèxɔ se la gbɔgblɔ tẽ ko. (Lod. 15:28) Ne mètsi o la, ɖikeke mele eme o be fofowò alo dawò akpe ɖe ŋuwò nàdzra ɖo ɖe nusi nàgblɔ ŋu.

Ɣeaɖewoɣi la, woadi tso asiwò be nàɖe ɖokuiwò nu le aʋatso nutsotso aɖe si ame ŋkuta aɖe tsɔ ɖe ŋuwò ta. Kpovitɔwo ƒe amegã, dziɖuɖumegã, alo ʋɔnudrɔ̃la aɖe ate ŋu abia be nàɖo nyabiabia aɖewo ŋu ku ɖe toɖoɖo se aɖe, Kristotɔwo ƒe akpaɖekedzimademade, alo gomekpɔkpɔ le dulɔlɔ̃kɔnuwo abe gbedodo na aflaga alo duha dzidzi ene me ŋuti. Aleke wòle be nàɖo nya ŋui? Biblia xlɔ̃ nu mí be míawɔe “le tufafa kple bubu deto me.” (Pet. I, 3:15, NW) Azɔ bia ɖokuiwò nusitae nya siawo le vevie na woamawo ɖo eye nàkpɔ nya mawo gbɔ bubutɔe. Nukae nàwɔ le ema megbe? Apostolo Paulo fia asi gomenɔamesi siwo le Roma-viwo si le Roma-sea nu, eyata wò hã ate ŋu afia asi sea ƒe gomenɔamesi siwo le asiwò le wò nyaa gome. (Dɔw. 22:25-29) Ðewohĩ nyateƒenya siwo ku ɖe Kristotɔ gbãtɔwo kpakple Yehowa Ðasefo siwo le xexeame katã ƒe nukpɔsusu ŋu la aʋu dziɖuɖumegã la ƒe susu. Alo àte ŋu afia asi alesi le nyateƒe me, sidzedze Mawu ƒe ŋusẽtɔnyenye la ʋãa amewo zi geɖe be woawɔ ɖe amegbetɔwo ƒe se siwo nyo la dzi. (Rom. 13:1-14) Ne numeɖeɖe siawo tɔgbe do ŋgɔ la, woase wò nukpɔsusu si nɔ te ɖe Ŋɔŋlɔawo dzi la me bɔbɔe wu.

Nyabialaa ƒe Nukpɔsusu le Ŋɔŋlɔawo Ŋu

Ele vevie hã be nàbu nukpɔsusu si le nyabialaa si le Ŋɔŋlɔ Kɔkɔeawo ŋu ŋuti ne èle alesi nàɖo nya ŋu nɛ ŋu bum. Esiae Yesu wɔ esime wònɔ Zadukitɔwo ƒe nyabiabia ŋu ɖom ku ɖe tsitretsitsia ŋu. Esi Yesu nya be Mose ƒe nuŋɔŋlɔwo ɖeɖeko dzie woxɔ se ta, eɖe susu kpli wo le Mose ƒe Agbalẽ Atɔ̃awo me nuŋɔŋlɔ aɖe ŋu, eye wòdze eƒe nyawo gɔme be: “Ke bena ame kukuwo atsi tre la, Mose hã gblɔe fia.” (Luka 20:37) Nenema ke wò hã àkpɔ be ade ye dzi ne yexlẽ nya tso Biblia ƒe akpa siwo dzi wò nyaselaa da asi ɖo eye wònya nu tso wo ŋu nyuie.

