Nu Kae Nàte Ŋu Asrɔ̃ Tso Míaƒe Hakpakpawo Me?

Hakpakpawo dometɔ kawoe dzɔa dzi na wò wu? Eye nu ka tae? Mèkpɔe be nu siwo dzɔna gbe sia gbe kloe ye le videoawo me oa? Esi haawo me nyawo kple ale si woƒo woe meto mɔ ɖeka o ta la, ame sia ame akpɔ etɔ le eme. Ke hã, menye modzakaɖenu koe hakpakpawo kple hadzidzi ƒe videoawo nye o.

Nufiamewo le hakpakpa ɖe sia ɖe me, si aɖe vi na mí Kristotɔwo le agbenɔnɔ kple subɔsubɔdɔa siaa me. Ha aɖewo kuna ɖe amedzrowɔwɔ, ɖekawɔwɔ, xɔlɔ̃wo, dzideƒo, lɔlɔ̃ alo xɔse ŋu. Bubuwo kuna ɖe ale si míatrɔ ava Yehowa gbɔ, alɔ̃ tsɔtsɔke, awɔ nuteƒe gbe sia gbe kple ale si míati gbɔgbɔmetaɖodzinuwo yome la ŋu. Hakpakpa aɖe gɔ̃ hã ku ɖe ale si míaɖɔ ŋu ɖo le asitelefon zazã ŋu. Nufiame vevi bubu kawo ŋue nèke ɖo le hakpakpaawo me?

MIKPƆ HAKPAKPAWO ƑE VIDEO SI NYE ESIAE MÍENƆ MƆ KPƆM NA, EYOME MIAÐO BIABIA SIAWO ŊU:

• Yayra siwo ava le etsɔme kawo ŋue srɔ̃tɔ tsitsiawo nɔ ŋugble dem le?—1Mo 12:3

• Nu kae míawɔ atsɔ ado ŋusẽ ale si míexɔ Yehowa dzi se be awɔ ɖe eƒe ŋugbedodowo dzi?

• Nudzɔdzɔ dodzidzɔname ka mee míele mɔ kpɔm be míaxɔ amewo atuu le?

• Mɔ ka nue Fiaɖuƒe mɔkpɔkpɔa kpena ɖe mía ŋu míedoa dzi le xaxa siwo me tom míele egbea me le?—Ro 8:25