Ale Si Nàwɔ Abi Ðe Ðaseɖiɖidɔa Me—Dzeɖonyanutsinyawo Ŋu Ðoɖo

Nu Si Tae Wòle Vevie: Tsɔe be ènya be dzɔdzɔmefɔku aɖe adzɔ kpuie. Amewo aku ne womesi yi bebeƒe o. Èyi wò aƒelika aɖe gbɔ be yeana toklãe, gake etsi nya ɖe nuwò hegblɔ be yemevo o. Kakaɖedzitɔe la, màna ta kaba o, ke boŋ àdze agbagba be yeakpe ɖe eŋu! Ame geɖewo le míaƒe anyigbamama me siwo medina be yewoaɖo to mí o, esi womenya be gbedeasi si ana yewoatsi agbe la gblɔm míele o ta. Wovuna ɖe nu bubuwo ŋu le ɣeyiɣi si me míeyi wo gbɔ. (Mat. 24:37-39) Alo ɖewohĩ wobua nazã ɖe mía ŋu le alakpanya siwo amewo gblɔ na wo tso mía ŋu ta. (Mat. 11:18, 19) Woanya susu be vovototo aɖeke mele mía kple subɔsubɔha siwo tsea ku gbegblẽwo la dome o. (2 Pet. 2:1, 2) Ne aƒemenɔla aɖe metsɔ ɖeke le eme gbã o hã la, mele be míana ta kaba o.

Ale Si Nàwɔe:

Hafi nàdze aƒe me yi aƒe me dɔa gɔme la, zã ɣeyiɣi vi aɖe nàde ŋugble le dzeɖonyanutsinya siwo nàte ŋu ado goe kple ale si nàɖo wo ŋui la ŋu.
Ne aƒemenɔlaa gblɔ nya aɖe be yeatsɔ atsi dzeɖoɖoa nu la, to mɔ aɖe dzi ŋuɖɔɖotɔe be nàyi dzeɖoɖoa dzi. Ðewohĩ àte ŋu awɔ esia to ekafukafu me. Le kpɔɖeŋu me, ne amea gblɔ be yele subɔsubɔha aɖe me xoxo la, àte ŋu agblɔ be: “Menɔ mɔ kpɔm be mado go ame aɖe si tsɔ ɖe le mawusubɔsubɔ me abe wò ene.” Ɣeaɖewoɣi la, ne èlɔ̃ ɖe aƒemenɔlaa ƒe seselelãmewo alo nɔnɔmewo dzi la, aʋu mɔ na wò nàɖi ɖase nɛ. Le kpɔɖeŋu me, ne egblɔ be vovo mele ye ŋu o la, àte ŋu agblɔ be: “Mese egɔme. Gake hafi madzo la, madi be matsɔ agbalẽ sia na wò.” Mɔnu bubue nye be ne aƒemenɔlaa gblɔ be yemedi be yeasee o la, nàbia nya aɖee. Àte ŋu abiae be, “Biblia me nyawoe mèdi be yease o loo, alo subɔsubɔhawo ƒe nyae mèdi be yease o?”
Bu nuwo ŋu nyuie. Ðo ŋku edzi be Yehowa mezia amewo dzi be woaɖo to ye o. (5 Mose 30:19) Ame sia ame atsɔ eya ŋutɔ ƒe agba le Mawu ŋkume. (Gal. 6:5) Ne aƒemenɔlaa le adã dzi la, anyo wu be míadzo le egbɔ. Ne míede bubu eƒe seselelãmewo ŋu la, ɖewohĩ esia aʋu mɔ ɖi na gbeƒãɖela bubu be wòaɖi ɖase nɛ ɣebubuɣi.—1 Pet. 3:15.

Te Esia Kpɔ Le Ɣletia Me:

Ne èdo go dzeɖonyanutsinya le ʋɔtru aɖe nu la, ɖo dze kple wò gbeadzizɔhɛa tso ale si nàgate ŋu aɖo nya ma ŋu le mɔ si nyo wu nu.