Ke ne wò nyasela mexɔ Biblia dzi se be enye agbalẽ si dzi woate ŋu aka ɖo o ɖe? De dzesi nusi apostolo Paulo wɔ le nuƒo si wòƒo le Areopago la me, abe alesi woŋlɔe ɖe Dɔwɔwɔwo 17:22-31 ene. Egblɔ Ŋɔŋlɔawo me nyateƒenya na wo evɔ meyɔ nya tẽ tso Biblia me o. Wò hã ate ŋu awɔe nenema, ne ehiã. Le afi aɖewo la, ahiã be nàwɔ numedzodzro kple amea zi geɖe hafi nàva yɔ nya tso Biblia me tẽ. Ne èƒo nu tso Biblia ŋu la, nunya le eme be gbã, nàgblɔ susu siwo ta wòsɔ be woawɔ emenyawo ŋudɔ tsɔ wu be nàgblɔ kã be enye Mawu ƒe Nya. Gake wò taɖodzinu koe nye be nàɖi ɖase si me kɔ le Mawu ƒe tameɖoɖo ŋu, eye mlɔeba nàna wò nyaselaa ŋutɔ nakpɔ nusi Biblia gblɔ. Nyaƒoɖeamenu aɖaŋutɔe ƒe ŋusẽ le Biblia si sasasã wu nusianu si mía ŋutɔwo míagblɔ kple nu.—Heb. 4:12.

‘Amenuveve Nanɔ Eme Ðaasi’

Aleke gbegbe wòhesɔe nye si be, esi Yehowa ŋutɔ yɔ fũ kple amenuveve ta la, woxlɔ̃ nu esubɔlawo be woana ‘amenuveve nanɔ woƒe nya me ɖaasi’! (Kol. 4:6; Mose II, 34:6) Esia fia be ele be míaƒo nu dɔmenyotɔe, ne edze abe ɖe amea ƒe nuwɔna wɔe be medze na amenuveve ma ene o gɔ̃ hã. Ele be míaƒe nuƒo nadze to, manye esi atɔ tome na ame alo aɖe ameŋumabumabu afia o.

Ame geɖe toa nuteɖeamedzi sesẽwo me, eye wogblɔa nya madzetowo ɖe wo ŋu gbesiagbe. Ne míeyi ame mawo gbɔ la, ɖewohĩ woada gbe ɖe mía gbɔ. Nukae míawɔ? Biblia gblɔ be: “Nyaŋuɖoɖo fafɛ tsia dziku nu.” Nyaŋuɖoɖo sia tɔgbe ate ŋu ana amesi tsi tre ɖe ŋuwò gɔ̃ hã nafa miaa. (Lod. 15:1; 25:15) Le amesiwo ŋu wowɔa nu ɖo amemabumabutɔe gbesiagbe gome la, nuwɔna kpakple nuƒoƒo na wo dɔmenyotɔe ate ŋu awɔ dɔ ɖe wo dzi ale gbegbe be woaɖo to nyanyui si míehe vɛ na wo la.

Menye míaƒe didi be míahe glãka kple amesiwo medea bubu nyateƒe ŋu o. Ke boŋ míaƒe didie nye be míanɔ te ɖe Ŋɔŋlɔawo dzi aɖe susu kple amesiwo aɖe esia ƒe mɔ na mí. Aleke ke nɔnɔme si míedze ŋgɔe ɖale o, míedi be wòanɔ susu me na mí be ele be míaɖo nya ŋu dɔmenyotɔe eye kakaɖedzi nanɔ mía si be Mawu ƒe ŋugbedodo xɔasiawo ava eme godoo.—Tes. I, 1:5.

Ame Ŋutɔ ƒe Nyametsotsowo Kple Dzitsinya ƒe Nyawo

Nukae anye wò nyaŋuɖoɖo ne Biblia-nusrɔ̃vi alo haxɔsetɔ aɖe bia nusi wòawɔ le nɔnɔme aɖe me wò? Nusi wò ŋutɔ nàwɔ la anɔ nyanya na wò. Gake ele be amesiame natsɔ eya ŋutɔ ƒe agbe me nyametsotsowo ƒe agba. (Gal. 6:5) Apostolo Paulo ɖe nu me be yede “xɔse ƒe toɖoɖo” ƒe dzi ƒo le amesiwo dome yeɖe gbeƒã le. (Rom. 16:26) Ema nye kpɔɖeŋu nyui aɖe si yome míadze. Amesi wɔa nyametsotsowo be yeadze amesi fiaa Biblia ye alo amegbetɔ bubu koŋ ko ŋu la le amegbetɔ subɔm, eye mele agbe nɔm le xɔse me o. (Gal. 1:10) Eyata ɖewohĩ nyaŋuɖoɖo si gɔmesese le bɔbɔe hele tẽ la maɖe vi keŋkeŋ na nyabialaa o.

