Ale Si Míaɖi Ðase Le Dutoƒo Ne Míele Kekevi Alo Kplɔ̃ Zãm

Kekevi kple kplɔ̃ siwo dzi woɖo agbalẽwo ɖo zazã le dutoƒoɖaseɖiɖidɔa me le ku tsem ale gbegbe hele dzianukwaretɔwo hem ɖe nyateƒea ŋu. (Yoh. 6:44) Eya ta míele dzi dem ƒo na hamemetsitsiwo be woawɔ ɖoɖo ne hamea nawɔ dutoƒoɖaseɖiɖidɔa le woƒe anyigbamamaa ƒe akpa siwo ame gbogbowo tona. Esi menye ɖe wotu kekevi siwo dzi woɖo agbalẽwo ɖo la ɖe teƒe ɖeka o ta la, zi geɖe la mehiã be woaxɔ mɔɖegbalẽ tso fiahawo gbɔ o. Ame kawoe dze awɔ dɔ sia? Woawoe nye gbeƒãɖela siwo bua nuwo ŋu nyuie, siwo dzrana ɖo bubutɔe, eye wonya dzeɖoɖo kple ame. Nu siwo wòle be gbeƒãɖelawo nawɔ kple nu siwo mele be woawɔ o ale be woakpɔ dzidzedze ƒe ɖewoe nye esiwo gbɔna.

Nu siwo wòle be nàwɔ:

Kɔ mo, do vivi ɖe ame ŋu eye nàxɔ amewo nyuie. Gbeƒãɖela aɖewo koa alɔgbɔnu vividoɖeameŋutɔe hedoa gbe na wo xɔlɔ̃wɔwɔtɔe. Ne ame si tso eme va yina le ŋku lém ɖe agbalẽwo ŋu la, àte ŋu agblɔ nɛ be, “Àte ŋu atsɔ esi do dzidzɔ na wò faa.”
Tɔ ɖe afi si sɔ. Le teƒe aɖewo la, nu nyuiwo do tso eme esi gbeƒãɖelawo te ɖa tso kplɔ̃ alo kekevia gbɔ afɔ ʋɛ aɖewo. Le teƒe bubuwo hã gbeƒãɖelawo kpɔe be ewɔwɔ alea wɔnɛ be amewo medina be yewoagogo kplɔ̃a alo kekevia o, eya ta wogatena yia adzɔge vie helalana va se ɖe esime ame aɖe tɔ ɖe kplɔ̃a ŋu. Ne ame aɖe nya te ɖe kplɔ̃a ŋu ko la, dze dzeɖoɖo gɔme kplii; ɖewohĩ àte ŋu abiae be “Èbu nyabiase sia ŋu kpɔa?”
Zã Biblia la edziedzi.
Ðe Biblia-nusrɔsrɔ̃ ƒe ɖoɖoa me na ame sia ame si tsɔ agbalẽ siwo míetsɔ srɔ̃a nu kple amewo, abe Biblia ƒe Nufiafia gbalẽa ene. Biae ne adi be yeakpɔ video si nye Nu Ka Tae Wònyo Be Nàsrɔ̃ Biblia? ne nàɖee afiae.
Xɔ ame siwo ɖe ɖetsɔleme fia ƒe adrɛs kple kaƒodzesi. Ne amea mele miaƒe anyigbamama me o la, ekema kpe “Taflatsɛ Mitrɔ Yi Wo Gbɔ” (S-43) gbalẽvia ɖo nàtsɔe ana hamea ƒe agbalẽŋlɔla kaba.