Ðe Gbeƒã Na “Ame Ƒomeviwo Katã”
1. Aleke nya nyui gblɔla bibiwo le abe asinudɔwɔla bibiwo ene?
1 Dɔwɔnu geɖewoe nɔa asinudɔwɔla bibi si, eye wònya ale si wòazã wo dometɔ ɖe sia ɖe kple ɣeyiɣi si me wòazãe la nyuie. Nenema kee, dɔwɔnu vovovowo le míawo hã si siwo kpena ɖe mía ŋu míewɔa míaƒe nya nyui gbɔgblɔ dɔa nyuie. Le kpɔɖeŋu me, wota agbalẽ gbadza siwo ku ɖe nyati vovovowo ŋu be woakpe ɖe mía ŋu míaɖe gbeƒã na “ame ƒomeviwo katã.” (1 Kor. 9:22) Woyɔ agbalẽ gbadza siawo dometɔ aɖewo ɖe emedegbalẽvia me; wogblɔ ame siwo wotrɔ asi le wo ŋu na hefia ale si míana woe la hã le eme.
2. Ɣekaɣie míate ŋu ana agbalẽ gbadzawo le gbeadzi?
2 Ɣeyiɣi Si Me Míana Agbalẽ Gbadzawo: Asinudɔwɔla zãa dɔwɔnu aɖe ɣesiaɣi si wòkpɔ be aɖe vi. Nenema kee míate ŋu ana agbalẽ gbadza aɖe ne míekpɔe be aɖe vi na ame aɖe, menye le ɣleti si me wobia tso mía si be míana agbalẽ gbadzawo le gbeadzi la me ko o. Le kpɔɖeŋu me, ne Biblia Ƒe Nufiafia gbalẽae nam míele le ɣletia me eye míele gbeƒã ɖem le dukɔ si me ame geɖe metsɔa ɖe le Biblia me boo o me la, aɖe vi wu ne míena agbalẽ gbadza si sɔ la amea gbã, eye emegbe ne míetu eƒe ɖetsɔleme ɖo vɔ la, míana Biblia Ƒe Nufiafia gbalẽ lae.
3. Nu ka tae wòle be míabi ɖe dɔwɔnu siwo ŋu dɔ míewɔna le ɖaseɖiɖidɔa me la zazã me?
3 Ŋɔŋlɔawo kafu ame siwo bi ɖe woƒe dɔwo me. (Lod. 22:29) Le nyateƒe me la, dɔ aɖeke mele vevie egbea wu “nya nyui la ƒe dɔ kɔkɔe la” o. (Rom. 15:16) Be míanye “dɔwɔla si mehiã be ŋu nakpe le naneke ŋuti o” la, ele be míadze agbagba abi ɖe míaƒe dɔwɔnuawo zazã me.—2 Tim. 2:15.