3 | Biblia Me Kpɔɖeŋuwo Ate Ŋu Aɖe Vi Na Wò
BIBLIA GBLƆ BE . . . Ŋutsu kple nyɔnu wɔnuteƒe aɖewo nɔ anyi siwo “ƒe seselelãmewo sɔ kple mía tɔwo.”—YAKOBO 5:17.
Nu Si Esia Fia
Biblia ƒo nu tso ŋutsu kple nyɔnu geɖe siwo to nɔnɔme sesẽwo me le woƒe agbe mea ŋu. Ne míele woƒe ŋutinyawo xlẽma, míava kpɔe be ale si wo dometɔ aɖewo se le wo ɖokui mea sɔ kple mía tɔ.
Ale Si Esia Ate Ŋu Akpe Ðe Mía Ŋu
Mí katã míedina be amewo nase nɔnɔme siwo me tom míelea gɔme na mí. Vevietɔ ne susumedɔléle aɖe le fu ɖem na mí. Ne míexlẽ nu tso nu siwo me ame siwo le Biblia me to ŋua, míava kpɔe be woƒe nuŋububu kple seselelãmewo sɔ kple mía tɔ. Esia wɔnɛ be míekpɔnɛ be ame bubuwo hã to míaƒe nɔnɔmea me kpɔ, eya ta mímesena le mía ɖokui me be míetsi akogo ne míele nɔnɔme sesẽ aɖe me tom o.
Biblia ƒo nu tso ame geɖe siwo se le wo ɖokui me be wɔna vɔ le yewo ŋu eye wotsi dzodzodzoea ŋu. Èse le ɖokuiwò me be, ‘Agba sia wu tsɔtsɔ nam’ kpɔa? Mose, Eliya kple David se le wo ɖokui me nenema kpɔ.—4 Mose 11:14; 1 Fiawo 19:4; Psalmo 55:4.
Biblia ƒo nu tso nyɔnu aɖe si ŋkɔe nye Hana ŋu. Enɔa “nu xam vevie” elabe mate ŋu adzi vi o, eye etsusia ɖua fewu le eŋu le esia ta.—1 Samuel 1:6, 10.
Biblia ƒo nu tso ŋutsu aɖe si ŋkɔe nye Hiob ŋu. Ðewohĩ nu siwo me wòtoa ate ŋu asɔ kple mía tɔ. Togbɔ be xɔse sẽŋu nɔ esi hãa, nya vɔ̃ geɖe dzɔ ɖe edzi si na eƒe dzi gbã vevie, eye wògblɔ gɔ̃ hã be: “Menyɔ ŋu nye agbe; nyemegadi be manɔ agbe o.”—Hiob 7:16.
Ne míesrɔ̃ ale si ame siawo wɔ ɖu nuŋububu manyomanyo siwo ɖe fu na wo dzia, esia ate ŋu ado ŋusẽ mí be míado dzi le nɔnɔme sesẽwo me.