Ekema aleke nàɖo nya ŋu wòasɔ kple Biblia ƒe mɔfiamewoe? Àte ŋu ahe susu ayi Biblia ƒe gɔmeɖose kple kpɔɖeŋu siwo sɔ le Biblia ƒe nuŋlɔɖi me la dzi. Ɣeaɖewoɣi la, anyo be nàfia alesi wòawɔ numekukui ale be eya ŋutɔ nake ɖe gɔmeɖose kple kpɔɖeŋu mawo ŋu. Miate ŋu aɖo dze tso gɔmeɖoseawo kple kpɔɖeŋu siawo ƒe vevienyenye gɔ̃ hã ŋu, gake miatsɔ wo awɔ dɔe le nɔnɔme si do mo ɖa la me o. Bia amea nenye be ekpɔ nane le wo me si ate ŋu akpe ɖe eŋu wòawɔ nyametsotso si me nunya le. De dzi ƒo nɛ be nede ŋugble le nusi wòawɔ adze Yehowa ŋu ŋuti le ɖekawɔwɔ me kple gɔmeɖose kple kpɔɖeŋu siawo. Le mɔ sia nu la, èle kpekpem ɖe eŋu be wòanye amesi ‘ato ŋudɔwɔwɔ me akpɔ sidzenu, amesi nu mã, be wòabu nyui kple vɔ̃ me kpɔ.’—Heb. 5:14.

Nyaŋuɖoɖo le Hamea ƒe Kpekpewo Me

Enuenu la, Kristo-hamea ƒe kpekpewo ʋua mɔnukpɔkpɔ vovovowo na mí be míaʋu míaƒe xɔse me le amehawo ŋkume. Mɔ siwo dzi míato awɔ ema dometɔ ɖekae nye be míaɖo nya ŋu. Aleke wòle be míaɖo nya ŋui? Eyae nye kple didi be míayra Yehowa, si fia be, míaƒo nu nyui le eyama ŋu. Emae hakpala Dawid wɔ “le takpekpewo me.” (Ps. 26:12) Ele vevie hã be míaɖo nya ŋu le mɔ si ade dzi ƒo na haxɔsetɔwo ahaʋã wo “le lɔlɔ̃ kple dɔ nyui wɔwɔ me” nu abe alesi apostolo Paulo xlɔ̃ nu míi ene. (Heb. 10:23-25) Nusɔsrɔ̃ do ŋgɔ ate ŋu akpe ɖe mía ŋu be míawɔ esia.

Ne woyɔ wò be nàɖo nya ŋu la, na wò ŋuɖoɖoa gɔmesese nanɔ bɔbɔe, eme nakɔ, ahanɔ kpuie. Mègagblɔ memamaa katã me nyawo o; tɔ ŋku nya vevi ɖeka ko. Ne ègblɔ ŋuɖoɖoa ƒe akpa ɖeka ko la, ana mɔnukpɔkpɔ ame bubuwo be woawo hã natsɔ wo tɔ akpee. Ele vevie ŋutɔ be woaƒo nu tso ŋɔŋlɔ siwo woyɔ le nuxexlẽa me ŋu. Le esia wɔwɔ me la, dze agbagba nàhe susu ayi mawunyakpukpuia ƒe afisi te gbe ɖe nya si me ɖem wole dzi la dzi. Srɔ̃ alesi nàɖe nu me ɖe wò ŋutɔ wò nyagbewo me tsɔ wu be nànɔ exlẽm tẽ tso memamaa me. Megaɖe fu na wò ne eva eme be wò ŋuɖoɖo aɖe mesɔ ɖe edzi tututu o. Ema dzɔna ɣeaɖewoɣi ɖe amesiame si ɖoa nya ŋu dzi.

Edze ƒã be alesi wòle be míaɖo nya ŋui nyanya lɔ nu geɖe ɖe eme wu ŋuɖoɖoa nyanya ko. Nugɔmesese hiã. Gake kpɔ alesi gbegbe wònya senae ne wò nyaŋuɖoɖoa tso dzime eye wòde dzi gbɔ na ame bubuwo ɖa!—Lod. 15:23.